آشیق هدایت موسا اوغلو 1338-جی ایلده قوشاچایدا دونیایا گؤز آچدی. 40 ایله یاخین دیر، آشیق لیق عالمینده دولاشیر. آشیق هدایت مهری نین اوستادی اؤز آتاسی آشیق موسا اولموشدور. اونا گؤره ده موسا اوغلونا مشهوردور.

30 آشیق داستانی بیلن آشیق موسا اوغلو قوشاچایین اوستاد آشیقلاریندان ساییلیر. آشیق هدایت اورمو، قوشاچای، هشتری، تبریز، قاراداغ، باکی و زنجان هاوالارینین ایفاچیسی دیر. آشیق موسانین بیر چوخ فستیوال و قورولتایلاردا چیخیشی اولوب کی آذربایجان جمهوریتینده اولان چیخیشلارینیدا اونلارا علاوه ائتمک اولار.  اؤز دوغما یوردوندا ساکن اولان آشیق هدایت، هم ده شاعردیر.

دلی کؤنلوم آت باشیندان غملری

حقّین درگاهیندان سن دوشمه اوزاق

داده یئتیر یئرین- گؤیون لنگری

عارف اول غفلتدن آییل اول اویاق

*******

غملی کؤنول لری گولدورن آللاه

آغلایان گؤزلری سیلدیرن آللاه

عالمه بیرلیگین بیلدیرن آللاه

چکیلسین ظلمت لر گؤرونسون شافاق

*******

 سنه قوربان اولوم ذات پرقدرت

کرمیندن وئریب عالمه زینت

آشیق موسی اوغلویام آدیم هدایت

حقّین درگاهیندان ایسترم دایاق.

                                                

                                                 آشیق صبور شریفی

Saza- sözə maraq bəsləyən Aşıq Səbur Şərifi 1954-cü ildə Urmunun torpaq qala kəndində dünyaya gəlib. 23 il aşıqlıq yükünü çiyinlərində daşıyan aşıq Səbur saza rəhmətlik Aşıq Dərvişdən öyrənib.....

سازا سؤزه و صنعته ماراق بسله­ین آشیق صبور شریفی 1334-جو ایل اورمونون تورپاق قالا کندینده دونیایا گلیب.۲۳ ایل آشیق­لیق یوکون چیگین­لرینده داشیان آشیق صبور سازی مرحوم آشیق درویشین یانیندا اؤیره­نیب.آشیق صبور شریفی­نین اورمو اونیورسیته سیندن ادبیات بؤلومو اوزره فوق دیپلم مدرکی واردیر.آَشیق صبور ایکی اوشاق آتاسی­دیر.

آشیق صبور مختلف برنامه­لرده اشتراک ائدیب و چیخیش­لاری اولوبدور.او بیر نئچه آشیق صحبتینی­ده توپلاییب­دیر.

 

دده­میز قورقوتدان قالیب یادگار

یاخشی­لیق ائیله­یین آتین دریایه

بالیق­دا بیلمه­سه او خالق بیلر

قیامت گونونده گتیرر سایه

************

بیر سینیق کؤنولو یاپماق گرک­دیر

غیبتدن، تهمتدن قوپماق گرک­دیر

آتانی-آنانی تاپماق گرک­دیر

اونلار داحی گلمز فانی دونیایه

***************

یاخشی­لیق قالیب او علی اعلادان

هئچ قورخمادی خیبر کیمین قالادان

تصدق ساخلایار یوزمین بلادان

شریفی یاخشی­لیق هئچ گئتمز زایه 

ایکی هنره مالک اولان قوشاچایلی آشیق قنبر- Qoşaçaylı aşıq Qənbər

Aşıq Qəmbər Qoşaçaylı adı ilə tanınan Qəmbər Həqiri 1956-cı ildə Qoşaçayın Məscid  kəndində düyaya göz açıb. Aşıq Qəmbərin babası yəni aşıq Sadıqda saza və sözə maraqlı olub...

 

 ایکی هنره مالک اولان آشیق( آشیق لیق و شبئه خوانلیق)

آشیق قنبر قوشاچایلی آدی ایله تانینان قنبر حقیری 1334-جو ایلده قوشاچایین مسجد کندینده دونیایا گؤز آچیب. آشیق قنبرین باباسی یعنی آشیق صادق­دا سازا و سؤزه ماراقلی اولوب. آشیق قنبر 12 ایل مدتینده قوشاچایدا بیر شبئه( شبیه خوانلیق) گروهونون باشقانی اولوب و محرم آیلاریندا چوخلو نقشلر ایفا ائده رک، هنرینی گؤستریب و امام حسینه عشقینی ثبوت ائدیب،ائله بونا گؤره­ده بیر چوخ مذهبی شعر و نوحه­نین یارادیجیسی دیر. آشیق قنبر ، بیر چالیشقان آشیقدیر و نئچه آشیق صحبتینی و داستانینی توپلاییب و قلمه آلیبدیر. آذربایجانین آشیق داستانلاری، ائللر بیزیمدی، دوللو مصطفی و ایران آشیقلاریآدلی کتابلارینین یازانی و توپلایانی اولان آشیق قنبرین،  بو یولدا اوستادی ، ملک کندیلی آشیق نصرت فعال اولوبدور.

او شئبه مراسملرینین دانیشیقلارینی توپلاییب و 1374-جو ایلدن بری اورمودا یاشاییر.

آشیق قنبردن ایکی شعر:

 

امام حسین(ع)

امتحانِ عشقده، عاشق لیگه اولدو قبول

آلدی چوخلو امتیازلا رتبه ی بالا حسین

کل عالم جمع اولا چاتماز اونون هیجاسینا

منزلتده جایگاهی عالم والا حسین

******************

چوخلو عشاق جان وئریب جانانینا پروانه وار

آدمه گؤز یاشی ابراهیمه اود عیسایه دار

مرتضی عرش علاده قویدو تاج افتخار

مَهر ائدیب کرب و بلانی لؤلؤ لالا حسین

****************

بیر به بیر جان وئردیلر هر عاشق اؤز جانانینا

هئچ شهید چاتماز مقام کربلا قوربانینا

عرش علاده امضا وئردی تا بویانسین قانینا

اولدو کلّ عالمه بیر سرور و مولا حسین

********************

سسله قنبر صدق دلدن اول حسین سروری

یئتمیش ایکی شهدادن یوخدو اوندان برتری

هانسی بیر موجود ممتاز نسل آدمدن بری

سرفراز و سربلند اولموش بئله الّا حسین

یاز هوسلی، باهار سسلی

(سامیرتیلی آشیق عزیزین 90ایللیگی مناسبتینه)

یازان: احمد اسدی

(بو یازی آشیق عزیزین وفاتیندان قیرخ ایل کئچمه سینه باخمایاراق، اونون حاقیندا یازیلان ایلک یازی دیر. آشیق عزیز اورمو آشیق مکتبینده ایندیه دک تانیدیغمیز اوستادلار سیراسیندا و سس فایللاری الیمیزده اولدوغو آشیق کاستلرینده، تکنیکده و اوستادلیقدا بیرینجی آشیق دیر و اونون کیمی آشیق هله گلمه ییب.)

اشاره: ایللر بویو ایدی، آشیق عزیزین آدینی ائشیدیردیم. قوجالاردان سوروشاندا، بئله دئییردیلر: (آشیق، فقط عزیز ایدی، کی گئتدی/ آشیق گرک عزیز کیمی اولا./ رحمتلیگین پنجه لری چوخ گوجلو ایدی، هله هله اونون کیمی چالان گلمه­ییبدیر/ اصلی سبک عزیزینکی ایدی. )

بو سؤزلر، منی آشیق عزیزین کیم و هارالی اولدوغونو بیلمگه ماراقلاندیردی. سسینین و سازینین گؤزل اولدوغونو چوخ ائشیتدیگیمه گؤره، اؤنجه بو عزیز آشیغین سسینی آختاریب و تاپدیم. سسینه قولاق وئردیکدن سونرا، ملتین حاقلی اولدوغونا ایناناراق، اونون اعجازلی سازی و سسینین قارشیسیندا بویون اگدیم و اونون ان آزی سس کاستلری الیمیزده اولان اورمو مکتبی آشیقلار سیراسیندا بیرینجی اولماسینا ایناندیم(اورمو مکتبینده). آشیغیمیزین سسی منی اونون بیوگرافیسینی اوخوماغا داها دا ماراقلاندیردی، آما تأسفلر ایله، حتی بیر خط یازی دا تاپا بیلمه­دیم. بو مسأله ، منی آشیق عزیزه بیر بیوگرافی و یا مقاله حاضرلاماغا مجبور ائتدی. آشیق عزیز حاقدا هر کسدن سوردوم، هره بیر سؤز دئدی. بونا گؤره ده، 40 ایلدن سونرا گئدیب، آشیغین عائله­سی ایله گؤروشمگی دوشوندوم، آما اونلاردان دا کیمسه­نین خبری یوخ ایدی. نئچه واخت آختاردیقدان سونرا، یالنیز بیر نفر منه آشیغین اوغلونون قدیملر قاضی و یا وکیل  اولدوغونو سؤیله­دی. بو آدرس و نشانه منه بس ایدی. وکیللر لیستینده مرادخان آدینی آختاریب و نهایت بیر موبایل نؤمره­سی الده ائدیب زنگ آچدیم. سلام علیکدن سونرا، اونون آشیق عزیزین اوغلو اولدوغونو خبر آلدیم و اونون جوابی ایله، اوره­گیم سئوینجله دولدو. ائیشتدیگیمه اینانماییردیم. بیر گون قرار قویوب آشیق عزیزین اوغلو، مصطفی مرادخان جنابلارینین وکالت دفترینه گئدیب گؤروشدوک و  نهایت آشیق عزیزه گؤره بیر یازی ائده بیلدیم، سیز عزیز اوخوجولاریمیزا حاضرلایام.

 

اورمو شهرینین آدلیم آشیقلاریندان اولان سامیرتیلی آشیق عزیز مرادخان 1301- جی ایلده اورمونون دول ماحالیندا یئرلشن سامیرتی کندینده دونیایا گؤز آچدی. اونون آتاسی حسن، آناسی ایسه دلبر خانیم ایدی. دول ماحالینین کئچمیشلردن بری آشیق اوجاغی و ساز-سؤز بئشیگی اولدوغونا گؤره، آشیق عزیزده­­ده دول ماحالینین بو خصوصیتی تأثیر قویدو. آشیق عزیز یئنی یئتمه چاغلاریندان سسینین گؤزل اولدوغونا گؤره توی مراسملرینه اوخویان(خواننده) کیمی قاتیلیردی. او گنج چاغلاریندادا اکینچی­لیکله برابر، اورمودا اولان توی شنلیکلرینه قاتیلیب سسی ایله او توی مجلسلرینه بزک وئریردی. بو ایش، آشیق عزیزین آشیق فرهاد ایله تانیش اولماسی گونونه قدر دوام تاپدی. آما رحمتلیک آشیق فرهاد ایله عزیز گؤروشدوکدن سونرا اوستاد فرهاد اونون استعدادینی، گؤزل سسینی و گوجلو حافظه­سینی گؤردوکده، اونو اؤزونه شاگرد قبول ائدیر. آشیق فرهادین یانینا گئدن و اونا خدمت ائدنآشیق عزیز، فرهادین شیوه­سی و پنجه­سینی اؤیره­نیب اورمودا بیر اوستاد آشیق کیمی تانیندی. عزیز آشیق هاوالاری و آشیق داستانلارینی اؤیرندیکدن سونرا، آشیقلیق ایله مشغول اولور. مختلف توی و شنلیک مراسملرینه قاتیلیر. اورمو اهالیسی ده چوخ وعده اونو مجلسلرینه و توی شنلیکلرینه دعوت ائدیردیلر.

او، چالدیغی هاوالاردا آشیق فرهادین یولونون داوامچیسی اولموشدور. آشیق عزیز توی-شنلیک مراسملریندن علاوه هم ده اورمو رادیوسوندا بایراملاردا و مختلف وئرلیشلرده چیخیش ائدرکن، غربی آذربایجان اهالیسینین ائولرینه رادیو واسطه­سی ایله قوناق اولوردو. اوستادی آشیق فرهادی یادلارا سالان عزیز، دئییلنلره گؤره اونون تکجه شاگردی و یا ان آزی اونون یولونون دوامچیسی اولان تکجه شاگردی ایمیش. آشیق عزیز گؤزل و ملاحتلی سسی ایله هله ­ده اورمو آشیق صنعتی سئورلرینین ذهنینده و یادداشیندا خوش خاطره­لر و افسوسلار ایله آنیلیر. آشیق فرهادین ان ماهر و ان اوستاد شاگردی اولان آشیق عزیز، حیاتی بویو یالنیز بیر شاگرد یئتیره بیلدی، اودا جبللی آشیق عباسعلی ایدی. آشیق عباسعلی ­ده اوستادی کیمی، تئز و واختسیز بو دونیادان کؤچور و اونون دونیادان کؤچمه­سی ایله برابر اورمونون ان گؤزل، ان دویغولو و ان اینجهآشیق سبکی اولان دول سبکی قارا تورپاغا قاریشیر. ایندیلرده ­ده(ایندی) اولدوغو کیمی، قدیملر اورمو شهرینده هر آشیق بیر چایخانا و قهوه­خانایا گئدیب اورادا چالیب اوخویارمیش. آشیق عزیز ده ایندیکی مهاباد خیابانی آدلانان و قدیملر اوردا یئرلشن سید حسن مسافرخانا و قهوه­خاناسینا گئدیب اورا گلن ساز هوسکارلارینی گؤزل سسی و سازی ایله یولا سالارمیش.

آشیق عزیزین هنر و صنعت عالمینده فعالیتلری و چالیشیقلاری آردیجیل اولاراق دوام ائدیردی، آما اونون آسم خسته­لیگینه مبتلا اولماسی(بعضیلرین دئدیگینه گؤره آشیق عزیز بیر مدت دگیرمانچی اولوب و بو ایشین سببیندن آسم توتموشدور) ایشلری تام ترسینه چئویریب اوستاد آشیغین سسینده بیر پارا مشکللر یاراتدی. او عؤمرونون سون ایللرینی، بو خسته­لیکله مبارزه­ده کئچیردی و نهایت 7/10/1351 تاریخینده هله اورتا یاشلارینا یئنی قدم قویموش بیر حالدا بو خسته­لیگه تسلیم اولدو و گؤزلرینی بو دونیادان یومدو. بو سئویملی خالق صنعتکاری و ائل آشیغینی سامیرتی کندینین قبرستانلیغیندا، آتاسینین مزاری یانیندا تورپاغا تاپشیردیلار. اونون وفاتیندان 40 ایل کئچمه­سینه باخمایاراق، اینانیریق، اونون روحو هله ده، بو شهرده دولانیر و اؤلمه­ییب و هله­ ده اؤز سبکینی و اونونلا برابر مکتبینی بو یولا آیاق باسان بیر کیمسه­نین وجودوندا گؤرمک ایسته­ییر. نه قدر اورمو وار، بو اوستادین دا آدی دئییله­جک و بو شهرین آدلیملاری سیراسیندان آدی سیلینمه­یه­جک.

آشیق عزیزی اورمو اهالیسینین عزیزی آدلاندیرساق یانیلمامیشیق. اونون آشیق داستانلارینین تعریفله­مه­سی هله ­ده دیللر ازبریدیر. آشیق عزیز چوخ باش آشاغی و متواضع بیر انسان ایمیش، اؤزونو چوخ گؤزه سوخان و تبلیغ ائدن انسانلاردان اولمامیشدیر. بونا گؤره­ ده اؤز دؤورونون آشیقلاری ایله قارشیلیقدا چوخ آز رادیویا گئدیب، اؤزوندن ایسه چوخ آز سس و کاست بیزلره بوراخدی.اونو تانیانلار، دائم اونون اوتانجاقلیغیندان و بیر آبیرلی- حیالی شخص اولدوغوندان دانیشیرلار. ائله اؤلوم سببینین بیر ندنیده بو آبیر-عصمتی اولموشدور. یاخین قوهوملارینین بیری بیر ناتاراز ایش گؤرموش ایمیش. آشیق عزیزده بو سببدن چوخ اوزوله­رک، تهرانا خسته خانایا قالدیریلمیشدیر. او خسته خانادا دئمیشدی، دا من نئجه بو ائل ایچینده باش قووزاییم. بو ایش بئله اولماز، دا من بو دونیادا یاشایا بیلمه رم. عزیز ائله دئدیگی کیمی ده اولور و آسم خسته لیگی شدتلنه رک، خسته خانادا وفات ائدیر.

اونون هله نه قدرده یازیلمامیش ماجرالاری وار. آشیق عزیزین ماجرالارینی توپلاساق، بلکه ده بیر کتاب قدر ماجراسی اولار. بو ماجرالارین هامیسی­دا اونون بؤیوک روحو و اولو شخصیتیندن سؤز آچیر. او مؤمن بیریسی اولاراق، هئچ واخت نمازیندان دؤنمه میشدی. هئچ واخت پولا قوللوق ائتمه میشدیر. اونون دیلیندن اینجیمیش اولان، بیر نفر بئله تاپماق اولماز. بو اوستادین بؤیوکلوگونو آشیق فرهادین اونونلا نئجه رفتار ائتدیگیندن بیلمه­ک اولار. آذربایجان آشیق صنعتینین بؤیوک اوستادی، آشیق فرهاد،عزیزین اوستادی اولاراق، دائما هر مجلسده عزیزین آیاغینا قالخارایمیش. حتی بیر مجلسده بو ایشه عزیزین تانیمایانلارین نئچه­سی اعتراض ائده­رک، بئله دئییرلر: (( عزیز هم سنین شاگردیندیر، همده سنین اوغلون یئرینده دیر. سنده دا بیر آغ ساققال و اوستاد آشیقسان . هله او 30 یاشدا سندن خیردادی. سن نه یه ائله هرگلنده اونون آیاغینا دوروب، بئله احتراملایاناشیسان؟.))، فرهاددا بئله جواب وئرمیشدی: (( من عزیزین شخصیتینه گؤره آیاغا قالخیرام. اونون کیمین بؤیوک انسان و شخصیتلی بیر شخص چتین تاپیلار.)) و یا اونون سولدوزون کهریز عجم کندینده خان ایله نئجه داورانماغی دیللر ازبری دیر. بیرگون کهریز کندینین خانی اونو اوغلونون تویونا دعوت ائده­رک بئله دئییر: (( آشیق، سن بو تویو ائله آپار، بو ماحالدا تک اولسون. من ایسته ین اولسا، هر نه ایسته سن وئره جگم.(کهریز کندینین خانی، ثروتی ایله سولدوز ماحالیندا مشهور ایدی.) عزیزده جماعت ایچینده دئییر نه ایسته سم؟ خان دئییر: بلی. عزیزده دئییر قبول. باشلاییر تویا. سون گوجونو قویور و گؤزل بیر شکیلده تویو باشا چاتدیریر. توی قورتولاندان سونرا، خان دئییر: عزیز سن من ایسته یندنده یوخاری چالدین. ایندی نه ایسته ییرسن؟ عزیزده کند جماعتینده خانین قیزی ایله کوسولو اولدوغونو ائشیتمیش ایمیش. آخی خانین قیزی بیر ساده و کاسب کندلیه اره گئده­رک، خان طرفیندن طرد اولموشدور. آشیق عزیز دئییر من نه پول ایسته ییرم، نه آیری بیرزاد. یالنیز قیزین ایله باریش و اونو اولادین کیمی یاد ائت. خان بو سؤزو قبول ائتمه ییر، عزیزده اورا گلن قوناقلار بئله سسله­نیر: (( آی جماعات، باخین، سیزین یانینیزدا بو کیشی منه سؤز وئرمیشدی، من هر نه ایسته سم اونا عمل ائده. آما ایندی اؤز دئدیگی سؤزو قبول ائتمه ییر. من پول ایسته میرم. یالنیز بو مظلوم قیزین خوشبختلیگینی ایسته ییرم. من گئتدیم، آما هامی بیلسین خان سؤزونون آلتینا ووردو.)). بو سؤز خانین احوالاتینی دگیشمیشدی و عزیزین سؤزونو قبول ائده رک او گوندن قیزی ایله باریشمیدی. بوتون بو ماجالاردان سونرا، آشیق عزیزه یالنیز بیر لقب وئرمک اولار، اودا اورمو شهرینین عزیزی.

هله­لیک الیمیزده اولان کاستلر اوزوندن ائده بیلمیشیک او مرحومون کاستلرده چالدیغی 25-ه یاخین آشیق هاواسینی آییراق و mp3 فایلی شکلینده بیر مجموعه­یه یئرلشدیرک. بورادان آشیق موسیقیسی هوسکارلارینا سسله­نه­رک، اونلاردان خواهش ائدیب ایسته­ییریک، اوستاد آشیغیمیزدان هر تورلو سس و کاست وارلاریدیرسا، بو سسلری بیر یئره توپلاماقدا بیزه یاردیمچی اولسونلار. اونون روحونا بیر فاتحه دئیه­رک، اومود ائدیریک، اورمو آشیقلاری و شهریمیزین گنجلری بو آشیغین یولونون داوامچیسی اولسونلار و گلسینلر اونون کاستلری و بیزه یادگار قالدیغی سسی اوستوندن، اورمو شهرینین اصیل سبکینی یئنیدن جانلاندیرسینلار و یئنی عصرده بیر داها بو شهره شهرت و شرف قازاندیرسینلار. آشیق فرهاد و آشیق عزیز سبکی­نین یئنیدن جانلانماسی اومودو ایله.

 آشیق عزیزین ایکی آشیق هاواسینی سیز عزیز یوردداشلاریما تقدیم ائدیرم.

بو سسلری ائندیرمه میشدن اؤنجه ایکی مسأله نی نظرده توتون:

1- بو سسلر، آشیغین خسته اولدوغو واختلار ضبط ائدیلیب و آشیق عزیز آسمی اولا-اولا بو هاوالاری اوخویوب. خسته واختلاری بئله اوخویان بیرآشیق ، دوشونون اؤنجه لر  نئجه اوخویورموش.

2- بو سسلر استریودا یوخ قدیمی ضبطلر ایله ییغیلیب بوگونه چاتیب.

3- بو سسلرین حجمینی آزالتدیغیمیزا گؤره، کیفیت بیر آز یئنیب.

 

بیرینجی هاوا:

تاجری+ ائندیرین+ دانلود

ایکینجی هاوا:

عثمانلی بحریسی+ ائندیرین+ دانلود

دقت: سسلری داها کیفیتلری و داها کاملین ایسته ییرسینیزسه(تاجری یاریمچیلیقدیر) خبر وئرین ایمیلینیزه گؤندریم.

 

 

آذربایجان اوغلویام

سنین تکین بو دونیادا من ده انسان اوغلویام

آتام- آنام، اصل ذاتیم دوز مسلمان اوغلویام

طبیعتین دؤرد قسمیندن حق تعالا یارادیب

تاریخ لره نظر سالسان مرد میدان اوغلویام

********

تورک ائللری آدلی-سانلی چوخلو قهرمان وئریب

تاریخ لرین پنجه سینده مرد اوغلانلار جان وئریب

ستارخانلار، کاظم خانلار، بابک، نبی قان وئریب

باکری لر گئدن یولون تمیز وجدان اوغلویام

*******************

قوجا زردوشت، دده قورقوت، نسیمی دن یادگار

شهریارلار، علعسگرلر، فضولی لر قالدیلار

آشیق قنبر قوشاچایلی سؤزون سؤیلر آشکار

ایرانلیام تورکو دیللی، آذربایجان اوغلویام 

 

شهریمیزین گنج هنرمندلری، ساجدی قارداشلاری ایله تانیش اولاق./

یازان: احمد اسدی

اورمو شهری، زامان زامان چوخ گوجلو و استعدادلی آشیقلارا، ائو صاحبی اولوب و اونلاری اؤز سینه­سینده بسله ­ییب، بؤیودوبدور. آشیق و آشیقلیق صنعتینین کئچمیشینه باخساق و اورمو آشیقلارینی و آشیق شعری یازان شاعرلرینی نظره آلساق، گؤره­ جگیک، بورادا آشیقلیق و آشیق ادبیاتی ساحه ­سینده، دوللو مصطفی، بالوولو میسکین، آشیق فرهاد، آشیق درویش کیمی اوستادلار یئتیریلیب، بونلارلا یاناشی چوخلو سؤز و ساز اوستادی آذربایجان آشیقلیق مکتبینه هدیه وئریب.

 

Urmu şəhəri zaman-zaman çox güclü və istedadlı aşıqlara ev sahibi olub və onları öz sinəsində bəsləyib və böyüdübdür. Bu aşıqlardan örnək olaraq aşıq Fərhad, aşıq Əziz, aşıq Əli Qırmızıbaş və s.dən ad aparmaq olar. Ama urmuda  bu çağdada aşıqlıq sənətində isedadlı genc aşıqlar ərsəyə yetirilir. Bu genc aşıqlardan biridə sacidi qardaşlarıdı...

 

آشیقلیقدا، پارلاق و زنگین کئچمیشه مالک اولان بو شهر، ایندی ­ده اؤز معنوی وارلیغینی، گنج­لره داشیاراق، گله­ جک نسیلده­ ده اؤزونه مخصوص یئر آییرماق ایسته ­ییر. بو سیرادا ساجدی قاراداشلارینا اشاره ائتمک اولار. ساجدی قارداشلاری سازا و سؤزه چوخ ماراق گؤسترن بیریسی اولوبلار و گله­جک آشیقلارین ایچینده یاخشی ایفالاری ایله، اؤزلرینه مخصوص یئر آییرا بیله­جکلر. اونلارین یاش باخیمیندان کیچیک اولماسینا باخمایاراق، سالونلاردا ایفا ائتدیگی آشیق هاوالارینین عهده­سیندن گلیب و اوستاد آشیقلارین دا آلقیشلارینی قازانیرلار.  ایندی ایسه کئچک اونلاری تانیتدیرماغا:

ساجدی قارداشلاری تانینان، میرعلی اکبر ساجدی و میر رضا ساجدی، 1377-جی ایلین فروردین آییندا، اورمو شهرینده آنادان اولوبلار.  هله اوشاق ایکن آتالارینین قوپوزونون ائشیتلیگینده، بویا باشا چاتیبلار. اونلارین آتاسی، میر اسماعیل ساجدی ده ، ساز- سؤز اهلی و آشیقدیر.

اکبر و رضانین سازا علاقه­سی اوشاق ایکن باشلاییب، آتالاری ائولرینده ساز چالارکن، اؤز دئدیکلرینه گؤره اورمونون آشیقلار درنگی آچیلدیقدان سونرا، اونلار بو درنگه  گئدیب و اوردا مختلف آشیقلارین ایفالارین  و اوخوماقلارین گؤروب، داها چوخ آشیقلیغا ماراقلانیبلار. بونا گؤره­ ده آتالاریندان ایسته­ییبلر، اونلارا ساز اؤیره­ده. آتالاری ­دا واختینین  دار اولدوغونا خاطر و ایشینینده(آشیق اسماعیل، بازاردا چالیشیر) چوخ اولماسینی نظره آلاراق، اونلاری اؤز اوستادی یعنی آشیق قوربانین یانینا گؤندریب، ساز اؤیرنمه­لرینه امکان یاراتدی.

اوستاد آشیق قوربان پورولی علیارین یانینا، اؤنجه رضا گئدیب و علمی صورتده و نت واسطه­سی ایله سازی اؤیرنمگه باشلادی و قیسا زاماندا بیر نئچه آشیق هاواسین اؤیرندی. سید رضادان سونرا، اکبرده  آشیق قوربانین یانینا گئدیب و آشیقلیق صنعتینی اؤیرنمک ایسته­دی. میراکبرین ساز چالماسی و میر رضانین دا اوخوماسی گؤزل و اعلا حدینده اولدوغونا خاطر، اونلار مراسملرده بیرگه چیخیش ائدرلر، اکبر چالار، رضا اوخویار.

بو ایکی قارداش، یوللاریندا داها دا ایره­لی گئتمک ایسته­یه­رک، بیزه خاطرلاتدیلار، «ائده بیلمزدیک بو گؤزللیکده و لطافتلیکده اولان قوپوز سسینی ائشیدک و اونا حیران قالمایاق و علاقه تاپمایاق. بونا گؤره ­ده بوتون گوجوموزو قویاراق، بو صنعتی ایره­لیه گؤتورمک ایسته­ییریک، اولسون کی بیر کیچیک آددیم دا بیز آتاق»

ائله بونا گؤره ­ده، ایندیه کیمی بیر نئچه مراسمده چیخیشلاری اولوب و هله کندلرینده اولان توی مراسملرینده ­ده ، ساجدی قارداشلاری، بیر نئچه هاوا ایفا ائدیبلر.

س

 

سوندا بونو دا دئمه­لی­ییک، میر رضا هم ده قلم اهلی­دیر و قیسا و کیچیک حیکایه و داستانلاری یازماغا باشلاییب، اومودوموز وار، گله­جکده، آشیقلیقلا برابر، بؤیوک یازیچی اولسون و بیزیم گؤزل اورمو شهرینه قلمی ایله افتخارلار  یاراتسین.

آللاهدان اونلارا اوغورلار دیله ­ییریک، یوللاری آچیق، کؤنوللری خوش اولسون.

آشیق جنون((دکتر اکبر بزرگ­امین))

Aşıq Cünun adı ilə tanınan Dr.Əkbər BOZORGƏMİN 1966-ci ildə Urmiyanın Əsgərxan məhəlləsində dünyaya göz açdı. Altı – yeddi yaşlarından Azərbaycan mahnılarını öyrənməyə başladı. 1981-ci ildən saz həvəskarı olub və onu öyrənmək qərarına gəldi. 1995-ci ildə Tehran universitetinin tıb və həkimlik fakultəsindən məzun oldu. 1997-ci ildə Səfi-əddin Urməvi adlı musiqi qrupunu yaradıb və o zamandan bəri sazı ilə dəfələrcə müxtəlif mərasimlərdə və festivallarda çıxış edib........

آشیق جنون آدی ایله تانینان دکتر اکبر بزرگ امین 1344-جو ایلده ادبیات سئور بیر عائله­ده ، اورمو شهرینین عسگرخان محله­سینده دونیایا گؤز آچدی. آلتی یئددی یاشلاریندان آذربایجان ماهنیلارینی اؤیرنمگه باشلادی. اکبر بزرگ امین 1359-جو ایلدن آشیق صنعتی ایله تانیش اولاراق، ساز چالماغی عائیله­وی شکیلده اؤیرندی. ائله بو ایللردن­ده شعر دئمگه باشلامیشدی. آشیق جنون 1373-جو ایلده تهران اونیورسیته­سینین طب فاکولته­سیندن(دانشکده پزشکی تهراندان) دوقتوراسینی آلدی. اؤیرنجی اولان ایللرده، ((ساوالان))، ((ملک خاتون))، ((دلاوران کوچه دلگشا)) و ((آی پارا)) فیلملرینده، سازی و سسی ایله اؤز گؤستریب و اونلارین متن موسیقی لرینده مشهور موسیقی­چی اوستاد فرهاد فخرالدینی ایله ایش بیرلیگی ائدیبدیر.

آشیق جنونون آتاسی اوستاد عباس بزرگ امین(1377-1315) اورمو شهرینین ضیالی­لاریندان ایدی. او ایللر بویو اورمو شهرینین دبیرستانلاریندا ادبیات و عربی معلمی وظیفه­سینده چالیشدی. عباس بزرگ امین گوجلو شاعر و ضیالی ادیب ایدی. وطنینه و ائلینه عشق بسله­میشدی. شعرلرینده، آذربایجان فولکلورو و حماسه لری اؤزل یئر توتوردو.داغ عنصرو شعرلرینده اؤزونه مخصوص یئر آییرمیشدی. ایکی کتاب حاضرلاییب و چاپا بوراخمیشدی: 1- آشیق علعسگرین شعرلری 2- بوستان سعدی­نین تورکجه ترجمه سی.

رحمتلیک عباس بزرگ امین

 ایللر بویو اوره­گی آذربایجان عشقینه دؤیونن عباس بزرگ امین، 1375-جی ایلده تقاعده(بازنشسته اولدو) چاتدی. و آز سونرا سرطان خسته­لیگینه مبتلا اولدو. نهایت 1377-جی ایلین خرداد آییندا دونیاسینی دگیشدی. عباس بزرگ امین سون شعرینی 1377-جی ایلین فروردین آییندا اوغلو آشیق جنونا یازمیشدی. شعری بئله دیر:

عؤمرومو گونومو سازا باغلادیم

  اوغول هر مجلسده چال منی سازدا

کؤنلومونتئللرین یازا باغلادیم

  گل قیشین قهریندن آل منی سازدا

 

باهارین عاشیقین قارا تاپشیرما

  آزادلیق عاشیقین دارا تاپشیرما

قیزیل گول عاشیقین خارا تاپشیرما

 هر مجلسده یادا سال منی سازدا

     

قوجامان اوزانام یازا عاشیغام  

 ائلیمین شؤهرتی سازا عاشیغام

بیرکاتب دردیمی یازا عاشیغام  

 جوشدور ورآغ یاشیل آل منی سازدا

اونوتما هرزامان چال منی سازدا

 

اکبر بزرگ امین ایسه آتاسینا شعر ایله جواب وئرمیشدی:

سازیمی آلارام سینه­م اوستونه

  یانیق کرمی ده چالارام سنی

گئرچکده چاتماساالیم دستینه  

 دویغولار قوینوندا بولارام سنی

کاتب تک دردینین یازانیاوللام

  حسرتین محنتین پوزانی اوللام

ائلیمین شؤهرت لی اوزانی اوللام

  نغمه­ده ن نغمه یه سالارام سنی

 

آغیر هیجرانیندان قلبیمدیشان شان

 چالارام سازیمی بیر آن دورمادان

"جنونام " ای آتا هر یئرده هر آن

  ائللرین یادینا سالارام سنی

اونوتمام سازیمدا چالارام سنی

 

عباس بزرگ امینین اوشاقلاری هنرسئور انسلانلار اولوب ، درس و سواد باخیمینداندا یوخاری مرتبه لره چاتیبلار. بؤیوک قارداشلاری اصغر داروسازی رشته­سینده دوقتوراسی وار و آلماندا چالیشیر . کیچیک قارداشی ایسه جواد، دامپزشکی دوقتوراسی وار و اورمو شهرینده دامپزشکی داواخانا آچیبدیر. اکبر بزرگ امین ایسه اورمو شهرینده مطبی وار و طبابت ایله مشغولدور. آشیق جنونون عمیسی سایین جعفربزرگ امین جنابلاریدا ادبیات اهلی دیلر. شاعر و انتقادچی کیمی تانینان جعفر بزرگ امین ایندی لیکده تبریز شهرینده ساکندیر. بزرگ امین قارداشلاری آشیقدیلار

آشیق جنون اورمو شهرینده 1375-جی ایلدن بری ((صفی الدین اورموی)) آدینا موسیقی گروهونو یارادیب و دفعه لرله کنسرتلرده ، تلویزوندا و ها بئله تورکیه­ده چیخیشلاری اولوب.  . آشیق جنونون یازا عاشیغام آدلی شعر کتابی ۱۳۷۹-جو ایلده ایشیق اوزو گؤروبدور.

شعرلری:

ییخمالی ییق بیز

هر آن بوسقودادیر، غصه­یله کدر

سئوینجله قارشینا چیخمالی­ییق بیز

تئللی ساز سینه ده، شیرین سؤز دیلده

غمین سارایینی ییخمالی­ییق بیز

 

آیریلیق کولونو قوروتماق اوچون

وصالدان بیر دونیا یاراتماق اوچون

یاد کؤکون باخچادان قوپارتماق اوچون

یاخشی دوست الینی سیخمالی­ییق بیز

 

((جنون)) نغمه دئییر بیزیم ائللره

اودورکی دوشوبدور آدی دیللره

کؤنولده مین آرزی چیخیب یوللارا

دایانماز بولاق تک، آخمالی­ییق بیز

 

دئمک اولماز

عشق اودو اولماسا شعرین دالیندا

اونا شعر نه دئمک، سؤز دئمک اولماز!

بیر اوجاق یانماسا، قیزیندیرماسا

اوندا اولان کولدور، کؤز دئمک اولماز

 

اوجوز ساتیلیرسا، نورلو حقیقت

بیر پولا دگمیرسه، دوزلوک صداقت

اورداکی یالانا وئریلسه قیمت

حقیقت دانیشیب، دوز دئمک اولماز

 

خزان حؤکم ائیله سه، یاز مجلسینده

دردبیلن اولورسا آز، مجلسینده

آنلاماز اگلشسه، ساز مجلسینده

((جنونا)) صبر ائله، دؤز دئمک اولماز

 

قارداشی آشیق دومانین کسیلمیش بارماغینی درمان ائدن حکیمه یازیبدیر:

((تئللی سازی کیم چالاجاق!))

حکیم دوستوم سنه قوربان

تئللی سازی کیم چالاجاق!

بارماقلارا باغیشلا جان

تئللی سازی کیم چالاجاق!

 

ائلین گؤزو باخیر سنه

بارماقلارا جان وئر یئنه

یالواریرام، دؤنه-دؤنه

تئللی سازی کیم چالاجاق!

 

ساز آغلاییر سیزین-سیزین

سس اوخشاییر حزین-حزین

بوغماگینان ائل نفسین

تئللی سازی کیم چالاجاق!

 

یاسا باتیب ساز عالمی

دایانماییر گؤزون نمی

اود توت، آلیش، یان ((کرمی))

تئللی سازی کیم چالاجاق!

 

گرایلی لار قارا باغلار

بایاتی لار کؤنول داغلار

پرده، بارماغی سوراغلار

تئللی سازی کیم چالاجاق!

 

ایندی حکیم یئتیش دادا

((جنون)) یاندی بئله اودا

قیزیل بارماق گئتدی بادا

تئللی سازی کیم چالاجاق!

اونودولموش اوزانلاریمیزدان، آشیق قوربان موسیقی

(57 ایل  آشیق قوربانین وفاتیندان سونرا ، بو یازی آشیغیمیزین حاقیندا یازیلان ایلک یازی دیر.)

یازان: احمد اسدی

جمال آوالی آشیق قوربان آدی ایله تانینان، آشیق قوربان موسیقی تقریبی اولاراق، 1268-جی ایلده اورمونون جمال آوا کندینده دونیایا گؤز آچدی. آتاسی لک طایفاسینین خانلاریندان ایدی. اونلارین ائلی، سالماسین لک ماحالیندان جمال آوا کندینه یایلاق- قیشلاق ائدیرمیشلر. آما سویوق قیشلارین بیرینده، جمال آوا کندینده اونلارین مال-داوارلارینی بوران و شاختا وورور. بو ایشین نتیجه سینده 5000 باش قویونلارینی الدن وئریرلر. بونا گؤره­ده ائللری جمال آوا کندینی مسکن ائدیب، اورادا قالارگی اولورلار.

قوربان 20 یاشینا چاتدیقدان سونرا، آشیقلیق هوسینه دوشور و موسیقی دالیجا گئدیر. (موسیقی­یه علاقه­سینه گؤره ده، اونون سوی آدینی موسیقی سئچیرلر). او زمانلار خویدا بیر آیدین اوره­کلی و اوستاد آشیق یاشاییرمیش، آدینا کورفرهاد دئییرمیشلر. قوربان دا آشیق فرهادی اؤزونه اوستاد سئچیب، اونون محضرینه گئدیب ساز چالماقایله اوخوماغی اؤیره­نمگه باشلاییر. اؤنجه آشیق فرهاد اونون اللرینی لمس ائده­رک، بارماقلارینین یوغون اولدوغونو دئیه­رک، اونون ساز چالانمایاجاغینی بیلدیریر. آما قوربان تصمیمین توتموشدور و هئچ نه اونو اؤز یولوندان دؤند­ره بیلمزدی.
 آشیقلیق عشقی قوربانی گئری دؤنمگه قویماییر و بو یولدان ال چکمه­ییر. بیر نئچه مدت آشیق فرهادین یانینا گئدن، قوربان، اونون سئچیلن و ساییلان شاگردلریندن اولور و آشیقلیق استعدادینی هر کسه نشان وئریر. گؤزل و اینجه دویغولارینی سازلا قوووشدوروب، آشیقلیغا باشلاییر.

 قوربان ائله سازی اؤیره­ندیگی یئر، یعنی خویدا آشیقلیق ائدیب اورادا قالارگی اولور. خویدان ائولنن آشیق قوربان، ایکی قیز، بیر اوغلان آتاسی اولور و خویدا بیر-بیرینین آردیندان آشیقلیقلا برابر خوش گونلری کئچیریر.
آما بو خوش گونلر دوام تاپماییر و آذربایجانین بلالی ایللری گلیب چاتیر. آذربایجانین غرب بؤلگه­سی چئشیتلی هجوملار و باسقینلارا معروض قالیر. ارمنی-جیلو دسته­لری خوی، سالماس، اورمو، سولدوزا باسقین ائدیرلر و چوخلو آذربایجان اهالسینی اؤلدوروب یوردلارینی ویران قویورلار.

ارمنی لرین باسقینی ایله برابر، خوی شهری 1296-جی ایلده ارمنی دسته­لرینین 57 گونلوک محاصره­سینده قالیر. بونونلا برابر، آجلیق و قحطلیک باش وئریر. یئمگه و قارین دویوزدورماق اوچون هئچ نه تاپیلماییر. بونا گؤره ده، خوی اهالیسینین چوخو خسته­لنرک، سوء تغذیه و سوء هاضمه خسته­لیکلرینه توش گلیرلر. بو ایش، آشیق قوربانین اوشاقلاریندان دا یان کئچمه­ییر، اونلاری دا یاخالاییب، اؤلوملرینه سبب اولور. قوربانین حیات یولداشی دا اوشاقلارینین دقّینی گتیریب، وفات ائیله ییر.

قوربان، بیر داها خویدا، تک و یالقیز قالیر. بو اوزدن خویدان چیخیب، دیلمانا یوللانیر. دیلماندا آشیقلیق ائدیب، گونونو کئچیریر. بیر نئچه مدت دیلماندا یاشادیقدان سونرا، بیر دول آرواد ایله عائله حیاتی قوروب و اورادا قالارگی اولور. قوربانین دیلماندا قالدیغی ایللرده، اوچ اوغلو دونیایا گلیر.

علی(1302)، ولی(1304)، قولو(1306). فلکین الیندن، آجیلار چکن قوربان، یئنه ده فلگین بلاسی ایله راستلاشیر. 1310-جو ایلده دیلمانا بؤیوک بیر زلزله گلیب، هر نه­یی یئر ایله بیر ائدیب دیلماندان یالنیز بیر تورپاقلی تپه قالیر. خوشبختچیلیکدن بو دفعه قوربانین عائله­سی، جان ساغلیغیایله، بو بلادان قورتولورلار. او زمان دیلمانین یئرینه، سالماس آددا یئنی بیر شهر سالینیر.

 قوربان دا اورا گئدیب، بیر ائو تیکیر و سالماسدا قالیر. سالماسدا، 1312-جی ایلده آشیغین خدیجه آدلی بیر قیزی دونیایا گلیر. بیر نئچه مدت سونرا، سالماسدا یاشایا بیلمه­ین و اؤز کندلرینی اؤزله­ین، آشیق قوربان، کندلرینه قاییدیر. قوربانین جمال آوایا گیریشی ایله، آتاسی وفات ائیله ییر. آتاسینین جسدینی قوشچویا داشیان واختدا، یولدا آتاسی حاقدا مرثیه لر و آغی لار اوخویاراق، قوشچودا تورپاغا تاپشیریر.

یئنه ده، روزگار قورباندان دؤنور، 1317-جی ایلده بیر داها حیات یولداشی فاطما خانیمی ایتیریر، قوربان یئنه ده یالقیز قالیر. بیر داها ائولنمه­ین، قوربان، آشیقلیغا گئتدیگی گونلر، اوشاقلارینی باجیسینا تاپشیریب، چاغیریلدیغی  یئرلره یوللانیر.

اؤز دؤورونده انزل ماحالینین ان آدلیم آشیغی اولان، قوربان موسیقی، سازی و سؤزو ایله توی شنلیک مراسملرینه قاتیلیر. ها بئله، انزل ماحالیندا، دیل جلمانی آدی ایله مشهور اولان، جلمان(یاللی) ریتم لرینی اوستالیقلا ایفا ائدیر.
چوخ شیرین صحبت و داستانلاری ایله مشهور اولان قوربان موسیقی، جمال آوا کندینین قهوه خاناسیندا  چوخلارینا بو شفاهی خالق داستانلاریندان اؤیره­دیر. آما بیر داهادا چرخ، دؤنور و بو دفعه سیرا دموکرات کوردلرینده­دیر. دموکرات کوردلری، انزل ماحالینا یورویوب، نئچه کندی و اونونلا برابر عائله­لرینی تالان ائدیرلر. بو تالاندان، قوربانین عائله­سی ده، نصیبسیز قالماییر و پایینی آلیر.

 عؤمرونون سون گونلرینه قدر، آشیقلیق ایله مشغول اولان، آشیق قوربان موسیقی نهایت 1334-جو ایلده، بیر سویوق قیش گونونده، جمال آوا کندینین قهوه خاناسیندا گاز ایله زهرلنیب و مسموم اولور و ایکی گوندن سونرا بو دونیانی ترک ائده­رک، ابدیته قووشور.

 اونو جمال آوا کندینین مزارلیغیندا دفن ائدیرلر. اوشاقلارینین دئدیگینه گؤره، عؤمرونون یاشادیغی ایللرده، دائم غرور و عزت ایله یاشامیشدی و فلکین مختلف سیناقلاریندان باش اوجا چیخمشدیر.

آشیق قوربان هم ده، بیر مؤمن و اعتقادلی مسلمان­ ایدی. او محرم و صفر آیلارینا خاص حؤرمت بسله­میشدی. قوربان، محرم و صفر آیلاریندا، سازینین پرده­لرینی و سیملرینی آچاراق، بو آیلاردان سونرا، بیر داها سازینا پرده و سیم قوشورموش. بو دا اونون بو آیلاردا هوس ائدیب  ساز چالما فکرینه دوشمه­سینین قارشیسینی آلماسی سببیندنایدی.اونون سازی هله ده قالیر و اؤز نوه سینین ائوینده دیر.
دئییلنلره گؤره، اؤزونه مخصوص ابهتی وار ایمیش و آشیقلیقدا، آشیقلیق شخصیتینه چاتمیش ایدی.اورمونون آدلیم آشیغی، آشیق فرهاد ایله ده، دوستلوق علاقه­لری وار ایمیش و اونون شاگردلرینه ده چوخ سؤزلر اؤیره­تمیشدیر. آشیق درویش کیمی، بؤیوک آشیقلاردا اوندان بیر واختلار سؤز-صحبت اؤیره­نمیش ایمیشلر.

او گئتدی، آما اونون آدی و یادی بوگون دیللرده قالیب و یاشاییر و خوش سؤزلر ایله آنیلیر. هله ده شهریمیزین قوجامان انسانلاری اونون سؤز-صحبتی و مردانه­لیگیندن دئییرلر.بو دونیادا انسانین اؤلوموندن سونرا، یاخشی آد قالیرسا، نه یاخشی. بئله انسانلارین یاشاییشلاری دا بیزه اؤرنک اولمالیدیر. بو دونیادا انساندان بیر قورو آد قالار، او دا پیس اولسا نه­یه دگر. سؤز صرافی خسته قاسم دئمیشکن:

خسته قاسم, کیمه قیلسین دادینی؟

جانی چیخسین, اؤزو چکسین اودونو

یاخشی ایگید یامان ائتمز آدینی

یامان آددان چونکو اؤلوم یاخشیدی

_____________________

آشیغیمیزین نتیجه سی، مهندس سعید موثق خواه دان بیلگی لری اختیاریمیزا قویماغینا گؤره تشکر ائدیرم.

عزیز اوخوجولاریمیز، آشیق قوربان حاقدا  هر تورلو بیلگینیز وارسا، بو یازینی گئنیشلندیرمکده بیزه یاردیم ائدین، لطفاً.

___________________________________

دگرلی اوخوجولار، سایین محمود غلامی جنابلاری اورمونون کهریز کندیندن وبلاگیمیزا باخیش یازاراق، آشیق قوربان حاقدا بو معلوماتی وئردی....

((بیر گون آشیق قوربان سالماس شهرینده اولان باخچاجیق کندینه گئدیر. بو کند آشیق اهلی دگیلمیشلر و قوربانی تمسخر ائدیرلر. حتی بونو تویا آپاریب اونا پول وئرمیرلر....

آشیق قورباندا او کنددن چیخاندا بیر شعر قوشور. کی منیم بیر بندی ذهنیمده قالیبدیر. من بونو کندیمیزین قوجالاریندان ائشیتمیشدیم.

وبا گلسین قوجالاری ایزله سین

گؤی اؤسکوره ک اوشاقلاری گؤزله سین

بیر سئل گلسین کندینیزی دوزله سین

گؤرن دئسین هایاندادیر باخچاجیق.))

----

سایین محمود غلامی یه اؤز تشکرومو بیلدیریره م.

اورمو شهرینین آدلیملاریندان ،آشیق فرهاد سلیم اوغلو

 یازان: احمد اسدی

اورمونون دول ماحالی ، کئچمیشلردن بری سؤز-صنعت بئشیگی اولوب. بو ماحالدا چوخلو ساز-سؤز هوسکاری بؤیویوب بویا-باشا چاتیبلار. دول انسانی نین، هنرسئورلیگی هرکسه آیدین و  آچیقدیر. بو ماحالدا یئتیشین اوستادلارین سایی آز اولماییب. ائله بونا گؤره¬ده تاریخلرین سینه سینده، اوستاد آشیقلارا و شاعرلره مسکن اولاراق، اونلاری بسله ییب. بو ماحالین اوستاد آشیقلاریندان بیری ده، اوستاد آشیق فرهاد اولموشدور.1273-جو ایلده دول ماحالیندا دوغولان، فرهاد، گنج چاغلاریندا ساز و سؤزه ماراق گؤستره رک، آشیق جوادین یانینا گئدیب اونا خدمت ائدیر. ایللر بویو اونا شاگردلیک ائتدیکدن سونرا، بیر اوستاد آشیق کیمی اورمو بؤلگه سی و آذربایجان دیاریندا تانینیر. واختی ایله، اؤز دورونون ان آدلیم آشیغی اولان فرهاد، عؤمرو بویو مختلف حاقسیزلیقلار و ظلملرله قارشی-قارشیا گلرکن، یولوندا دیم-دیک بیر چینار تک دایانیر و هئچ نه اونو اؤز یولوندان دؤندره بیلمه ییر.

 بیر واختلار اورمودا اولان جووود عائله لرین حیله لری ایله،چالیب  اوخوماغی اورمودا یاساق اولارکن، آرازی آتلاییب، او تایا کئچیر. اورادادا اونو چکمه¬ین دئمه چوخ ایمیش، آشیق فرهاد مجبوراً یئنه سفر ائدیب، اورمویا قاییدیر. آشیق فرهاد نئچه ایللر سورگونده یاشاییر. ایللر بویو اورمو حاکمی و پلیسی ایله اوز-اوزه دوران فرهاد،  مجبوراً  بئش سفر گورجوستان ولایتی و بورچالی ماحالینا ائدیب  اورادا آشیقلیقلا مشغول اولموشدور. کئچمیشلردن بری دول ماحالی ایله، بورچالی ماحالی انسانی بیر-بیرلری ایله ایلگیده اولموشدور. ائله بونا گؤره ده، بو ایکی ماحالین صنعتکارلاریدا، بیر-بیرلرینی تانییب، گئت گلده اولوبلار. بونلاردان حتی بعضی لریده آشیق دوللو اباذره تای اورا گئده رک، قالارگی اولموشدور. دوللو اباذر 1851-جی ایلده اورمونون دول  ماحالیندا دوغولوب 1881-جی ایلده 30 یاشی اولدوغو واختدا بیر دفعه لیک، اورمودان کؤچه رک، بورچالی ماحالینا یوللانمیشدیر. اباذر گئدیشی ایله برابر، اورمو مکتبی نین بیر سیرا هاوالارینین بورچالی مکتبینه داشی¬ییجی سی اولاراق ، اورادا مختلف شاگردلر یئتیرمیشدیر. بونلاردان ان آدلیمی، آشیق حسین ساراچلی دیر. آشیق حسین ساراچلی نین سازی و سؤزو هله ده دیللر ازبری دیر و هله ده او تایدا, اونون اوستادلیغی دیللرده گزیر.

آشیق فرهاد سونسوز بیریسی ایدی و بونا گؤره ده اوشاغی اولمامیش ایدی.  اوشاغی اولمادیغی اوچون، بوگونده اونونلا ایلگیلی آرتیق معلومات توپلاماق اوچون بیر ایز یوخدور. اونون اوستادی یعنی آشیق جواددا سونسوز ایمیش.  اوستادینین اوشاغی اولمادیغینا گؤره اوستادینی عؤمرونون سونونا قدر ائوینده ساخلاییر. هابئله اونون حیات یولداشینی آشیق جوادین وفاتیندان سونرادا ائوینده ساخلاماسیدا، اونون نه قدر بؤیوک انسان اولدوغونو ثبوتا یئتیریر. حتی اوستادینین خانیمی بیرگون دا چوخ قوجالمیش ایمیش و پیس وضعیتده ایمیش، آشیق فرهاددان اونو آپاریب چؤللرده بوراخماسینی ایسته ییر. آشیق فرهاددا بو سؤزدن چوخ اوزوله رک، اونو عؤمرونون سونونا قدر ساخلاماغی بورجونو خاطرلاداراق دئییر: بو منه، بیر بورج دور. من سنه یاخشی لیق ائتمه ییرم. یالنیز وظیفه می یئرینه یئتیریرم. هر نه اولور اولسون، حتی منیم حیات یولداشیمدا بیرگون سندن یورولسا، اؤزوم تکجه وتک باشیما سنین هر نه یینی یئرینه یئتیره جگم. اولا بیلسین، حتی سنه خاطر بوتون مالیمی قویام  آما بیل سنی بوراخمارام.   عؤمور بویو دوزلوک و صافلیق ایله، یاشایان فرهاد اورمونون کئچه چیلر محله سینده یاشامیشدیر. اؤز دورونون اوستاد آشیقلاری نین قارشیسیندا گؤزل و اوجا سسی ایله سئچیلیرمیش.

 اونو بیر دیندار بیریسیده دئییرلر. فرهاد اورمونون سوننو مذهب تورکلریندن اولاراق، بیر دفعه کربلا زیارتینه گئدیب اورالاری گزمیشدیر. بونا گؤره ده یاخینلاری اونو کربلایی فرهاددا دئیه رمیشلر. چوخ تمیز اوره ک و دینه باغلی اولان فرهاد، اؤز دورونون آشیقلاری ایله، فرقلی اولاراق(پاخیل دگیلدی)، هامی نی آشیقلیغی اؤیره نمه یه دعوت ائدرمیش.

 مختلف شهرلرده و ماحاللاردا چیخیشی اولان، فرهاد، نئچه نفرلری آشیقلیقدا باغلایاراق، اؤز اوستادلیغینی هامی¬یا ثبوتا یئتیرمیشدیر. بونلاردان بیر نمونه، تورکیه لی آشیق قوجالارین آدینی چکمک اولار. آشیق قوجالار اورمویا گلدیگینده شهرچایی ساحلینده مجلس قورولموشدو. فرهاد ایله قوجالارین باغلاشمالاری یئددی گون اوزانمیشدیر، آما نهایت فرهاد قوجالاری  باغلایاراق، اونون سازینی الیندن آلمیشدیر. فرهادین گؤزللمه، دیوانی، شاغی کیمی هاوالاری هله ده شهریمیزین قوجالاری طرفیندن به به-چه چه ایله تعریفله نیر. او اورمو آشیق مکتبینه، بیر هاوادا هدیه ائتمیشدیر؛ اودا شاغی هاواسی دیر. شاغی طایفالاریندان الهام آلاراق، بو هاوانی یارادان فرهاد، قیسا زماندا آشیقلارین دیللرینه دوشموش و ماحاللاری آشاراق، بیر گؤزل آشیق هاواسینا چئوریلمیشدی. بو هاوانی ایندی غربی آذربایجان آشیقلارینین هامیسی بیلیر و بیر کلاسیک آشیق هاواسی کیمی یئرینه دوشوب.

 اونون یئتیرمه لریندن و شاگردلریندن سامیرتیلی آشیق عزیزین آدینی چکمک اولار. اوستاد آشیق عزیز، نئچه ایللر فرهادین یانیندا اونا خدمت ائدیب ساز اؤیره نمیشدیر. ائشیتدیگیمیزه گؤره، چوخ واختلار اونلارین سسلرینی بیر-بیریندن آییرماق اولماییرمیش و اوستاد ایله شاگردین سسی اوست-اوسته دوشورموش. عزیزده اوستادی فرهادا تای، کامل اوستاد ایمیش و او چالان هاوالاری هله ده کیمسه چالا بیلمه ییب. بعضی لر اؤزلرینی آشیق فرهادین آدلیم اولدوغونا گؤره، اونا منسوب ائتمه لرینه باخمایاراق، دئیینلره گؤره ائله فرهادین تکجه بو شاگردی وار ایمیش. عزیزین پنجه سی و ساز چالما قایداسیدا بونو ثبوتا یئتیریر. آشیق فرهادین گؤزل سسی و گؤزل ساز چالماسی ایللرین دگیرمانیندان کئچه رک، تعریفاتی بوگونه قدر گلیب چاتیب. بودا اونون نه قدر اوستاد اولدوغو و نه قدر سئویلدیگینی گؤستریر. نیه کی، اونونلا بیر زمان یاشایان آشیقلارین چوخوندان بیر آددا بئله قالماییب.

 اورمودا قهوه لرده اوخودوغو واختلار، قهوه خانالاردا، ایگنه سالماغا یئر اولماییرمیش. حتی قهوه چی مجبور اولورموش، جمعیتین چوخ اولدوغونا گؤره قهوه نین قاپیسینی باغلاسین و گلنلری قایتارسین. اونون سسینین نه قدر گوجلو و اوجا اولدوغونو بوگون بیزلر بیلمه ییریک، آما دئییلنلره گؤره هاچان اوخوسا ایدی، دا کیمسه جرأت ائدیب اوخویا بیلمز ایمیش.

یوردوموزون قوجامان و آغ ساققال انسانلاریندان ائشیتدیگیمه گؤره، گؤزل لیکده و اوجالیقدا او بیری آشیقلارین سسی  اونون حتی یاریسیدا اولا بیلمزدی. لبه دار تاخارمیش، تاخمایان واختلار ایسه، شلمه یه تای بیر پارچا باشینا دولارمیش. اوجا بوی ایمیش و سازی قارنی اوسته چالارمیش( قارنی او قدر یوغون ایمیش، ساز قارنی اوسته دورورموش. آما اونون جوانلیقلارینی گؤرنلر، اونو آریق بیریسی تعریفله ییردیلر). اونون هنر و صنعت عالمینده،پارلاقلیغی ، عؤمرونون سون ایللرینده، ائله ده یاخشی دوام ائتمه میشدی.

 فرهادین عؤمرونون سون ایلینده سسی ضعیفله یه رک، دای مجلسی دولاندیرماغا جواب وئرمه میشدی. بونا گؤره ده، خوشا گلمز ماجرالار باشینا گلمیشدیر. او قهوه ده اولدوغو بیرواختدا ، قهوه چی بیر آیری آشیغا پول وئره رک، اونو قهوه یه گتیریب فرهادین یئرینه چالاجاغینی بیلدیرمیشدیر. بو سؤزدن چوخ اوزولن فرهاد سازینی گؤتوره رک، اورادان چیخمیشدیر.

 تأسفله، آشیق فرهادین اؤلوموندن 50 ایل اؤتمه سینه باخمایاراق، اوندان بیر نشان و اثر قالماییب. تکجه بیر شکیل و ایکی  آشیق هاواسی. بو آشیق هاوالاریدا، بو تزه لیکده(90-نجی) ایلده طرفیمیزدن تاپیلمیشدیر.  یوخسا اوندان اؤنجه، بو سسلرده یوخ ایدی. بودا بیر شهرین، نه قدر آدلیملارینا و صنعتکارلارینا صاحب چیخماسینین سیمگه سی اولا بیلر. شهریمیزین آغ ساققاللاریندا ائشیتمیشیک، او اوستادین سسینی بیر دفعه تهراندان گلیب، قدیم گرامافون صحیفه لرینه ضبط ائدیب آپاریبلار. کیملر گلیب؟ هاچان گلیب؟ بللی دگیل. منیم تهراندا صداوسیما آرشیوینده نئچه ایللر اؤنجه چالیشان بیریسیندن خبر آلدیغیما گؤره، فرهادین او اداره نین آرشیوینده، اون بئشه یاخین هاواسینین موجود اولدوغونا اینانمیشام. آما بو سؤزو بیلمک بیر مسأله، آشیغین سسلرینی(اولورسا) او آرشیودن ائشیگه چیخارتما یوز مسأله.

 آشیق فرهاد نهایت ۲/۱۱/۱۳۴۱ تاریخینده گؤزلرینی بو دونیادان یوماراق، سون منزله یوللاندی. اونون مزارینین بوگون ایتگین اولماسی، ان گولونج مسأله لردندیر. نیه کی، اونون وفاتیندان،  نئچه یوز ایللر یوخ، اللی ایل اؤتور. اللی ایلده بیر مزارین ایتیب، باتماسینا چوخ قیسا بیر زماندیر.

بوگون بیلمه ییریک، اونو هارادا دفن ائدیب، قویلاییبلار. بیر سیرا ادعالاری اولانلاردا وار، دئییرلر بیز فرهاد ایله بئله قارداش ایدیق، بئله یولداش ایدیق، آما اونلاردا هره سی بیر سؤز دئییر. حتی نئچه سی اونون مزارینین ایتگین اولماسینا اعتراض ائده رک، اونا صاحب چیخماماق اوچون هامی یا، انتقاد ائدیرلر. بونلاردان سوروشماغیمیز یاخشی اولار:  به سیز نیه صاحب چیخماییبسینیز؟ ان آزی ائده بیلردینیز، اونون قبرینین آدرسینی خاطرینیزدا ساخلایاسینیز. هر حالدا بوگون اونون قبری ایتگیندیر. کیمسه نین¬ده خبری یوخدور. بیری دئییر، کندلرینده باسدیریبلار. بیری دئییر یوخ ائله اورمونون آغا قبیری قبریستانلیغیندادیر، آما داشینی سیندیریبلار و داها تاپماق اولماز. بیری دئییر، آغاقبیری مزارلیغینا دووار چکنده، دووار آلتدا قالدی.

بونلار هامیسی بیر شهرین نه قدر باشی سویوق و هنره اهمیت وئرمه دیگینین نشانه لریندن بیری اولا بیلر. من اؤزوم شخصاًده اورمونون آغاقبیری قبریستانینین دفترینه مراجعت ائتمیشم، آما یئنه ده فایداسی اولماییب. اونلار یالنیز 20-30 ایل بوندان اؤلنلرین یئرلرینی بیلیرلر و لیسته¬ یه کئچیبلر.

آشیق فرهادین سس فایللاری و مزارینین بولونماسی و ها بئله ملتمیزین ائل صنعتکارلارینا آرتیق دگر وئرمه سی اومودو ایله.

 آشیق فرهادین سس فایللارینی ائندیرمک اوچون آشاغیدا اولان لینکلری تیکلایین ، بو سسلر تزه لیکده طرفیمیزدن تاپیلیب. بو سسلری سیز عزیز اوخوجولاریمیزا سونوروق. لطفاً دانلود ائتسه نیز، نظر وئرمگی اونوتمایین و بیزه بو سسلر حاقدا نه دوشوندوگونوزو سؤیله یین.

بیرینجی هاوا۷۶۵ کیلوبایت : تیکلایین +تاجری

ایکینجی هاوا۷۳۲ کیلوبایت: تیکلایین+ جمشیدی

 

دقت:

سیزی حوزه هنری تبلیغات اسلامی سایتیندادا  آشیق فرهادین بیوگرافیسینی اوخوماغا دعوت ائدیرم. لطفاً بو سایتادا گئدیب، اورادادا بو آشیغین بیوگرافیسینی اوخویون

بورانی تیکلایین 

اوزانلار دیاری­نین غریب اوزانی

 

یازان : احمد اسدی

( بو یازی آشیق حسین اوزانلی نین ۲۲ ایل وفاتیندان کئچمه سینه باخمایاراق، اونون حاقیندا یازیلان ایلک یازی دیر.)

 یوردوموز آشیق صنعتینین بئشیگی اولاراق، هر کندینده و شهرینده آشیقلارین ایزی ایله راستلاشماق اولور.
 بو سیرادا آشیقلارین آدی ایله ایلگیلی کندلریمیزه ده راست گلمک اولور. قاراداغدا اوزان  و آشیقلی کندلری، سایین قالادا یوخاری اوزان و آشاغی اوزان کندلری، زنجانین هجه­ریسینده اوزان کندی، اورمودا ایسه اوزان ملیک، اوزان اسکندری و قیزیل آشیق کندلری.

 بو کندلره نه­دن بو آدلارین وئریلمکلری، هله لیک بیزه آیدین دگیل. آما بیر زاد آیدیندیر، او دا بو، خاطرلاتدیغیمیز کندلرین جماعتی کئچمیشده آشیق اهلی اولوب و سؤز-صحبت بیلیرمیشلر. اولا بیلر اوزاق کئچمیشلرده بو کندلر اوستاد اوزانلارین مسکنی اولوبلار و یا اؤز بؤلگه­لرینده اوزان-آشیق اوجاغی اولوبلار.

 سؤزوموز اورمونون اوزان کندینده­دیر. اوزان آدی ایله مشهور اولان اوزان ملیک، اورمونون باراندوز ماحالیندا یئرلشیر.
 بو کندین اورمو شهری ایله آنجاق نئچه کیلومتر آراسی وار. باراندوز ماحالی اولو آشیق، شاعر و عارفیمیز دوللو مصطفانین اؤز وصیتی اوزره تورپاغا تاپشیریلدیغی یئردی.

دوللو مصطفی نیه باراندوزدا تورپاغا تاپشیریلماغینی ایسته­ییب؟ بو اؤزو بیر مسئله­دیر. اولا بیلر، کئچمیشده، بورا آشیق اوجاغی اولوب.(اوزان کندینینده آدی بونونلا ایلگیلی اولا بیلر.) بلکه دوللو مصطفا دا اونون اوچون اؤز دوغما ماحالیندا یوخ، باراندوزدا مزارینین سالینماسینی ایسته­ییب.

آما هر نه دی، دوللو مصطفانین مئیلینی باراندوزا سالان بیر جاذبه وار ایمیش. هله دوللو مصطفادان یاریم عصر سونرا باراندوز کندینده آشیق حسن چوبان(خان چوبان) آدلی بیر اوستاد آشیق دا یاشاییرمیش. اورمونون آدلیم آشیغی، آشیق درویش ده اونون شاگردلریندندیر.

 آشیق درویش جوان ایکن، آشیق چوبانا خدمت ائتمگه باراندوزا یوللانیب، ایکی ایل آشیق چوبانا شاگردلیک ائدیر.
 ایندی آشیق درویش سبکی ایله مشهور اولان، سبک ده منجه ائله باراندوز سبکیدیر. آنجاق، او ماحالدان بو سون دؤورده اوستاد آشیقلارین اولماماسی، باراندوز سبکینین آدینی ایتیریب و آشیق درویشین ده آدلیم اولماسینا گؤره، بو سبکین آدی دگیشیلرک، درویش آدینا دئییلیب.

آما کئچک اوزانا. باراندوزدا یئرلشن اوزان کندینین جماعتی علوی(اهل حق) تورکلریندن تشکیل تاپیب. بو کندده اؤنجه­لر ایکی آشیق یاشاییب. بیری آشیق امراه اوزانلی و او بیریسی آشیق حسین اوزانلی.

 آشیق امراهین نه زمان یاشاییب، نه زمان وفات ائدیگیندن خبریمیز یوخدور. ان آزی 100 ایل بوندان اؤنجه یاشامیش اولا بیلر. آما سؤزوموز آشیق حسین اوزانلی اوستونده­دیر.

 آشیق حسین اوزانلی آدی ایله مشهور اولان، حسین محمد اوغلو سلطانی ،1305-جی گونش ایلینده اوزان ملیک کندینده دونیایا گؤز آچدی. آشیق حسین اورمونون علوی تورکلریندن­ایدی. بو دگرلی آشیق اوشاق ایکن آناسینی ایتیره­رک، یتیم قالمیشدیر.

اونون سازا- سؤزه علاقه­سی یئنی یئتمه دؤورلریندن باشلایب، تقریباً 20 یاشی اولدوغو بیر واختدا آشیقلیغا مشغول اولور. مختلف کندلره و شهرلره تویلارا گئدیر.

 آشیق حسین جوانلیقدا اورمویا کؤچور و بیر آز مدتده قوشاچایدا یاشاییر. اونون بیر قیزی، بیر اوغلو واردیر.
آشیق حسینین اؤزونه مخصوص سبکی اولاراق، سازی، بو بیری آشیقلاردان بیر آز فرقلی چالیرمیش. آشیق حسینین اوخوماغی و صحبتلرده دئییشیده، اؤزونه مخصوص ایدی.

 شیرین دیلی و خوش لهجه­سی ایله داستانلاری اوستاجاسینا ایفا ائدیردی. اونون قوپوزو دا فرقلی ایمیش.
بیلدیگیمیزه گؤره اورمو آشیق مکتبینده قوپوزون تئللری 7 و تبریز-قره­داغ آشیق مکتبینده 8 اولور، آما آشیق حسینین قوپوزو 9 تئللی ایمیش. او اورمو آشیق هاوالاریندان علاوه، تورکیه هاوالاری و موغاملاری دا بعضاً سازدا ایفا ائدیرمیش.
 اونون ساز چالما قابلیتی ده اوستون ایدی.

 بیر سیرا آشیق هاوالاریمیز وار، چتین و آغیر هاوا حساب اولورلار و هر آشیق اونلاری چالماق ایسته­مز آما آشیق حسین بو هاوالاری لاپ اوستاجاسینا ایفا ائدیب عهده­سیندن گلمیشدی. بونلاردان مسلمان کشؤوروسو، شاغی، دول هجرانی کیمی هاوالارین آدلارینی چکمک اولار. الیمیزه چاتان کاسئتلر ده بو سؤزو  آیدین و آشکار بللندیریر.
توپلادیغمیز معلومات اساسیندا، اونون ان سئودیگی هاوالار دیوان، تجنیس، جمشیدی و خالداری اولموشدور.
آشیق سئورلرین دئدیگینه گؤره خالداری هاواسینی هله اونون کیمی چالان اولماییب.(بو هاوا ایندیلیکده، آرادان گئتمک اوزره دیر و آشیقلار چالماییرلار.) آشیق حسینین ان سئودیگی آشیق داستانی­دا شاه اسماعیلین داستانی اولموشدور.
 آشیق حسین اوخودوغو هاوالاردا چوخ آشیق داستانلارینین شعرلرینی اوخوسا دا، رحمتلیک پورآذر و جوانمردین شعرلریندن ده آرا-سیرا اوخویورموش. اونون بیر چوخ آشیق ایله دوستلوغو اولوب و عمومیتده اورمو آشیق محیطینده اولان آشیقلارین دئمک اولار هامیسی ایله تانیش اولوب. آنجاق صنعت دونیاسیندا ان یاخین یولداشی، آشیق درویش اولوبدور. آشیق درویشه عاشق اولان حسین، اونون معرفتی و هنری قارشیسیندا هر زمان باش اگیب و احترام ایله یاناشیب.

 ان یاخین دوستو، درویش ایله اوزون زمانلاردان دوستلوق علاقه­لری قوروب و دائماً ایلگیده اولموشدولار. درویشین سسینی و چالقی طرزینی چوخ سئورمیش.او هم ده اورمونون آدلیم آشیغی، آشیق فرهادین بعضی هاوالاردا پنجه­سینی اؤیره­نرک، اونا اوخشار چالیرمیش. آشیق دهقانین دئدیگینه اساسلاناراق، آشیق فرهاد شوخلوق ایله دئیه­رمیش بو حسین منیم پنجه¬می اوغورلاییب! ائله منه تای چالیر!

نهایت بیر عؤمور آشیقلیقدا زحمت چکن آشیق حسین 1369/10/2تاریخینده دونیاسینی دگیشیر و آشیق ویصل دئمیشکن، صادق یاری تورپاغا قوووشور و اؤزو ایله برابر سینه­سینده اولان، ائلیمیزین سؤز خزینه­سینی تورپاغا آپاریر. اوزانیمیزین مزاری توپپوزآوا کندینین مزارلیغیندا یئرلشیر.

 تأسفلر اولسون، اونون دیریلیگینده قدرینی بیلن انسانلارین سایی چوخ آز اولدو. دئمک اولار بیر پارا مسئله­لره گؤره اونون کیم اولدوغونو دوشونه بیلمه­دیلر.

 آشیق حسین منزوی بیریسی اولاراق، عؤمرونون سون ایللرینده کندلرینده و اؤز ائوینده یالقیز یاشادی. اوزان کندینین جماعتی ده اونا چوخ دگر وئرمه­دیلر و دئمک اولار ائله بونا گؤره ده صنعت دونیاسیندان آیریلاراق، یالقیز و منزوی بیر انسانا چئوریلدی.اونون روحونا بیر فاتحه دئیه­رک، اومود ائدیریک، کئچمیش اوزانلاریمیزین یوللاری ایتیب باتمایا و قدرلری دیری ایکن بیلینه.

 

  ------------------------------------------------------------------

قایناق شخصلر:

1-آشیق حسینین نوه­سی، همت سلطانی جنابلاریندان بیلگی­لرینی اختیاریمیزدا قویماغینا گؤره اؤز تشکرومو بیلدیریرم.
2-اوزان کندیندن اولان، ائلیمیزین خوش صحبت و دگرلی شاعری قهرمان اکبری(دوغوم 1333)  جنابلاریندان دا اؤز بیلگی­لرینی اختیاریمیزا قویدوغونا گؤره درین تشکرومو بیلدیریرم. اکبری جنابلاری، آشیغین عؤمرونون سون ایللرینده سیرداشی و دردداشی اولوب ، مرتب اونون ائوینه گئدیب، اونونلا گؤروشورموش. بورادادا اکبری جنابلارینین ایکی شعرینی سیز عزیز اوخوجولاریمیزا تقدیم ائدیریک.

 

 

گول کیمی دیر

سنین او حسن جمالین ساناسان گول کیمی­دیر
هؤروگون دالدان اگیلمیش سویا سونبول کیمی­دیر
اوره­گین سن کیمه وئردین گؤزه­لیم بیلمه­دیم هئچ
منیم آنجاق سنه مئیلیم گوله بولبول کیمی­دیر
کیرپیگین صف- صف اولوبدور قاشین آلتیندا دوروب
ییخماغا دوشمن ائوین ال بیر اولان ائل کیمی­دیر
سنین او شکّر شهدین نه­یه گؤر اوخشاری وار
بیر یاشار کؤرپه اوشاقدا آچیلان دیل کیمی­دیر
سن گل اغیاره اینانما یارا بئل باغلاگیلن
یار یار اولسا سنی ساخلار دلی­یه چؤل کیمی­دیر
گل اوزاق گزمه­گیلن اکبری­دن مسکین­دیر
مسکینین گؤز یاشی داغ-داشی ییخار  سئل کیمی­دیر

 

سنده ­دی

ای نازنین سلیمانین شوکت شانی سنده­ دی

بدخشانین لعل گوهر درخشانی سنده­ دی

هر گؤزلین بیر آدی وار، هر میوه­نین بیر دادی

عرشیده­کی ملکلرین بیر نشانی سنده­ دی

***

گؤزللیکده نئجه گؤردون سن یوسف کنعانی

عشق پرده­ی عصمتدن چیخارتدی زولئیخانی

ترسا قیزی چوخ اینجیتمه بیزیم شیخ صنعانی

اولسا اگر اونون دردی بیل درمانی سنده ­دی

***

گؤزلرین جلاد اولوبدور وئریری فرمان جنگ

قاشین کمان کیرپیگین اوخ آتیر منه توپ توفنگ

بهار اولموش گوللر آچمیش گول باغیندا رنگ به رنگ

صبا دگمیش زولفون اولموش پریشانی سنده­ دی

***

اذن وئرسن گؤزلرینه بیرده تکیم گؤزومو

دوروب باشینا دولاننام یئره سالما سؤزومو

اؤلن گونده سنه ساری دؤندره­رم اوزومو

اکبری­دن اوز دؤندرمه دین ایمانی سنده­ دی