دووشانین  شیکایتی

 کول  دیبینده،  بالاجا  دووشان   اوُتورموشدو  و یاواشدان   آغلاییردی .

او، آغلایا – آغلایا   دئییردی؛  دونیادا  من دووشاندان بدبخت هئچ کس یوخدور. من  هامیدان  ضعیفم .

تولکویه  باخ، کی دائیم  ایستییر  منی  توتسون . قیرغی منی توتماق  ایستییر ...

منیم  بؤلبول  کیمی  گؤزل سسیم  یوخدور،  تولکونون  قویروغو  نه   گؤزلدی !

بیر  توسباغا  اونو  گؤردو،  یاخینلاشدی  ودئدی : آی دووشان  قونشو  سن نییه  آغلاییرسان؟

دیشلرین  ساغ - سالمدیر،قولاقلارین هر سسی  تئز ائشیدیر، آیاقلارین  وارکی  توولو(سرعت ایله)  قاچا بیلیرسن . گؤزلرین چوخ  گؤزلدیر!

آی  دووشان، حَلَه  سنی  بولبول  کیمی  قفسه  سالمیرلار .

دوشان  گؤزونون  یاشینی  سیلدی   ودئدی :

قویروغوم  تولکونون  قویروغوکیمی  اوزون  اولساییدی، ایت  دالیما  دؤشنده  منیم  قویروغومو  کوپارداردی،   تانری (الله) منه  چوخ  نعمتلر  وئریب،  حاق  سنین له دیر  توسباغا !‌

ایندی  کی  خوش باخیرام،  گؤرورم  من  بیرچوخوندان  

 گؤزه لم   وچوخدا  ضعیف  دئییلم ...

توسباغا   دئدی، هر کَسین  بیر   خوشلوغو وار،   آمما  اینسان  همیشه  اوبیریلرین  گؤزه للیک لرینی  و  اؤز  ایرادلارینی  گؤرور  و  بو  پیس  ایشدی ... .

دووشان ، قوجا  توسباغادان   تشکر  ائلدی  و  اوینویا – اوینویا    اوزاخلاشدی ... .

آیی و سیچانین ناغیلی

بیرآیی راحاتجا یاتمیشدی.

اوْ، اوزانیب ایستراحت ائدرکن  بیرسیچان گزه - گزه  گلیب اوستونه  چیخدی .

آیی یوخودان  اویاندی .

اَل آتیب سیچانی توتدو .

سیچان آیی یا  یالواری  بدئدی :

- سن گَل منی بوراخ، یئری دوشنده منده عوضینی  چیخارام .

آیی گوله - گوله دئدی :

- سن منه‌ نه یاخشیلیق ائده بیلرسن؟

سونرا اوُ، سیچانی  بوراخدی .

بیر اوْوچو (شکارچی ) مئشه ده  تور  قورموشدو .

آیی همین تورا  دوشدو .

نه قدر  اَللشدی سه ده   توردان  خیلاص  اولا بیلمدی .

آیی نعره  چکیب فغان  ائتدی .

گؤزلرینین یاشی سئل کیمی  آخدی  واونون  توردان  خیلاص  اولماغا  هئچ بیر  اومیدی یوخ ایدی .

سیچان آیینین آه - ناله سینی  ائشیتدی .

بیلدی کی،آیی تله یه دوشوب .

اوْ، تئز اؤزونو  اورایا   چاتدیردی .

گلیب  ایتی  دیشلری ایله  تورو   کسدی .

آیینی  خیلاص  ائتدی .

آیی  دئدی : قالمیشدیم  قمده،یاخشیلیق  ایتمزایمیش  عالم‌ده .