ایمام حۆسئین(ع)ین شهادتی نوحه‌سی
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
ایمام حۆسئین(ع)ین شهادتی نوحه‌سی
قوْشار: تبریزلی رضا صرّاف
جناب صرّافین بۇ نوحه‌سی كئچمیش نسیلده لاپ تانێنمێش بیر نوحه‌دی و ایندیده چوْخ كندلرده بۇ نوحه‌نی اوْخۇیارلار:
اله دسمال آلێب آغلا
یارالاندێم باجێ زینب
اؤزۆن گل یاره‌می باغلا
یارالاندێم باجێ زینب
كئچه‌ر آهێم اوْخێ داشدان
اۆزۆلـدۆم قوْم-وْ-قارداشـدان
آتام حئیـدر كیمـی باشـدان
یارالاندێم باجێ زینب
آخــار اؤز بـاشینــه قــانێــم
دوْلار بۇ چئشم-ی-گیریانێم
آخــار جانێـم گئـده‌ر جانێـم
یارالاندێم باجێ زینب
اگـه‌رچــه سینــه داغـلارسـان
یارامــێ گؤرســه‌ن آغلارسـان
ولی سن یاخشێ باغلارسان
یارالاندێم باجێ زینب
منـی بیـر اوْوچــۇ زار ائتـدی
غــم-وْ-درده دۇچـار ائتـــدی
وۇرۇب یێخدێ شیكار ائتدی
یارالاندێم باجێ زینب
بۇ یاره پئیك-ی-دلبـه‌ردیــر
دییاره-ی- یـاره رهبـه‌ردیـر
دگیل یاره گـۆل-ی-سردیـر
یارالاندێم باجێ زینب
منی گل سربلنـد ائیلـه
قارا زۆلفۆن پره‌نـد ائیلـه
یارامێ خشكه‌بند ائیله
یارالاندێم باجێ زینب
باشێم ضربَتله‌نه‌ن ساعـه‌ت
وئریب یـۆز اؤزگه بیر حالـه‌ت
دیزیمـده قالمـایێـب طاقـه‌ت
یارالاندێم باجێ زینب
یئتیب‌دیر سینه‌مه چـوْخ اوْخ
ولی بیرجه دییـه‌م اوْخ یــوْخ
بـۇ یـاره‌م كارگـه‌ر‌دیـر چـــوْخ
یارالاندێم باجێ زینب
پئیه‌مبه‌ر گۆلشه‌نی سوْلدێ
عمامــه‌م قانیلـــه‌ن دوْلــدێ
منـه اؤلمـه‌ك یقیـن اوْلــدێ
یارالاندێم باجێ زینب
اوْغۇل یوْخ سسلییـه‌م داده
بـۇ گۆنده یئتسین ایمــداده
خبـــه‌ر وئــر تــــازه دامــاده
یارالاندێم باجێ زینب
اؤلــۆب اعـــوان-وْ-انصــاریـــم
دۆشۆب قوْلسۇز عله‌مداریـم
سـن اوْل یـارێـم هــواداریــم
یارالاندێم باجێ زینب
سكینــه‌م آتـاسێـز قالـدێ
فلــه‌ك آرامێـمــێ آلـــدێ
سنی درد-وْ-غمه سالدێ
یارالاندێم باجێ زینب
دئمــه صرّافـه بــی‌كس‌دیـر
اسیر-ی-نفس-ی-ناكس‌دیر
قبول اوْلسا بۇ سؤز بس‌دیر
یارالاندێم باجێ زینب
