قیز دؤروب ائولرینه گلدی. بیر ایكی گونن سورا پادشاهین بویوك اؤغلونین تویوردو، هامینی چاغیرمیشدیلار فاطمانین آنالیقی دا كئچل قیزینی گئیین دیریب تویا گئدیردی، گویچك فاطما دا آنالیقینا یالوار یاخار ائله دی كی تویا اؤنو دا آپارسینلار. آنالیقی قؤیمادی كی قؤیمادی، دئدی بیرجه سنین یئرین اكسیك دی اؤتو یئرینده، سنین پالتارین نه گه زیر كی گئیینیب گئدسن. آنالیق بیر چاناغ داری نی یئره تؤكوب بیر بوش جام دا گؤیدو دئدی: من گله نه كیمین بو دارینی یغارسان چاناغا، بو جامی دا گؤز یاشیننان دولدورارسان اگر دئدیك لریمی ائله مه سن وار سنین گؤنونه. فاطما قالدی مات معطل كی نه ایله سین. آنالیقی گئدن كیمین كور پشمان دابان آلیب گلدی قارینین یانینا و آنالیقی تاپشیردیغی ایشلری اؤنا دئدی. قاری دئدی قیزیم قؤرخما بو ایشلر منیم الیمده سو ایچیمی كیمی بیر شئی دی. قاری قیزا بیر چاناغ داری وئردی بیر چاناغ دا دوزلو شور سو، دئدی آپار بودارینی تؤك آنایقین داری چاناغینا دوزلو سویودا تؤك جاما، ائله بیلسین كی آغلیبسان گؤزونون یاشی دی. قالدی یئره تؤكولن داری لار، تویوق جوجه لری بیراخ دارینی دننئیب گؤرتارسینلار. قاری بو سوزلری قیزا دئینن سؤرا اؤنو گؤتوروب گلدی اینكین سؤموگونین باشینا. قؤیونون آغزین آچیب دئدی ای قارا اینك سنن بیر قشنگ پادشاهانه لباس، بیرده بیر قیزیل باشماق ایستیره م كی فاطما گئینیب گئدسین تویا. اؤساعات بیرده ن گؤردو كی بو شئی لر حاضر اؤلدولار. قاری قیزا بیر تؤربا كشمش بیر تؤربا دا كؤل وئریب دئدی قیزیم بو پالتارلاری ، قیزیل باشماقی گیریب تؤربالاری گؤتوروب گئدرسن تویا، اؤردا سنی آنالیقین تانیمایاجاق. تویدا سنی اؤیناداجاقلار سن اؤینویاندا جماعتین اؤستونه كشمش دؤكرسن آنالیقین اؤستونه كؤل. سؤرا تئز قایدیب گلرسن اؤ پالتارلاری سؤیونوب اؤتوراسان. فاطما زر زیباینان دیكیلمیش پالتاری گئیب ، قیزیل باشماقی ایاغینا تاخیب دؤندو حوری ملكه. گئدی تویا هامی بو گؤزلیك ده قیزا مات قالدی. فاطما اؤینویا اؤینویا آداملارین قاباقینا گئدیك جه هامینین قاباقینا كشمش دؤكوب آنالیقین گؤزونه كؤل سپدی. سؤرا چیخیب تئز قایدی ائوه. یولدا چایدان آتیلیب گئچن ده باشماقینین بیر تایی ایاقیننان چیخیب دؤشدو سویا، تلسدیقینن باشماقی گؤیدو قاشدی. همین گؤن دئمه پادشاهین اؤغلو چیخیب شكارا، قاییدان باش یولدا آتینی چایدا سؤوارماقا گتیرمیشدی آت دؤداقینی سویا وؤروب دالا گئدی. پادشاهین اؤغلو ایلیب سویا باخدی گؤردو كی سودا بیر تای قیزیل باشماق وار تئزچیخاردیب گتیردی. بو طرف دن فاطما گلیب پالتارینی سؤیونوب گیزلدی. آنالیقی قاش قاباقلی گلدی ائوه. فاطما دئدی آنا دئیله گؤروم تویدا نئجه اؤلدو نئجه كشدی؟ آرواد دئدی هئچ، بیری اؤینویاندا هامینین قاباقینا كشمش دؤكدو بیزیم قاباقیمیزا كؤل آتدی.

بولار بوردا قالسین، پادشاهین اؤغلو باشماقی نئیله دی؟ باشماق اؤ قه در قشنگی دی كی پادشاهین خزانه سین ده بئله سی یوخودور. پادشاهین اؤغلو باشماقی اؤز له له سینه وئریب دئدی: آپارین بو باشماقی شهر به شهر، كند به كند آختارین هانسی قیزین ایاقینا اؤلسا گره ك اؤنو آلام. له له هر یئری گزدی كندلری شهرلری ایاق به ایاق ائله دی بو باشماق هئچ كیمین ایاقینا اؤلمادی. آخیردا خبر آلدیلار كی بو باشماقی ایاقینا تاخمامیش كیم قالدی؟ دئدیلر كی بیرجه فاطما آدلی بیر یتیم قیز وار اؤ قالیب. گتیریب باشماقی فاطمانین ایاقینا گئیدیردیلر، گؤیدولر كی ائیله بیل باشماق چی اؤز اللرینن دیكیب. اؤ ساعات پادشاهین اؤغلونا خبر آپاردیلار كی باشماق فیلان قیزین ایاقینا اؤلدو. اؤغلان توی تداركی قؤروب فاطمانی گلین گتیر مك ایچین اؤز آدام لارینی گؤندردی كی قیزین باشینی بزه سین لر. بو طرف ده فاطمانین آنالیقی پاخیلیقیننان آز قالدی چاتلاسین. اؤ اولدو كی فاطمانین ال ایاغینی كندیرینن باغلایب سال دی تندیره، اؤستون ده اؤرتدو. قیزی كئچل فاطمانی دا بزندیریب گؤیدو گویچك فاطمانین یئرینده. ینگه لر، ساغ دوشلار ، سؤل دوشلار گلدیلر كی قیزین باشینی بزییب گلین آپارسینلارگؤردولر كی قیز اؤ قیز دئییل. دئدیلر آی بالا بو قیز نیه بئله قارالیب؟ قیزین آناسی دئدی ائله همین گویچك فاطما دی، اؤ گونون قاباقیندا دؤروب گون قارالدیب. ینگه تئز باشماقی گتیریب قیزین ایاقینا تاخدی گؤردو كی اؤلمادی اؤز اؤزونه فیكرلشدی كی بو قیز من گؤردوگوم قیز دئییل كی، بونو آپارساخ پادشاهین اؤغلو نه دئیر، ائله بو فیكر دیدی كی گؤردو كوچه دن اوشاخلار اوخویولار«گون چیخ – گون چیخ كهر آتی مین چیخ، كئچل قیزی ائوده گؤی، ساچلی قیزی گؤتور قاچ». ینگه قیزین تئز باشینا باخیب گؤردو قیز كئچل دی. تئز دوردو كی گئدیب احوالاتی اؤغلانا دئسین، بیر دن بیر خؤروز باشلادی باناماغا« قوقولو قوقو فاطما خانیم تندیرده الی ایاقی كندیرده ». ینگه گلیب تئز تندیرین آغزین آچدی و گؤردو دؤورودان دا فاطمانین الی ایاقینی باغلیب تندیره سالیب لار، قیزی چیخاردیب گتیردیلر ائوه. یتمیش یئردن اؤنا بزه ك – دؤزه ك وئریب گئیندیریب آپاردیلار پادشاهین اؤغلونا. هامی اؤیدا چالیر اوینویور شادلیك ائلییردی، كئچل فاطمانین آناسی قان آغلییردی.

آرادان بیر مدت گئچنن سؤرا كئچل فاطمانین آناسی دئدی: قیزیم اؤلان اؤلوب كئچن كئچیب بیر دؤر گئد گؤر باجین نه ائلییر. كئچل فاطما گئیینیب گئدی باجی سینین یانینا، خوش بش اؤنبش دن سؤرا دئدی: آی باجی یامان چیمك ایستیره م دور گئده ك دریا كناریندا چیمه ك. گویچك فاطما باجی سینین خاطرینی سیندیرمیب اؤز قیزیل تشتینی ده گؤتوروب گئدی دریا كنارینا. كئچل فاطما دئدی آی باجی اول سن سؤیون من سنی چیمیزدیریم سؤرا سن منی چیمیزدیررسن. فاطما سؤزه اینانیب سؤیوندو دریانین قیراغیندا چیممك ایسته دی كئچل فاطما اؤنو ایته لیب سویون ده رین یئرینه سالدی، گویچك فاطما سودان چیخا بیلمه دی. كئچل قیز فاطمانین پالتارینی گئیب اؤغلانین ائوینه گلدی. آخشام اولدو قیز اؤزونو گیزله ددی، بیر جوره گئجه نی سالدی. یاتماك وقتی گلنده اؤغلان گؤردو كی فاطمانین ساچی هئچ الینه ده رمیر. آی فاطما سنین ساچین هئچ گؤزومه ده رمیر؟ قیز دئدی: باشیمی یوموشام دئیه یغیشیب بیر یئره، صاباح یئل وورار اؤزانار. صاباح آچیلدی اؤغلان آتینا مینیب دریانین كنارینا گئدیردی بیرده ن گؤردو كی بیر بالیقچی تؤرو نه قه ده ر چئكیرسه سودان چیخارا بیلمیر. اؤغلان آت دان تؤشوب بالیقچیا كمك ائله دی بیر جوره تؤرو چئكیب سودان چیخاردیلار. بیرده گؤردولر كی تؤرا بیر بالیق تؤشوب اژدها بؤیوندا. تئز بالیقین قارنین یاردیلار، اؤغلان گؤردو كی فاطما بالیقین قارنیندا. تئز قیزی چیخاردیب بیر شئیه بؤكوب ائوه گتیردی. فاطما باشینا گله ن احوالاتی باشدان ایاقا ارینه دئدی. اؤغلان اؤ ساعات امر ائله دی كی بیر ده لی قاطیر گتیرسین لر كئچل فاطمانی قاطیرین قویروقنا باغلییب داغدا داشدا سؤردولر. كئچل فاطمانین هر تیكه سی بیر ده ره ده قالدی. سؤرا گویچك فاطماینان پادشاهین اؤغلو كئیف چئكیب دؤوران كئچیر دیلر.