آذربایجان خالق ناغیلی - گؤیچک فاطما 

      بیری وار ایدی، بیری یوخ ایدی، آللاهین بنده سی چوخ ایدی، بیر کیشی‌نن بیر آرواد وار ایدی. گونلرین بیرینده ایش بئله گتیردی کی، بو کیشی‌نین آروادی آزارلانیب اؤلدو. همین آرواددان فاطما آدیندا یئتیم بیر قیزی، بیر ده اوغلو قالدی. کیشی گؤردو کی، اوشاقلارا باخا بیلمه‌یه‌جک، اودو کی، آیری بیر آرواد آلدی. کیشی‌نین بو آرواددان دا بیر قیزی اولدو، آما بو یامان کیفیر قیز ایدی. بو آرواد گلن گوندن یئتیم فاطمانی گؤزو گؤتورمه‌ دی. اؤز قیزی‌نین آدینی دا فاطما قویدو. آما بو قیزینان اونون آسیمان تفاوت وار ایدی. یئتیم فاطما گؤزل گؤیچک بیر قیز، چیرکین فاطما ایسه قارا کئچل ایدی. آنالیق یئتیم فاطماینان، اوغلانا گون وئریب، ایشیق وئرمیردی. اونلاری گاه سویا، گاه اودونا گؤندریردی. ائوده قاراباش کیمی ایشله‌دیردی.

     گونلرین بیرینده آرواد ایکی آیاغین بیر باشماغا دیره‌ییب ارینه دئدی: 

  - کیشی، اگر بو اوشاقلاری آپاریب آزیتماسان، سنده اوتورمویاجام. منیم بو اوشاقلاردان زهلم گئدیر، من اونلارا داها باخا بیلمیرم. 

  کیشی نه قدر یالوار-یاپیش ائله‌دی کی، آی آرواد، اینصافین اولسون، من بو بیر پارچا طوفوللری هارا آزیدیم، یازیقدیلار، گئدرلر مئشه ده قورد-قوش یییر. آروادین هیری توتموشدو، ائله نیرخ دئییب دوردو کی، اگر آزیتماسان گونونو قارا ائلییه‌جم. کیشی چوخ گؤتور-قوی ائله دی، گؤردو کی، آیری علاجی یوخدو. فاطماینان اوغلونو گؤتوروب گئتدی مئشه‌یه. اوشاقلارینی آللادیب دئدی: 

  - بالالاریم، سیز موروق، چییلک ییغا-ییغا گئدین دره‌نین دیبینه، من ده بو بیری طرفدن بیر آز اودون قیریم، آخشام‌اوستو گلیب سیزی ده گؤتوررم، گئدریک. 

  اوشاقلار آتالاری‌نین سؤزونه ایناندیلار. موروق، چییلک ییغا-ییغا لاپ مئشه‌نین سیخ یئرینه چاتدیلار. 

  سیزه کیمنن دئییم، کیشیدن. کیشی اوشاقلاری آلدادیب بو طرفدن آغلایا-آغلایا، کور-پئشیمان قاییتدی ائوه. آخشام اولدو. قارانلیق دوشدو، مئشه ده گؤز-گؤزو گؤرموردو. آیی، جاناوار، پلنگ، شیر مئشه‌یه بیر نریلتی، گورولتو، اینیلتی سالمیشدیلار کی، وهمه‌دن آدامین باغری چاتلاییردی. اوشاقلار ها گؤزله‌دیلر، دده‌لری گلیب چیخمادی. آخیردا علاجسیز قالیب بیر آغاجین باشینا چیخیب اورادا گئجله‌دیلر. صاباح تئزدن دوروب یول باشلادیلار بیر جیغیرنان گئتمه‌یه. آز گئتدیلر، اوز گئتدیلر، دره-تپه دوز گئتدیلر، گلیب بیر بولاغین باشینا چاتدیلار. فاطمانین قارداشی یامان سوسامیشدی. اؤزونو تئز وئردی بولاغین باشینا، ایسته‌دی سودان دویونجا ایچه. فاطما قویماق ایسته‌مه‌دی، ائله بیل اورگینه داممیشدی کی، بو سودا بیر شئی وار. فاطما نه قدر ائله‌دی کی، قارداشی سودان ایچمه‌سین، اولمادی. اوغلان آغزینی بولاغین گؤزونه دیره‌ییب سودان دویونجا ایچدی. او ساعات دؤنوب اولدو قارا بیر اینک، فاطما اوز-گؤزونو جیریب شیون سالدی کی، آی قارداش، سنه دئمه‌دیم‌می ایچمه، ایندی من نئینیییم، باشیما هارانین داشینی تؤکوم. 

  قارداشی دئدی: 

  - باجی، داها ایش-ایشدن کئچیب، منیمکی ده بئلیمیش، گل گئدک. آما بو سیرری نه‌باده بیر آداما دئیه سن ها! 

  فاطما اینگی ده قاباغینا سالیب آیاق لپیریینن او قدر گئتدی کی، مئشه‌دن چیخدی. بیر داغین باشینا چیخیب گؤردو کی، ائولری اوزاقدان گؤروکور. دوز گلدی ائولرینه. آرواد گؤردو کی، قیز گلدی، آما یانیندا دا بیر قارا اینک. اولجه اوز-گؤزونو تورشوتدو، قاش-قاباغینی تؤکدو، ایسته‌دی قیزی قووالاسین. سونرا فیکیرلشدی کی، اوغلان یوخدو، یقین اؤلوب-ایتیب، مئشه‌ده قالیب. قیز دا کی، بیر یاخشی اینینن گلیب. اینگی ساغیب یئیریک. بیر آزدان سونرا قیزی گئنه آزدیراریق، او دا ایتیب جهننمه واصیل اولار. کیشی ده قیزینی گؤروب بیر طرفدن سئویندی، بیر طرفدن ده اوغلونو یادینا سالیب بیکئیف اولدو. 

  آنالیق هر گون فاطمانین الینه بیر آز یون وئریب اینگی اوتارماغا گؤندرردی. فاطما آخشاما کیمی اینگی اوتاریر، آنالیغی وئردیگی یونو دا دیدیب اَییرردی. بیر گون یئنه اینگی اوتاردیغی یئرده برک یئل اسدی، یئل فاطمانین یوماغینی گؤتوروب آپاردی. فاطما،  " آ یئل بابا، یوماغیمی آپارما "  - دئیه-دئیه یویوروردو. یئل بابا یوماغی آپاریب بیر ائوین باجاسیننان ایچری سالدی. فاطما گلیب بو ائوین قاپیسینی دؤیدو. ایچریدن بدهئیبت بیر قاری چیخیب دئدی: 

  - آ بالا، نه وار، نه ایسته‌ییرسن؟ 

  فاطما دئدی: 

  - قاری ننه، یئل بابا یوماغیمی سنین باجاننان ایچری سالدی، گلمیشم کی، اونو وئره‌سن. 

  قاری دئدی: 

  - آ قیزیم، گل منیم باشیما باخ، سونرا یوماغینی وئریم. 

  فاطما راضی اولدو، ایچری گیریب گؤردو قاری‌نین ائوی زیر-زیبیلنن دولودو. اودو کی، دئدی: 

  - قاری ننه، سوپورگه‌نی وئر، ائوینی سوپوروم. 

  قاری سوپورگه‌نی وئردی. فاطما ائوی سوپوروب تر-تمیز ائله‌دی. سونرا دا باشلادی قاری‌نین باشینا باخماغا، گؤردو کی، بونون باشی دولودو ایلان، چایاننان، باخدی کی، قاری‌نین باشیندا بیتلر وار تیسباغا بویدا، بیره لر وار قورباغا بویدا. 

  قاری دئدی: 

  - آ قیزیم، دئ گؤروم سنین آنانین باشی قشنگدی، یوخسا منیم؟ منیم بیره‌لریم قشنگدی، یوخسا اونون. 

  فاطما دئدی: 

  - آی ننه، البتته، سنین باشین قشنگدی. سنین بیت، بیره‌لرین ده لاپ سرچه، بولبول کیمی شئیلردی. 

  بو سؤزلر قاری‌نین خوشونا گلدی، اودو کی، دئدی: 

  - بالا، بوردان گئدنده قاباغینا اوچ بولاق چیخاجاق، بیری‌نین سویو دوم‌آغ، سود کیمی، او بیرینینکی قاپ‌قارا شوه کیمی، بیری‌نین ده سویو قیپ-قیرمیزی لاله کیمی. آغ سودا سویونوب چیمرسن، قارا سودان دا ساچینا، قاشینا، کیرپیگینه چکرسن. قیرمیزی سودان دا یاناقلارینا، دوداقلارینا چکرسن. سونرا گئدیب قارا اینگین بیر بوینوزوننان یاغ، بیریننن ده بال امه جکسن. 

  فاطما قاری‌نین یانیندان چیخیب گلدی، یولدا گون‌چیخان طرفده قاباغینا بیر بولاق چیخدی، سویو دوم‌اغ سود کیمی، گیریب سودا چیمدی. بیر آز گئدیب گون‌باتان طرفده ده بیر بولاغا راست اولدو. بو بولاغین سویو دا قاپ‌قارا ایدی. فاطما بو سوینان باشینی یویوب، بیر آز دا قاشینا، کیرپیگینه چکدی. قیرمیزی سودان دا بیر آز یاناقلارینا، دوداقلارینا چکدی. فاطمانین گؤزللیگی بیر ایدی، ایندی اولدو مین. فاطما ائله بیر گؤزل قیز اولدو کی، هئچ میثلی-برابری اولمادی. آیا دئدی، سن چیخما، من چیخاجام، گونه دئدی، سن چیخما، من چیخاجام. یاناقلار قیپ-قیرمیزی آلما کیمی، دوداقلاری قایماق، دیشلری اینجی، گؤزو مارال گؤزو. نه دئییم، بیر باخان دئیردی بیر ده باخایدیم. 

  فاطما دوز گلیب چیخدی قارا اینگین یانینا، اونون باشینی، گؤزونو سیغاللاییب باشلادی بوینوزلارینی اممه‌یه، گؤردو کی، دوغرودان دا، اینگین بیر بوینوزوننان یاغ، بیریننن ده بال گلیر. فاطما هر گون اینگین بوینوزلارینی امیب ائله کؤکلدی کی، لاپ بالیغا دؤندو. فاطمانین آنالیغی‌نین بو ایشه هم پاخیللیغی توتدو، هم ده مات قالدی کی، گؤرن فاطما نئیله‌ییر کی، بئله کؤکه‌لیب، قشنگلشیر. اودو کی، صاباحدان اؤز کئچل قیزینی دا قوشدو فاطمانین یانینا کی، او دا ناخیرا گئدیب قشنگلشسین. 

  ایش بئله گتیردی کی، یئنه برک بیر یئل قوپدو، بو دفعه  ده یئل کئچل فاطمانین یونونو گؤتوروب آپاردی. یون گئدیب همین قاری‌نین باجاسیننان ایچری دوشدو. کئچل فاطما یونون دالینجا قاچا-قاچا گئدیب قاری‌نین ائوینه چیخدی. قاپینی دؤیوب یونونو ایسته‌دی. قاری قیزی ایچری چاغیریب دئدی: 

  - آ قیزیم، گل باشیمی بیتله، سونرا یونونو وئریم. 

  قیز قاری‌نین باشینا باخیب گؤردو کی، بیت-بیرینن دولودو.  " تفو "  ائله‌ییب گئری چکیلدی. قاری دئدی: 

  - آ قیزیم، منیم باشیم تمیزدی، یوخسا سنین آنانین؟ 

  قیز دئدی: 

  - آللاه وورموشدو سنی، باشین ایلان قورباغاینان دولودو، هلبتده آنامین باشی یاخشیدی. 

  قاری بیر آلتدان یوخاری باخیب دئدی: 

  - آ قیزیم، سن کی، بئله دئدین، آلا یونونو وئریرم، آما بوردان گئدنده قاباغینا اوچ بولاق چیخاجاق. بیری‌نین سویو قارا، بیری‌نین سویو آغ، او بیرینینکی ده قیرمیزی. سن اولجه قارا سویا گیریب چیمرسن، سونرا آغ سوینان باشینی یویوب، بیر آز دا قاشینا، کیرپیگینه، قیرمیزی سودان دا آلنینا سورترسن. سونرا دا قارا اینگین دؤشلرینی امرسن. 

  قیز قاری‌نین یانیننان چیخیب یولدا قارا سوینان چیمدی، آغ سودان قاشینا، کیرپیگینه چکدی، قیرمیزی سودان دا آلنینا سورتدو. اولدن ده بیر شئی اولمایان کئچل فاطما دؤنوب اولدو قارا قول؛ هر یئری اولدو قاپ-قارا کؤسی کیمی. بیرجه دیشلری، گؤزلری آغاریردی. کئچل فاطمانین هئچ ندن خبری یوخ ایدی. گلیب اینگین امجگینی آغزینا سالیب باشلادی سورماغا، گؤردو کی، آغزینا ایرین گلیر، تئز باشلادی اینگین او بیری ممه‌سینی اممه‌یه، گؤردو کی، بوننان دا قان گلیر. دوروب کور-پئشیمان ائولرینه گلدی. آناسی قیزینا باخان کیمی اللرینی ایکی دیزینه ووروب دئدی: 

  - بیی، باشینا گوللر، آی قیز سنه نه اولدو کی، بو گونه دوشدون؟ 

  قیز باشینا گله‌نی آناسینا سؤیله‌دی. داها ایش ایشدن کئچمیشدی. او گوننن کئچل فاطمانی آناسی ائودن هئچ یئره بوراخمادی. آما گؤیچک فاطما هر گون اینگی آپاریب اوتاریر، اؤزو ده گونو-گوننن قشنگلشیردی. آنالیق گؤردو کی، فاطما اینگی اوتارماغا آپاردیقجا یاخشیلاشیر، اودو کی، بیر گون بیر آز قورو یوخا بیشیریب پالتاری‌نین آلتیننان کورکلرینه قویدو، اری ائوه گلنده یئره ییخیلیب آرخاسی اوسته او اوزه، بو اوزه چؤروکدو. آرواد ترپندیکجه یوخالار خیرها-خیرنان قیریلیردی. آرواد اوفولدانا-اوفولدانا دئدی: 

  - آ کیشی، گؤرورسنمی نه برک آزاررامیشام. اؤلورم، منه بیر علاج. 

  کیشی دئدی: 

  - آرواد سنین درمانین ندی، دئ تاپیم؟ 

  آرواد دئدی: 

  - منیم درمانیم قارا اینگین اتیدی. اونو کسیب اتینی منه یئدیرتسن یاخشی اولاجام. 

  کیشی اولجه اینگی کسمک ایستمه‌دی، آما آرواد ال چکمه‌دی کی، چکمه‌دی. کیشی آخیردا اینگی کسدی. گؤیچک فاطما گؤردو کی، اینگی کسدیلر. قالدی معطل کی، ایندی نه یئیه‌جک، آجیننان اؤله‌جک. دوروب گئتدی همین قوجا قاری‌نین یانینا، احوالاتی اونا سؤیله‌دی. قاری دئدی: 

  - قیزیم، عئیبی یوخدو، قوی اینگی کسسیننر، سن اونون اتیننن یئمزسن، قوی اونلار یئسیننر، سونرا خلوتجه اونون بوتون سوموکلرینی توربایا ییغیب گتیررسن منیم یانیما. قورخما، قارداشین ایندی ده خوروز جیلدینه دوشه‌جک. 

  فاطما قاری‌نین یانیننان گلیب او دئدیگی کیمی ائله‌دی. اینگین اتیننن یئمه‌دی، اونسوز دا آنالیغی هئچ اونا ات وئرمه‌دی. بلی، فاطما اینگین سوموکلرینی ایریلی-خیردالی ییغیب بیر توربایا دولدوردو، خلوتجه دوز گتیردی قاری‌نین ائوینه، قاری یئکه بیر قویو قازیب سوموکلری باسدیردی اورا. اوستونو تورپاقلاییب قیزا دئدی: - بالا، قورخما، بو سوموکلردن نه ایسته‌سن او ساعات حاضیر اولاجاق. 

  قیز دوروب ائولرینه گلدی، بیر-ایکی گوننن سونرا پادشاهین بؤیوک اوغلونون تویویدو، هامینی چاغیرمیشدیلار. فاطمانین آنالیغی دا کئچل قیزینی گئییندیریب-کئچیندیریب تویا گئدیردی. گؤیچک فاطما دا آنالیغینا یالوار-یاخار ائله‌دی کی، تویا اونو دا آپارسین. آنالیغی قویمادی کی، قویمادی، دئدی: 

  - بیرجه سنین یئرین اسکیک ایدی، قاخیل اوتور یئرینده، اونسوز دا سنین پالتارین نه گزیر کی، گئیینیب گئده‌سن. 

  آنالیق بیر چاناق دارینی یئره تؤکوب، بیر بوش جام قویدو، دئدی: 

  - من گلنه کیمی بو دارینی ییغارسان چاناغا، بو جامی دا گؤز یاشیننان دولدورارسان، اگر دئدیکلریمی ائلمه‌سن، وای سنین گونونه. 

  فاطما قالدی مات-معطل کی، نئیله‌سین. آنالیغی گئدن کیمی کور-پئشیمان دابان آلیب دوز گلدی قاری‌نین یانینا، آنالیغی‌نین تاپشیردیغی ایشلری سؤیله‌دی. 

  قاری دئدی: 

  - قیزیم، قورخما، بو ایشلر منیم الیمده سو ایچیمی کیمی بیر شئیدی. 

  قاری قیزا بیر چاناق داری وئردی، بیر جام دا دوزلو شور سو. دئدی: 

  - آپار بو دارینی تؤک آنالیغی‌نین داری چاناغینا، دوزلو سویو دا تؤک جاما، ائله بیلسین کی، آغلاییبسان، گؤزونون یاشیدی. قالدی یئره تؤکولن داریلار، تویوق-جوجه‌لری بوراق قوی دارینی دننه‌ییب قورتارسیننار. 

  قاری بو سؤزلری قیزا دئیننن سونرا اونو گؤتوروب گلدی اینگین سومویونو باسدیردیغی یئره. قویونون آغزینی آچیب دئدی: 

  - ائی قارا اینک، سننن بیر قشنگ پادشاهانه لیباس، بیر ده بیر قیزیل باشماق ایسته‌ییرم کی، فاطما گئیینیب گئتسین تویا. 

  او ساعات بیر ده گؤردولر کی، بو شئیلر حاضیر اولدو. قاری قیزا بیر توربا کیشمیش، بیر توربا دا کول وئریب دئدی: 

  - قیزیم، بو پالتاری، قیزیل باشماغی گئییب، توربالاری دا گؤتوروب گئدرسن تویا، اورادا سنی آنالیغین تانیمایاجاق، تویدا سنی ده اویناداجاقلار. سن اوینایاندا جاماعاتین اوستونه کیشمیش تؤکرسن، آنالیغی‌نین اوزونه کول، سونرا تئز قاییدیب گلرسن ائوه، پالتارینی سویونوب اوتورارسان. 

  بلی، فاطما زر-زیباینان تیکیلمیش پالتاری گئییب، قیزیل باشماغی آیاغینا تاخیب دؤندو حوری-مله‌یه. گئتدی تویا، هامی بو گؤزللیکده قیزی گؤروب مات قالدی. فاطما اوینایا-اوینایا آداملارین قاباغینا گئتدیکجه هامی‌نین قوجاغینا کیشمیش تؤکوب، آنالیغی‌نین گؤزونه کول سپدی. سونرا تویدان چیخیب تله‌سیک قاییتدی ائوه. یولدا چایدان هوپپانیب کئچنده باشماغی‌نین بیر تایی آیاغیننان چیخیب دوشدو سویا. تلسدیگیننن باشماغی قویوب قاچدی. همین گون دئمه پادشاهین اوغلو اووا چیخیبمیش. قاییدان باش یولدا آتینی چایدا سولاماغا گتیردی. آت دوداغینی سویا ووروب گئری چکیلدی. پادشاهین اوغلو اَییلیب سویا باخدی، گؤردو کی، سودا بیر تای قیزیل باشماق وار، تئز چیخاردیب اؤزوینن گتیردی. بو طرفدن ده فاطما گلیب پالتارینی سویونوب گیزلندی. آنالیغی قاش-قاباقلی گلدی ائوه. فاطما دئدی: 

  - آنا، بیر آز سؤیله گؤروم تویدا نه اولدو، نه کئچدی؟ 

  آرواد دئدی: 

  - هئچ، نه اولاجاق، بیر قاراگوننونون بیری اوینایاندا هامی‌نین قاباغینا کیشمیش تؤکدو، بیزیم قاباغیمیزا کول آتدی.  

  بونلاری بوردا قویاق، گؤرک پادشاهین اوغلو باشماغی نئیله‌دی. باشماق او قدر قشنگ ایدی کی، هئچ پادشاهین خزینه‌سینده ده بئله‌سی یوخ ایدی. پادشاهین اوغلو باشماغی اؤز له‌له‌سینه وئریب دئدی: 

  - آپار بو باشماغی شهربه‌شهر، کندبه‌کند آختار، هانسی قیزین آیاغینا اولسا، گرک اونو آلام. 

  له‌له هر یئری گزدی، بوتون کندلری، شهرلری هلک-فلک ائله‌دی، باشماق هئچ کیمین آیاغینا اولمادی. آخیردا خبر آلیرلار کی، بو باشماغی آیاغینا تاخمامیش کیم قالدی، دئدیلر کی، بیرجه فاطما آدلی بیر یئتیم قیز وار، او قالیبدی. گتیریب باشماغی فاطمانین آیاغینا گئییندیردیلر، گؤردولر کی، ائله بیل باشماقچی اؤزو الیینن تیکیب، دوز قیزین آیاغینا. او ساعات گئدیب پادشاه اوغلونا خبر آپاردیلار کی، بس بئله-بئله، باشماق فیلان قیزین آیاغینا اولدو. اوغلان توی تداروکو گؤروب فاطمانی گلین گتیرمک اوچون اؤز آداملارینی گؤندردی کی، قیزین باشینی بزه‌سیننر. بو طرفدن فاطمانین آنالیغی پاخیللیغیننان آز قالدی چاتلاسین، اودو کی، فاطمانین ال-آیاغینی کندیرنن باغلاییب سالدی تندیره، اوستونو ده اؤرتدو. اؤز قیزی کئچل فاطمانی دا بزه‌ندیریب قویدو گؤیچک فاطمانین یئرینده. یئنگه‌ لر، ساغدیشلار، سولدوشلار گلدیلر کی، قیزین باشینی بزه‌ییب گلین آپارسینلار، گؤردولر کی، قیز او قیز دئییل. 

  دئدیلر: 

  - آی بالام، بو قیز نییه بئله قارالیب؟ 

  قیزین آناسی نیرخ دئییب دوردو کی، ائله بو همن گؤیچک فاطمادی، او گونون آلتیندا دوروب، گون قارالدیب. یئنگه تئز باشماغی گتیریب قیزین آیاغینا تاخدی، گؤردو یوخ، اولمادی. اؤز-اؤزونه فیکیرلشدی کی، آخی بو قیز من گؤردویوم دئییل، بونو بزه‌ییب آپارساق پادشاهین اوغلو نه دئیر؟ ائله بو فیکیردیدی کی، گؤردو کوچه دن اوشاقلار اوخویورلار: 

  گون چیخ، گون چیخ، 

  کهر آتی مین چیخ، 

  کئچل قیزی ائوده قوی، 

  ساچلی قیزی گؤتور قاچ. 

  یئنگه قیزین تئز باشینا باخیب گؤردو قیز قارت کئچلدی. تئز دوردو کی، گئدیب احوالاتی اوغلانا سؤیله‌سین. بیردن محله‌ده بیر خوروز باشلادی بانناماغا: 

  قوققولو-قو، 

  فاطما خانیم تندیرده، 

  ال-آیاغی کندیرده. 

  یئنگه گلیب تئز تندیرین آغزینی آچدی، گؤردو دوغرودان دا فاطمانین ال-آیاغینی کندیرنن باغلاییب تندیره سالیبلار. قیزی چیخاردیب گتیردیلر ائوه، یئتمیش یئردن اونا بزه‌ک-دوزک وئریب، گئییندیریب-کئچیندیریب آپاردیلار پادشاهین اوغلونا. هامی تویدا چالیر، اویناییر، شادلیق ائله ییردی کئچل فاطماینان آناسی قان آغلاییردی. 

  آرادان بیر مودت کئچننن سونرا کئچل فاطمانین آناسی دئدی: 

  - آ قیزیم، اولان-اولوب، کئچن-کئچیب، بیر دور گئت گؤر باجین نه قاییریر؟ 

  کئچل فاطما گئیینیب-کئچینیب گئتدی باجیسی‌نین یانینا، خوش-بئش اون بئشدن سونرا دئدی: 

  - آی باجی، یامان چیممک ایسته‌ییرم، دور گئدک دریا کناریندا چیمک. 

  گؤیچک فاطما باجیسی‌نین خطیرینی سیندیرماییب اؤز قیزیل تئشتینی ده گؤتوروب گئتدی دریا کنارینا. کئچل قیز دئدی: 

  - آ باجی، اوّلجه سن سویون، من سنی چیمیزدیریم، سونرادا سن منی چیمیزدیررسن. 

  فاطما سؤزه اینانیب سویوندو، دریانین قیراغیندا چیممک ایسته‌ینده کئچل فاطما اونو ایته‌له‌ییب سویون درین یئرینه سالدی. گؤیچک فاطما سودان چیخا بیلمه‌دی. کئچل قیز فاطمانین پالتارینی گئیینیب اوغلانین ائوینه گلدی. آخشام اولدو، قیز اوز-گؤزونو گیزله‌ده-گیزله ده بیر تهر گئجه نی سالدی. یاتماق واختی گلنده اوغلان گؤردو کی، فاطمانین ساچی هئچ الینه دیمیر. اودو کی، دئدی: 

  - آی فاطما، سنین ساچین هئچ گؤزومه دیمیر. 

  قیز دئدی: 

  - باشیمی یوموشام دئیین ییغیلیب بیر یئره، صاباح قورویار، گئنه اوزانار. 

  صاباح آچیلدی، اوغلان آتینا مینیب دریانین کناریینان گئدیردی، بیر ده گؤردو کی، بیر بالیقچی تورو نه قدر چکیرسه، سودان چیخاردا بیلمیر. اوغلان آتدان دوشوب بالیقچییا کؤمک ائله‌دی. بیر تهر تورو چکیب سودان چیخاردیلار. بیر ده گؤردولر کی، تورا بیر بالیق دوشوب کی، اژداها بویدا، تئز بالیغین قارنینی یاردیلار. اوغلان گؤردو کی، بوی بودو گؤیچک فاطما بالیغین قارنیندا، تئز قیزی چیخاردیب بیر شئیه بوکوب ائوه گتیردی. فاطما باشینا گلن احوالاتی تامام باشدان-آیاغا کیمی ارینه دانیشدی. اوغلان او ساعات امر ائله‌دی کی، بیر دلی قاتیر گتیرسینلر. کئچل فاطمانی قاتیرین قویروغونا باغلادیب داغدا-داشدا سوروتده‌دیلر. کئچل فاطمانین هر تیکه‌سی بیر دره ده قالدی. سونرا گؤیچک فاطماینان پادشاهین اوغلو کئیف چکیب دؤوران کئچیردیلر. 

  گؤیدن اوچ آلما دوشدو، بیری منیم، بیری سنین، بیری ده ناغیل سؤیله‌یه‌نین 

کؤچورن: عباس ائلچین