کئف ائله آلله!
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
کئف ائله آلله!
دَره ده تورپاغا، داغلاردا داشا
دریادا سولارا، گؤزلرده یاشا
اوریی اوخلایان گؤز اوسته قاشا
باخ اؤزون قدرته، کئف ائله آللاه
ساییلمیر گویلرده هله کهکشان
بیلینمیر نه واخدان دوزلیب جاهان
آشکار بیر اولسا مین لردی نهان
باخ اؤزون شوکته، کئف ائله آللاه
چیرپینان اورک ده سیر یاتاق سالیر
داغلار بیر بالاجا گؤزده یئر آلیر
عاغیل ایشله دیکجه، معطل قالیر
باخ اؤزون حکمته، کئف ائله آللاه
بیر بؤیوک آغاجی قورو صحرادا
هرکسین روزوسون وئردین دریادا
هاردا واجب اولدی یئتدین فریادا
باخ اؤزون قسمته، کئف ائله آللاه
طغیان ائدن لرین اومودون قیردین
هرکسین قلبینین چؤره یین وئردین
«خلیل»ین چمن ین، «نمرود»ون دردین
باخ اؤزون هیبته، کئف ائله آللاه
زامانا باغلانیب «قارون»ون هایی
تاریخی غرق ائدیب «فرعون»ون چایی
«انا اعطیناک کوثر»ین پایی
باخ اؤزون نعمته، کئف ائله آللاه
سینیق کونول لره سن مئهمان اولدون
بیز گوناه ائیله دیک سن رحمان اولدون
هاردا درده قالدیق، سن درمان اولدون
باخ اؤزون رحمته، کئف ائله آللاه
صولت عطالو ( عطا )
