علی اكبر(ع) مرثیه‌سی
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
قوْشار: انور اردبیلی
علی سواره گئدیبسه‌ن، ولی پیاده گلیبسـه‌ن
اوْیان گؤرۆم ندی دردون، نییه عباده گلیبسه‌ن
عبانی ردّ ائله یۆزده‌ن اوْ شمع-ی-حُسنی آلێشدێر
یامان گۆنۆمدۆ بیلیرسن، بۇ بینوانی دانێشدێر
یاروْندا واردێ اذیّت و یاكی چوْخ یوْرۇلۇبسان
یقین بۇ قدّ-ی-رسایه دگیبدیر اوْخ یوْرۇلۇبسان
آیاق طرفده اوْتۇردۇم تصوّر ائتمه یادام من
بۇ قانلێ چكمه‌لریوی گره‌ك اؤزۆم چێخادام من
سینه‌مین اۆسته قوْیام من بۇ قانه باتمێش آیاغۇن
دانێشدێرام سنی بلكه اؤپه‌م اوْ قانلێ دوْداغۇن
اۇتانێرام علی اكبر! آتام عبانی یۆزۆنده‌ن
بۇ قاره معجریمله‌ن سالام اوْ قانێ گؤزۆنده‌ن
گره‌ك آیاق طرفونده اوْلا بۇ قلب-ی-شیكسته
بی‌بی‌لرون باخێر آخَر نئجه گلیم باشۇن اۆسته
كنیزدور بۇ مكاندان آنوْن نه عُذریله دۇرسۇن
كنیزلر گره‌ك اوْغلۇم آیاق طرفده اوْتۇرسۇن
تعجبم بۇ غمون قلبیمه شراره تؤكۆبدۆر
آتوْن بۇ قدّ-ی-رسانی نییه عبایه بۆكۆدۆر؟
بۇ نقشه‌نی بیلیره‌م من، گلیبدی درده چكیبدیر
یارالێ سینوْون اۆسته عبانی پرده چكیبدیر
منی نظرده دۇتۇبدۇر و یا سكینه‌‌ی-ی-زاری
بۇ فكریله‌ن كی مبادا گؤزۆم گؤره یارالارێ
باخێب عباسینه بیلدیم ولی نه قدری یاروْن وار
مگر سنین بدنونده سلامت عضو هاروْن وار
بۇ نوعیله‌ن كی آخان قان، ائده‌ر بۇ توْپراغێ گۆلنار
بئیله مشخّص اوْلۇر كی منیم ائویمی یێخێبلار
بلا تموج ائدیب گؤر گلیب هایانا چاتێبدێر
یقین سنی گتیره‌نده، آتوْندا قانه باتێدێر
یارالانێبسان ائشیتدیم غم-وْ-ملالیله گلدیم
اؤزۆمده بیلمیره‌م من، بۇرا نه حالیله گلدیم
قانادێ باغلێ اوْلان، قۇش كیمی بۇ یئرده سێخێلدێم
یوْل اۆسته بیر نئچه دفعه بۇرا گلینجه یێخێلدێم
قارا ساچێم كیمی دونیا اوْلۇبدۇ تیره گؤزۆمده
بی‌بی‌لرون منی گتدی یوْخۇدۇ طاقت اؤزۆمده
تعجب ائیلیره‌م ای نژاد-ی-هاشمه فاخر
گلیب بۇرا نئجه چاتدێم نییه من اؤلمه‌دیم آخر
یانێر اۆره‌ك علی دۇر گؤر بۇ دربه‌در نییه آغلار
جاوان اوْغۇللار آنانێ مگر بۇ نحویله یوْخلار
یۇخۇدۇ من گؤرۆره‌م یا كی آشكاریدیر اكبر
عبا ایچینده كی سن‌سن بۇ حالیله‌ن گتدیله‌ر
سنی نه حالیله سالدێم یوْلا مینایه گئده‌نده
عبا ایچنده گلیبسه‌ن ولی خیامه گله‌نده
قێزارمێسان گـۆلـه یاقـوتا اوْخشۇسـان نئجـه گـؤرسن
باخان دییه‌ر توْی ائدیبسه‌ن لیباس-ی-توْی گئیینیبسه‌ن
قۇتارمێیان غم-وْ-دردیم سؤزۆم بۇقلبیده واردێ
جنازه‌وه یئتیشینجه‌ك اینان كی زۆلفۆم آغاردێ
قاباغۇوا منی عفو ائت گله‌نده گلمه‌دیم اكبر
حرمسراده اوْتۇردۇم اۆزۆمۆ بیلمه‌دیم اكبر
فدا اوْ گؤزلره لیلا، اوْیان اوْیان نه یاتێبسان
من-ی-فلك زده‌نی اوْلما خاطرونده‌ن آتێبسان
گؤزۆم عُذاریمه قان‌یاش تؤكه مجاز ائیلئیورسن
سسیم قۇلاقیوه یئتمیر و یاكی ناز ائیلئیورسن
اِراده هر یانا ائتسوْن گلیب دالۇنجا سۆرۆننه‌م
توْیۇن گؤره‌نمه‌دیم امما لیباس-ی-قاره بۆرۆننه‌م
یوْخۇمدۇ چاره بۇ یئرده پناه صبره آپاررام
كئچیبدی نیسگیلون حدّه‌ن،اۆره‌گده قبره آپاررام
یازاندا مُحنتون «انور» گله‌ر تموجه دردی
بیلیر علی باشۇن اۆسته آنوْن نه نوعی مله‌ردی
ای حسینین دوْغرانان قۇربانێ، اكبر آچ گؤزۆن
سالمـا گـؤزده‌ن بینـوا لیـلانـی، اكبـر آچ گؤزۆن
عؤمرۆم اوْلسا هر قده‌ر من آغلارام صبح-وْ-مساء
لیلینی بیر درده سالدۇن ای شبیه-ی-مصطفیٰ
درد-ی-جسمانی دگیل تاپسێن طبابَتله‌ن شفا
بیر طبیب ایسته‌ر اوْلا روحانی، اكبر آچ گؤزۆن
ای نــژاد-ی-هــاشمیـده نــورس-وْ-رعنــا قــَدیـم
ائیله فكر ائتمه كی گلدۇن، خئیمییه من بیلمه‌دیم
گلمه‌گۆن بیلدیم ولی عذریم وارێدێ گلمه‌دیم
عفو ائله بۇ خانیمان ویرانی، اكبر آچ گؤزۆن
پاییـن-ی-پایـونـده اگلــه‌شـدیم مـن ای نورستـه گـۆل
چون حیا مانعدی باشۇن اۆسته گئچسه‌م خوْش دگیل
لاعلاجم سؤیلـه لیـلا باشینه تؤكسۆن نـه كـۆل
گؤرمه‌ره‌م اوْل صورت-ی-تابانی، اكبر آچ گؤزۆن
آتش-ی-قلبیمه وۇرمۇش داغ-ی-هئجرانون اتك{؟}
یاندێ قلبیم بۇ یانار اوْددان منی بیر یانه چك
توْی ائدیبسه‌ن، خلعتیم بس هانێ، اكبر آچ گؤزۆن
حقّی واردۇر لیلی‌نین گؤزده‌ن تؤكه خون-ی-جیگر
من سنی مئیدانه بۇ نوعی یوْلا سالدێم مگر
باشۇن اۆسته آچماسئیدی باشێنێ عمّه‌وْن اگر
زۆلفیمله پاك ائده‌ردیم قانێ اكبر آچ گؤزۆن
بیـر كنیــزه‌م بــاوفـــا اكبـــر قبـــول ائتسـوْن منــی
سن بیلیرسن كی نه قدری ایستئییر قلبیم سنی
قلبیمین بـاشینـه ضـم ائتـدیم بـۇ قانلێ چكمه‌نی
تاكـی شـدّت ائتمــه‌سیـن جریانـی اكبر آچ گؤزۆن
قانلێ گؤزیاشێم سارالمێش روی‌یمی وئرمیش سئله
قلبیمی سێندێرما ائتمه نااۇمود اوْغلۇم بئله
خواهیشیم واردۇر عبانی گۆل یۆزۆنده‌ن ردّ ائله
بیر منه گؤسته‌ر رُخ-ی-زیبانی اكبر آچ گؤزۆن
ای جمال-ی-عالـم آراسـێ اوْلان شمــع-ی-ارم
یاره‌وه قان پرده چكمیش قوْیمئیۇر حدّین بیلـه‌م
بیـر عبــادور رؤیتـا" قێـرمێـز وجـودون گؤرمه‌ره‌م
گیزله‌دیبدیـر دوْغـرانان اعضـانـی اكبر آچ گؤزۆن
برگ تك قلبیم اسیر، هئجرونده اوْلمۇش قان اوْغۇل
گۆل یۆزۆن گؤسته‌ر آنوْندان ائیله‌مه پئنهان اوْغۇل
گلسه شهزاده سفرده‌ن ذبح اوْلار قۇربان اوْغۇل
ائیله قۇربان جانیوه بۇ جانی، اكبر آچ گؤزۆن
ثبت ائده‌ر «انور» سنین درد-وْ-ملالون دفتره
توشه تا اخذ ائیله‌سین دار-ی-فناده‌ن محشره
زایر اوْلسۇن ایسته‌ر بیرده مزار-ی-انوره
اوْردادۇر چون دردینین درمانی، اكبر آچ گؤزۆن
حضرت سیّدالشُهداء (ع)ین مناجاتی اۇلۇ تانرێ‌یا
********************************************************
قوْشار: سیّد رضا صرّاف تبریزی
دۇتمۇشام جان نقدین الـده وصـل-ی-جـانان ایستـه‌ره‌م
تئشنه جان وئرره‌م مینای-ی-عئشقیده جان ایستـه‌ره‌م
دم به دم ائیلـه‌ر تجـلّا پــرتــوی-ی-انــوار-ی-ذات
اوْلمارام موسی كیمی بیر جئلوه ایله محو-وْ-مات
خضــر تــك بــۇ عصـریــده آختــارمارام آب-ی-حیات
تئشنه‌ی-ی-وصلم كؤنۆل جامین دوْلۇ قان ایسته‌ره‌م
تشت-ی-زر ایچره قێزێل قانێم آخار «یحیــی» كیمــی
كــربــلا مئیــدانــی دوْلمــۇش قـانیلـه‌ن دریا كیمــی
زیـنبیــم اوْلســۇن پریشــان خاطـر-ی-لیلا كیمــی
پای-ی-بند-ی-زۆلف اكبردیر، پریشان ایسته‌ره‌م
طایر-ی-اوج-ی-وفایم، شهپریم تیر-ی-جفا
ائیلـه‌ره‌م روز-ی-ازلـده ائتـدیگیــم عهـده وفا
بۇ لب-ی-عطشانیلـه‌ن اوْللام ذبیحـا" مـن قفا
خنجر-ی-قاتل دمینده‌ن آب-ی-حیوان ایسته‌ره‌م
گۆلشن-ی-جیسمیمده زخم-ی-تیر آچێلمێش گۆل كیمی
هر طرف پئیكان دۆزۆلمۆش سینه‌مه سۆنبۆل كیمی
ایستـه‌ره‌م گلسیـن سكینه‌م نالییه بۆلبـۆل كیمی
قتلگه گۆلزارینه مرغ-ی-خوْش الحان ایسته‌ره‌م
مین بلایه مُبتلا اوْلسام اگر ایّوب تك
ائیله‌ره‌م صبر، ائتمه‌ره‌م شور-وْ-نوا یعقوب تك
دم به دم، ساعت به ساعت، عاشئق-ی-مجذوب تك
بیــر بلایــه وئــرمــه‌گــه شــوقیلــه منی جان ایسته‌ره‌م
كسـب ائـدیـب مئـرآت-ی-انــوار-ی-محبّتلــه‌ن جــــلا
اوْلـمۇشــام سرمسـت-ی-جــام-ی-«البـلاءُ لِلـوِلا»
بــزم-ی-وحــدت‌دیر منه بۇ سرزمین-ی-كـربلا
ترك-ی-كثرت ائتمه‌گه، بیر نوك-ی-پئیكان ایسته‌ره‌م
بیر طرفده كاكُل-ی-اكبر بوْیانمێش قانیله
بیر طرفده اصغریم سیراب اوْلۇب پئیكانیله
بیر طرف جان وئردی عبّاسیم لب-ی-عطشانیله
بیر طرف اؤز جیسمیمی خاكیله یئكسان ایسته‌ره‌م
جئلوه‌گاه-ی-محضرینده ائیله‌ره‌م سعی-وْ-صفا
خئیمه‌گه میقات-وْ-مَشعر، قتلگه كوه-ی-مِنا
ایسته‌ره‌م بیر اكبر-وْ-عبداللّهیم اوْلسۇن فدا
بۇ بلا دشتینده یئتمیش ایكی قۇربان ایسته‌ره‌م
شعله‌ی-ی-نار-ی-محبّتله دوْلۇب كانون-ی-دل
وادی-ی-حئیره‌تده لیلا آختارێر مجنون-ی-دل
مجلیسیم خلوت، گؤزۆم یاشلێ، شرابیم خون-ی-دل
گلمه‌گه بۇ بزمه بیر تازه مسلمان ایسته‌ره‌م
بیر یئتیش فریادیمه، ای پادشاه-ی-كم سِپَه
زورق-ی-جیسمیم اوْلۇب مستغرق-ی-بحر-ی-گُنَه
گرچی صرّافم ذلیلم روسییاهم
عرصه‌ی-ی-محشرده سنده‌ن الده فرمان ایسته‌ره‌م
****************************************************************
****************************************************************
قوْشار: نادری
باجێ جان شرار-ی-غمده اۆره‌ك اوْدلانێبدێ تئز گـل
الیم اۆسته شیرخواریم، سۇسۇز اوْخلانێبدێ تئز گل
گله‌بیلمیره‌م خیامه، اۆره‌گیمده یوْخدۇ طاقت
گل اؤزۆن آپار بالامێ، منه ائیله بیر حمایت
بوْغازێن بیچیبدی پئیكان، اوْلا جیسمی بلكه راحت
منه راه-ی-چاره بۇردا باجێ باغلانێبدێ تئز گل
باخێرام بۇ طئفل-ی-زاره، اۆره‌گیم دؤنۆر كبابه
یوْلا گؤز تیكیب آناسێ، دۆشۆب ایندی اضطرابه
گل آپار بۇ طئفلی زینب وئر اوْ ناتوان ربابه
الیم اۆسته جان وئره‌نده، جیگریم یانێبدێ تئز گل
من آپاردێم اصغریمه سۇ آلام كی راحت اوْلسۇن
منی ائتدیله‌ر خجالت اوْخ آتان خجالت اوْلسۇن
گل آپار خیامه طئفلی، تزه بیر قیامت اوْلسۇن
بوْیانێبدێ ال قوْمادێ، قانا ایسلانێبدێ تئز گل
باجێ حرمله كمانه قوْیۇب اؤز اوْخۇن آتاندا
آتا قانێنێ بالانێن، قانێنا اوْ اوْخ قاتاندا
منه تار اوْلۇبدۇ دونیا، اێشێق اۇلدۇزۇم باتاندا
گینه سینه‌ی-ی-امامت، باجێ داغلانێبدێ تئز گل
سوْلۇ هانسێ باغبانێن گۆلۆ غۆنچه چاغێ من تك؟
كیمین اوْخلانێب ال اۆسته بئله سۆد اۇشاغێ من تك؟
باجێ هانسێ پادشَهدور،پوْزۇلا تیفاقی من تك؟
منه اوْدلۇ بیر مصیبت، تزه باشلانێبدێ تئز گل
بۆرۆیۆبدۆ جهل-وْ-ظۆلمت، باجێ بۇ سپاه-ی-شامی
بیر ایچیم سۇ اۆسته بۇنلار، منیم اوْخلادێ بالامێ
بۇ قوْشۇن نه دین تانێرلار، نه پئیمبر امامی
زر-وْ-سیمه بۇ جماعت، عجب آللانێبدێ تئز گل
سؤزۆ نادری تمام ائت، یانار الده ایندی خامه
نه حیاسیز اوْلدۇ امّت، سۇیۇ وئرمه‌دی امامه
دؤنه قانه بۇ فراتی گله لعنت اهل-ی-شامه
كرم ائت امام-ی-قائم، حق آیاخلانێبدێ تئز گل
صراف دان ایكی نوحه حضرت علی اكبره (ع) گؤره
یارالاندێم ای شه-ی-كربـلا
اؤلـۆره‌م هـراییمـه گـل بابا
اوْ گلـه‌ن قــدم‌لــریـوه فــدا
اؤلۆره‌م هـراییمـه گــل بابا
***
ای گـۆل كیمـی قانــه باتـان
اكبریم اوْیان، یاوه‌ریـم اوْیـان
قــان ایچــره نــازیـلـه یـاتـان
اكبریم اوْیـان، یاوه‌ریـم اوْیـان
حضرت علی اكبر (ع) استمدادی
**************************************************************
***************************************************************
قوْشار: صرّاف
یارالاندێم ای شه-ی-كربـلا
اؤلـۆره‌م هـراییمـه گـل بابا
اوْ گلـه‌ن قــدم‌لــریـوه فــدا
اؤلۆره‌م هـراییمـه گــل بابا
یئتیشیب وجودیمه اوْخ زبس
داغێلێبدێ سینه باتێب نفس
بۇ نفسده وئر منه بیرجه سس
اؤلۆره‌م هـراییمـه گــل بابا
سنه چون یئتیب چوْخ اذیّتیم
اوْدۇ چـوْخ وارێمدێ خجـالتیـم
بـــۇدۇر اوّل آخــــر زحـمتیــم
اؤلۆره‌م هـراییمـه گــل بابا
منی قصد ائدیبدی گلیر اجل
بۇدۇ فكری درك ائده ال به ال
اوْ گلینجه سن باشێم اۆسته گل
اؤلۆره‌م هـراییمـه گــل بابا
بۇ گۆن ایستی‌سی بۇ جیگرده سوز
عطشیم دمادم ائده‌ر بروز
بدنیم یارالێ اؤزۆم سۇسۇز
اؤلۆره‌م هـراییمـه گــل بابا
بابا وِردی ذكریم اوْلۇب «تَعال»
منی گل بۇ حالیده یاده سال
باشێمێ گؤتۆر دیزین اۆسته آل
اؤلۆره‌م هـراییمـه گــل بابا
بده‌نیم یارالارێ قان وئریر
بۇ قان اؤزگه حالی نیشان وئریر
بابا گل گؤر اوْغلۇوۇ جان وئریر
اؤلۆره‌م هـراییمـه گــل بابا
بــابـا ائیلــه اكـبـــریـــوه كــــرم
یوْلا گؤز تیكیب سنی گؤزله‌ره‌م
باشێم اۆسته گلمه‌سن اؤلمه‌ره‌م
اؤلۆره‌م هـراییمـه گــل بابا
گؤرۆب اهل-ی-كین بابا تك منی
یێخێب آتدان اؤلدۆره‌جك منی
گل آماندێ كؤلگییه چك منی
اؤلۆره‌م هـراییمـه گــل بابا
بۇ حسین عزاسی‌دی یاز رضا
اؤزۆ بئیته بئیت وئریر جزا
بۇ سؤزۆ دوباره دئ دۇت عزا
اؤلۆره‌م هـراییمـه گــل بابا
جناب علی‌اكبره آتاسێ دیلیجه نوحه
قوْشار: صرّاف
ای گـۆل كیمـی قانــه باتـان
اكبریم اوْیان، یاوه‌ریـم اوْیـان
قــان ایچــره نــازیـلـه یـاتـان
اكبریم اوْیـان، یاوه‌ریـم اوْیـان
خئیمه‌لره گلدی سسین
گلدیم اوْلام دادرسین
اؤلمه‌میسه‌ن وار نفسین؟
اكبریم اوْیـان، یاوه‌ریـم اوْیـان
ای كشته‌ی-ی-تیغ-ی-ستم
هئجرین ائدیب قدّیمی خم
گؤزله‌ر یوْلۇن اهل-ی-حرم
اكبریم اوْیـان، یاوه‌ریـم اوْیـان
شام ائتمه لئیلا گۆندۆزۆن
چوْخ منتظر قوْیما گؤزۆن
ایندی هلاك ائیله‌ر اؤزۆن
اكبریم اوْیـان، یاوه‌ریـم اوْیـان
ای سرو-ی-گۆل پیرهنیم
باغ-وْ-بهشت-وْ-چمنیم
سن‌سیز گۆلۆم سوْلدۇ منیم
اكبریم اوْیـان، یاوه‌ریـم اوْیـان
سن منه بیر یوْلداشیدین
آغلار گؤزۆمده یاشیدین
هم اوْغۇل هم قارداشیدین
اكبریم اوْیـان، یاوه‌ریـم اوْیـان
توْپراقلارا قوْیما یۆزۆن
دۇر دئ منه اۆره‌ك سؤزۆن
آچ بیرجه اوْ قانلێ گؤزۆن
اكبریم اوْیـان، یاوه‌ریـم اوْیـان
گلدیم جیگر داغلاماغا
اوْغۇل دئییب آغلاماغا
گؤزلریوی باغلاماغا
اكبریم اوْیـان، یاوه‌ریـم اوْیـان
قالمێش الیم اۆسته الیم
باشه یئتیب چون اَجلیم
صبر ائیله قوْی منده گلیم
اكبریم اوْیـان، یاوه‌ریـم اوْیـان
تیغ-ی-جفا خامه كیمی
جیسمون یازێب نامه كیمی
سنله‌ن وارام شامه كیمی
اكبریم اوْیـان، یاوه‌ریـم اوْیـان
صرّاف-ی-دینار-ی-غمم
نقّاد-ی-نقدی-ی-اَلمم
بۇ سؤزده ثابت قدمم
اكبریم اوْیـان، یاوه‌ریـم اوْیـان
