حضرت سیدالشهدا(ع)نین باشێ اۆسته خانێم زینب (س) دیلیجه

قوْشار: تبریزلی رضا صّراف

ائی حۆسئین، ائی تاجدارێم، أینَ أنتَ یا أخی

گئتدی الده‌ن ایختییاریم، ، أینَ أنتَ یا أخی

قالمێشام غم وادی‌سینده بۇ دئییلمی بس منه؟

سسله‌ره‌م بۇ حاله‌تیله‌ن وئرمیسه‌ن بیر سس منه

سن بیلیرسن سنده‌ن اؤزگه، دادرس یوْخ كس منه

داده یئت ائی غمگوساریم، أینَ أنتَ یا أخی

ائی آنام زهرا عزیزی بۇنجا خوار ائتمه منی

قوْیما دۆشمه‌نله‌ر الینده، خوار-وْ-زار ائتمه منی

بی‌قراره‌م بۇندان آرتێق، بی‌قرار ائتمه منی

قالمئیوب صبر-وْ-قراریم، أینَ أنتَ یا أخی

من سنین بۇ چؤلده قارداش، بئله سرگردانیوام

مو پریشان، دیده گئریان، سینه‌سی سوزانیوام

دیزلریم گلمه‌ز دوْلانماقدان حۆسئن قۇربانیوام

یئت هرایه شهرییاریم، أینَ أنتَ یا أخی

سن دگیلدین ایندی منله‌ن، خئیمه‌لرده یار ایدین

غم گۆنۆنده غم كشیده زینبه غمخوار ایدین

هارداسان بیر ساعه‌ت آخه‌ر بۇندان اووه‌ل وار ایدین

بوْش قالێب سن‌سیز كناریم، أینَ أنتَ یا أخی

خئیمه و خرگاهیم اوْدلاندێ تالاندێ زینه‌تیم

سن گئده‌ن ساعه‌ت منیمده گئتدی سنله‌ن عیزّه‌تیم

قالمئیوب نه عیزّه‌تیم نه زینه‌تیم نه حؤرمه‌تیم

اوْلمۇش آه-وْ-ناله كاریم، أینَ أنتَ یا أخی

بیلمیره‌م سیرری ندیر؟ سنده‌ن سوْرا من باقی‌یه‌م

قالمێشام دۆنیاده یوْخسا، درد-وْ-غم دوستاقی‌یه‌م

بیر دانێش منله‌ن حۆسئن شیرین دیلین موشتاقی‌یه‌م

شام اوْلۇب سن‌سیز نهاریم، أینَ أنتَ یا أخی

اشك-ی-دیده‌م تك حۆسئن ازبس یئره دۆشدۆ سؤزۆم

بیرده قارداش سسلییه‌م قارداش داخێ گلمه‌ز یۆزۆم

سن منی گؤزده‌ن سالێبسان، یا منیم گؤرمه‌ز گؤزۆم

هر یانا دۆشدۆ گۆذاریم، أینَ أنتَ یا أخی

طور-ی-عئشقینده برادر، غرق-ی-بحر-ی-حئیره‌ته‌م

كلمه‌ی-ی-ارنی دیلیمده شوقمند-ی-صؤحبه‌ته‌م

یوْخسا بۇ عاله‌مده من، بیر نو نهال-ی-مؤحنه‌ته‌م

درد-وْ-غم دیر برگ-وْ-بارێم، أینَ أنتَ یا أخی

قۇمرێ تك بۇ چؤلده اوْلمۇش وئرد-وْ-ذئكریم كو و كو

ائیله‌ره‌م نظّاره‌ی-ی-شئمشاد-ی-قددین آرئزو

ائیله‌مه‌ز حۆرمه‌ت منه سن‌سیز حۆسئن قوْم-ی-عدو

گئتدی سنله‌ن ائعتیباریم، أینَ أنتَ یا أخی

گرچه صرّافه‌م نه فكر-ی-لعل-وْ-گؤهه‌ر ائیله‌ره‌م

وا حۆسئن آدێن همیشه دیلده ازبر ائیله‌ره‌م

محفئل-ی-ماته‌مده بۇ بئیتی مكرر ائیله‌ره‌م

ائی حۆسئن ائی تاجدارێم، أینَ أنتَ یا أخی