آداخلی لار
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
هاممی یاتیب گئجه كورسو توووندا
آداخلی قیز آداخلی سی هاییندا
وعده لری هامی یاتاندان سورا
اوتایدا اوت آنباری
كیمی یوخو آپاری
اوره گلری نه چالی
باش كسیلمیش غاز تایی.
آتاسینین خورولتوسو اوجالدی
آناسیدا قولون یانینا سالدی
خیرده باجی قارداشی یورغان آلدی.
سوندو چیراق آچیق گوزلر قارالدی
دامدا پیشیك گوزلری تئز پارالدی
آداخلی قیز اوره گی تئز آتلاندی
یاتمادی یئرده ن دوردی
یاواشجا قاپی آچدی
ایت هوردو قیز سوز آلدی
آنبار ساری یوللاندی
نفت چیراغی چیریلداییب یانیردی
آداخلی لار بیر-بیرینه باخیردی
اوتایدان قورد اولوردو
دام اوسته ن ایت هوروردو
اوغلان اوتانجاق یار الین توتوبدو
باش اندیریب اونون الین سیخیبدی
گله جكده ن دانیشیبلار اولار چوخ
ایسته دیلر بیر-بیرینه یاپیشسینلار بیر آز چوخ
قوجاقلاشیب بیر-بیرلرین سیخدیلر
اوچون اوپوب دوردومجو دیشله دیلر
بیرده ن بیر سس گلدی كوپه گین قیزی
هارا گئدیبسه ن بو گئجه قیزغینی
قیز دئدی ای وای نئجه اولدوم یازیق
بیلدی آتام من بئنوا من یازیق
كول باشووا آی عاشیق
گورسه بیزی چیخادار منده ن چاریق
بسدی دا سن اوزومو ائتدون یاریق
ایسته ییسه ن سن چاپیق.
چوخ تله سیب ایسته دی دوروب گئده
یالواریر اوغلان هله گل باخ سؤزه
قوی گئده بوردان سورا سن چیخگینه ن
گزیب سنی تاپمییه جئك چوخ
های هارای سالمییه جئك
نئجه گئدیب اوندان سورا سنده گیزلین گئدگینه ن
قیز دئییری گلسه بورا نئیلی یه ك
هئی اؤپوراوغلان اوره گی سیخمییه ك
آداخلی لار گؤردو گلیر اویانا
ایندی گؤرسه اولار قانین آخیدا
تئز كئچیرتدیلر چیراغی بیلمییه
توكدولر اوسله رینه اوت گؤرمییه
یاپیشدیلار بیرـبیرینه اوت آلتدا
باخان دییه ر اوزه رلیكدی اود اوسته
قیز آتاسی چوخلو گزیب گؤرمه دی
ائوه گئدیب اؤز آروادین سیلكه دی
اوغلان تئزجه نفت چیراغین یاندیریب
خومار گؤزلر بیرـبیرینه سئوگی سؤزون قاندیریب
نئجه ساریشار آغاجا سارماشیق
اوجور ساریشدی قیزه اوغلان عاشیق
اؤپدو اوزون سوردو قیزده ن شوخ ممه
سیخدی بئلین ایسته دی گئتسین قیچه
قیزده قوجاقلاییب اونو اؤپوری
سورته لئییر قول قیچینی دویموری
آج قورد تكین ال قاتیبلار جانلارا
گؤرگیله سن عشقه كسه ر وار هارا
قیزغینجا ایسته دیله ر بیر ....
اوجا سس:
اودلانیبدیر اوت آنباریم یاردیم ائدین قونشولاریم
ایكیسی باخدی دالا هانی چیراق
اودلانیب آنبار اود ایچینده دوراق
گل گؤزه لیم گل تاپگینان یول قاچاق
یاخچی چاغدیر گئدمه گه یون باشلییاك
اوغلان اؤپدو دئدی دا ایش بوشلییاك
قونشولاری های ـ هارایا گلدیلر
اود سؤندوره لر چوخو سو گتدیلر
آداخلی لار قاچماغا یول تاپمادی
اود بورویوب اوسله رینی ساخلادی
آچدی اوغلان قوجاغینی یارینا
باسدی اونو اوره گینه باغرینا
چوخ چالیشدی یارین اوددان قورتارا
اوچدو دامین اوستو هانی یول قاچا
قوجاقلاشیب اود ایچینده قالدیلار
پروانه تك ایكی گؤزه ل یاندیلار
قیزآتاسی اوت آنبارین هاییندا
كیمسه بیلمیر آداخلی لار هایاندا
ایش تله سیك چوخو یوخودان دوروب
سو یئرینه نفت گؤتوروب یومولوب
های ـ هارایا آرواد اوشاق توكولوب
قیز آتاسی آنبارا یوخون گئدیب
هئی ووروری باشا چیغیریر یازیق
یاندی اوت ـ آنبار نئجه اولدوم یازیق
بیر اوجا سس:
وای تئز اولون اولدو كول
كیمسه اود اوسته بیر گالون سو توكور
اود آلاوو بیرده ن گؤیه باش چكیر
سودو بو نفت
چوخسیلارین اته گینی اود توتور
قیز آتاسی قیزغین اود ایچره یانیر
اولدو تفت
باش قولاغ اولدو قابار
جان واری اؤلمه ز قالار
یاندی كوله دؤندو دامین وار یوخو
قونشولاردان یارالی سی وار چوخو
آداخلی لاردان كی خبر اولمادی
اوغلان ائوی قیز آناسی آغلادی
اوخشامالار اوره گلری داغلادی
یارین ایشیقلاندی هاوا گون چیخیر
نئچه نفر یانان دامنان كول ییغیر
قوزادیلار آواری بیرده ن گوجه
گؤردیلر آلتیندا یاتیب گؤز ـ گؤزه
ایكی مارال قول بویون اولموشدولار
یانار اود ایچره كوله دؤنموشدیلر
كؤكسیلرین گؤردیله صافدیر اینان
هانسی اود وار عشق اودونو یاندیران
عشقه قایناق اوره گدیر
اوره گسیز كیم دبه گدیر
گؤرجه ك اونو:
كندین اهلی باشا ووروب آغلادی
چوخسو هوشده ن گئدیب آغنادی
باش یولوندو اوز جیریلدی
كوللر باشا سپیلدی
قویلادیلار او ایكیسین او حالدا
آنبار اولذو عشقه مزار نه هایدا
سنین قلبین آنباردان اسگیگ اولماز
عشق یولونا دوشسون اوره گ یورولماز
اولماسا طاقت گله سه ن بو یولا
تؤكمه سن داش عاشیق اولان یولونا
یاردیم ائت عاشیق یئتیشه معشوقا
اولسا دوشه شعشعه سی جانووا
قارشی دوروب عشقه اؤزون كورلاما
عاشیق اولان اوره گی سن لاخلاما
سو آخاری توپراغی داشی یارار
عشق آخاری بو سورتوشگه ندیر قانار؟
دوردوقجا باسیب یارار
الست گونو عشقی بیزه یازیبدیر
عشق ایله بو اوره گیمیز آلیبدیر
عشق اوجاغی آلاو چكیر اودلانیر
كیمسه گیره عشق یولونا یوللانیر
دونیا بوتون بورونوب عشق اودونا
كیمسه ده گؤز اولسا ییخیلیب اونا
عاشیق اولان عشق اودونا یاناجئك
سئوگیسیز اینسان قارا گون تاپاجئك
هاممی دردین درمانی عشقین اودو
بیرجه گونده سنده سیناج ائت اونو
سالما باشا عشقه قارشی دوراسان
عشق اودو چكسه آلاو اودلاناسان
كیمسه ایسته ر سؤندوره عشقین اودون
اودلاناجئك عشقه اولاجئك اودون
جمال حق دوزگون عشقین مظهری
اوز چئویر حقه سنه بیل نور گلی(وئری)
عشق ائدئنئ سالسین اؤزئ جانووا
عشق آپارسین سنی مقامووا
