حضرت علی اصغر(ع) آناسێ رباب بالاسێنا اوْخشایێر
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
قوْشار: سید تقی سیفی اردبیلی
اوْخۇیان: حاج سلیم موذن زاده اردبیلی
قاباقجا سید تقی سیفی اردبیلی گؤره دانێشدێق ایندیسه من هله‌لیك سوْن پوْست دا اوْندان بیر گؤزل نوحه، حاج سلیم موذن زاده‌نین ایفاسیلا گتیرره‌م. بۇ نوحه دئمه‌ك ائله بیزیم خالق اوْخشامالارێمێزدێر كی شاعیر اوْلارێ گؤزلجه دۆزۆب و قاباقجا اوْخشاما ترمینه گؤره دانێشاندا بۇلارا اشاره اوْلمۇشدۇ. بۇ شعری اوْخۇیۇب و حاج سلیم‌نین سسیله ائشیده‌نده اوْنۇن لطافت و گؤزللیگین داها آرتێق دۆشۆنمه‌ك اوْلۇر.
بۇ اجرانی دانلود اۆچۆن یازێنێن باش عونوانی اۆستۆنه كلیك ائدین
حضرت علی اصغر(ع) آناسێ رباب بالاسێنا اوْخشایێر:
عؤمرۆم حیـاتیـم عــلــــی
شـور-وْ-نشاطیـم عــلــی
لای‌لای سینـه‌مین گۆلـــۆ
ائللـه‌ریمــه ســؤیگــۆلــۆ*
* سئوگیلی
طرّه‌سی تئل-تئل ایپـه‌ك
دؤشلۆگۆ قانلێ چیچـه‌ك
گئتـدون سـۇوا گلمــه‌دون
مـن اوْلـدۇم قــاره لچــه‌ك
حوسنون یئتیشمه‌ز سانـا
بنــزه‌ر بـوْیـــۇن جـئیــرانــا
هئجرون آلێب جـانیـمــی
قـالـمــێشــام یـانـا-یـانــا
فلـك وفـا یــوْخــلامـاز
غملـی نوا ساخلامــاز
اوْغـلــۇ اؤلــه‌ن آنـانێـن
آغلار گؤزۆ یـۇخــلامــاز
بوْش بئشیگـون بـزه‌ره‌م
اۆستـۆنـه گـۆل دۆزه‌ره‌م
چؤللـری سنده‌ن سارێ
مـلــه‌ر-مـلــه‌ر گــزه‌ره‌م
عئشقـووۇن دیلبنــدی‌یـم
درده پــنــــاهَــنـــدی‌یــــم
قول باغلـێ اؤلمـه‌گۆنـدان
اؤلــۆنـجـه شـرمـنـدی‌‌یــم
اقبــالیمـیـــن اۇلــــدۇزۇ
عؤمـرۆمــۆن دادێ دۇزۇ
كیم گؤرۆبدی اوْخــلانــا
سن كیمی املیك قۇزۇ
اۆره گیمین پاره‌سـی
غملریمین چاره‌سـی
باغلانمادێ اصغریـــم
بوْغازۇوۇن یـاره‌ســی
مـن گــۆل اكیــب درمــه‌دیــم
اوْغـۇل دادێــن بیلـمـــه‌دیـــم
های دۆشدۆ اوْخـلانمێســان
اوْخ یــاره‌وی گــؤرمـــه‌دیــــم
باغلێ قالێـب اللــرون
پارچالانێــب حنجــرون
گۆلمه‌دی بیر یوْل منه
اوْخا گۆلـه‌ن لـب‌لـرون
غملریمــی سـانـــارام
زۆلـف‌لـریمــی یـوْنـارام
گهــواره‌وی تـرپــه‌دیــب
لای‌لای چالێب یـانـارام
آهـو كیمـی ملـــه‌ره‌م
قان یاش گؤزه الـه‌ره‌م
سنی سالێـب یادیمـه
قوْنداق آچێب بلـه‌ره‌م
اۇلدۇز گـؤگـه دۇزۇلــر
خـۇمار گؤزلر سۆزۆلــر
آهو مله‌ر سس گلــه‌ر
منیــم قلـبیـــم اۆزۆلــر
عئشقون آچێب منظـره
آدۇن دۆشـــۆب دیـللــره
قلبـــی یـارالــێ آنــــوْن
قۇربـان خـۇمـار گـؤزلــره
آلنــۇنــدا قـــاره تئـلـــون
گؤرمه‌دیم شیرین دیلـۇن
قالـدێ سنـده‌ن یادیـگـار
سینه‌مـده دێرناق یئـرون
گۆنـدۆز گئجــه آغــلارام
اۆره‌ك باشێن داغـلارام
گلسوْن منیم سینه‌مـه
اوْخ یــاره‌وی بـاغـــلارام
سێنێـب منیــم شهپــریــم
قان اوْلـۇب اشـك-ی-تریــم
سۇ ایچمیشه‌م سۆد گلیب
اَلــوْو وئــریــر دؤشلــه‌ریــم
اینجیدیب عالـم منــی
درده سالێب غم منی
دؤشۆمۆ سۆد آغرێـدار
گل سینه‌مـه ام منـی
باغچادا گۆل درمیشـه‌م
دیلبره گـؤنـده‌رمیشــه‌م
بیـــر اوْلان آلــلاهیـمـــه
سنی قۇربان وئرمیشه‌م
فلـك دانێـب دۇزۇمــۇ
باتێـرێب اۇلــدۇزۇمـــۇ
تارێ قبول ائلـه‌سیـن
منیـم املیـك قۇزۇمـۇ
ظالیــم گـؤزۆ اۇیمــادێ
آنـوْن سنـده‌ن دوْیمادێ
آیـاق دۇتــۇب گـزمـه‌گـه
فلـك سنـی قــوْیمـادێ
آنــوْن زۆلفــۆن هــؤرمئییــب
سن‌سیز آغ گـۆن گؤرمئییـب
هئچ قـانـادێ باغلــێ قـۇش
سـن كیمـی جـان وئـرمئییب
سـۆرمه‌دون دورانیـوێ
آلدێ عطـش جـانیـوێ
اوْخ وۇران صـیّـادیــده‌ن
تــارێ آلار قــــانیـــوێ
