سئودیگین یارین الیندن ...
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
تک - تکینه گونده گئدیب،عرض ارادت ائیله رم
سحر، بئش - اون ستاد گزیب، آخشامی اللی سین - یوزون
گئجه بئش - آلتی یوز یئره، گئدیب اقامت ائیله رم
بوردا ستاد رئیسی یم، باشقا ستاددا چای وئره ن
فرق ائله مز، هایان گله، دویونجا خدمت ائیله رم
اله آلاندا بیر «قاوال»، چالاندا یاخشی «زورنا» یام
ساغ ایله یاخشی دوست اولوب،سولا رفاقت ائیله رم
چپیک چالاندا، وار الیم؛دعا گره کسه ده،دیلیم
فیشقادا ایسته سز،چالام؛دوروب،قیامت ائیله رم
«اصلاح» اولا،«اصول» اولا، هم «طلب»ام،هم ده«گرا»
چون کی یئله اینانمیشام،اوندان اطاعت ائیله رم
سئچگی گونو گله ن زمان،محله آغ ساققالی یام
بئش - آلتی حؤوزه نی گزیب، رأیه نظارت ائیله رم
نتیجه نی وئرن زمان،کیم چیخا،یوخ تفاوتی
بنده،تئز عرض تبریکی،همان او ساعت ائیله رم
بئش- اون غزئت ده تبریکیم،ائرته سی گون چاپ اولمالی
هم ده حضوری خدمته،چاتیب،زیارت ائیله رم
ایندی بو یول طلبکارام،چیخان داداش دا بورجلودور
سلام لارین ساین اونا،داها زیادت ائیله رم
عرض ائده رم کی:«سروریم!قدرته عاشق دگیلم
اجازه وئرسه نیز،فقط خدمته همت ائیله رم!
بئش - آلتی جور مشاورت،اللی رقم معاونت
اوندان علاوه، اون یئره،اؤزوم وزارت ائیله رم»!
بوللوجا وار زیرک لیگیم،هم ال - آیاق،هم ده اوزوم
بو سرمایایلا، هر یئره گئده م، ریاست ائیله رم
ائدرسه«آرش» انتقاد،ساققالینا گوله - گوله
سؤزلرینی تکذیب ائدیب،اؤزون ملامت ائیله رم
شعیر: حؤرمتلی اوستاد حمید آرش آزاد دان
گؤرمگین گئندن بو گوءن هر دردیمه درمان اولار
کیم دئییب پولدان عزیزدیر جان ناقابل منه
کیم دئییبدیر پوللو انسانلاردا بی ایمان اولار
پول منه عزّت وئرر، پولدور بیزی انسانلادان
کیمسه ده پول یوخدو اوندان بس هاچان انسان اولار
وصلینه هر کیم کی چاتدی، عیش و نوش ائتمکده دیر
بینوا سن سیزلرین هر گوءن، غذاسی قان اولار
ای کی هر گؤرمز گؤزه سندن گلیر نور و ضیا
اولماسان گؤرمز جهان اهلین گؤزوم، گریان اولار
اولماسان ای جان گرک من پوللویا قوربان اولام
یاریم اولسان مین نفر پولسوز منه قوربان اولار
گر کی من بیچاره لردن جیب سویوب پول ییغمیشام
عئیبی یوخدور، چون اونون بیر ذره سی احسان اولار
هر گئجه دعوت یازیب بیر عدّه نین شامین وئریم
هر گئجه بیر عدّه یالتاقلار منه مهمان اولار...
اوندادا اولسا بیر آزجا اعتبار،بس دیر بیزه
گون ده یوز یول سؤیله ریک:« آی سئوگیلیم قوربان سنه»
یار جواب دا سؤیله سه بیر زهرمار ، بس دیر بیزه
یئددی اولدوزلو هتل سال، محو ائله باغلار باغین
گزمه گه چیخساق قدیم تک،حکم آوار بس دیر بیزه
زلزله، توفان یا سئل، لازم دگیل گلمک لری
شهری آلت -اوست ائتمگه بیر شهردار بس دیر بیزه
رأی اوچون چوخ خرجه دوشمه ، نئیلی سن تبلیغاتی
پخمه ییک، کاندیدا جان!اوچ - دؤرد شعار بس دیر بیزه
باشقالار قوی مریخه گئتسین ، آیاق باسسین آیا
اوچ مین ایل دن قالمیش آزجا افتخار، بس دیر بیزه
بوشلا قافلان - آصلانی، بیز نئیلی ریک حیوان باغین؟
چای دا بیر بوللو سیچان، آز سوسمار بس دیر بیزه
چوخ توقع ائتمه یین، انسان چوغوندور دور مگر؟
بیر یئرآلماسی قدر اولسا دامار، بس دیر بیزه
تکجه بیر ساعت «سونا»، بیر هفته شارژ ائیلیر بیزی
بیز، یوغورت تک بیر زادیق، آزجا بوخار بس دیر بیزه
جاده اگری - اویرو دور، گؤی لرده ده چوخ دور خطر
توسباغا تک آخسایان ، کؤهنه قاطار بس دیر بیزه
بیر تیکه قیلچیقلی سنگک له، یاریم میثقال پنیر
کارمند آیلیق لاریلا، شام - ناهار بس دیر بیزه
توزلو یئل اسسه شهرده، بیرده ایگزوز توستوسو
حال وئریر الحق، بئله حاللی باهار بس دیر بیزه
قیش دا نوودان ایشله ییر، یای دا کولر صاندیقچاسی
بیر بئله تبریزده - «آرش»!- آبشار بس دیر بیزه
حورمتلی آذربایجانین بویوک ساتیریک شعیر یازاری، اوستاد حمید آرش آزادین «اوخو آت ! یایین گیزلت» کیتابیندان.
بولود قاراچورلو - سهند:
گئجه هر نه قدر اوزون اولسا دا
سحر آچیلاجاق، گونش دوغاجاق
بو سؤز داها بو گون افسانه دئییل
«ایشیق قارانلیغی بیر گون بوغاجاق»
***
یئنه یوردوموزا باهار گله جک
سولغون گوللریمیز یئنه گوله جک
تاریخ جلادلارا باش اَیمه یه جک
بیزیمدیر گله جک، بؤیوک گله جک.
غربت ائلده غریبسه‌دیم
ائلیمی قایتارین منه!
دره‌لریم کؤز باغلاییب
سئلیمی قایتارین منه!
×
آختاریرام حزین- حزین
ایتیردیگیم گولون ایزین
دونیادا هر نه وار سیزین
گولومو قایتارین منه!
×
دیل دئییرم… منی آنمیر
سسله‌ییرم، او دایانمیر
نوه‌لریم منی قانمیر
دیلیمی قایتارین منه!
×
یاخ اورمودان گؤی خزره
اوخشار سنی هر منظره
بو آذردن او آذره
ایلیمی قایتارین منه!
×
آذری‌یم ائلیم، واریم
هارای سالیر سؤز قاتاریم
سوسوز قالیب سونالاریم
گؤلومو قایتارین منه!
×
شاعر ده وار سؤز اوینادان
گونبز اوسته قوز اوینادان
فقط منه گورز اوینادان
الیمی قایتارین منه!
×
دیلیم گئتسه قالار نه‌ییم
نئجه بو درده بئل اییم
نسیمی‌دن اؤیرندیگیم
تعلیمی قایتارین منه!
اوستاد هاشم ترلان
قایناق: ایشیق
