شعرلر
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
سن یوخسان
دورنالاردا کؤچون چاتیب
دومانا بورونوب (خان پری) ده چینار آغاجلاری
سن یوخسان،
پاییزلاییر گؤزویاشلی کوچه لرده به نؤوشه لی بارماقلاریم
شه وه ساچلاریندا یئل اسیر
بو شه هه رین-
قوشمالاریندا بیر دنیز قیزی ته له سیر
سن یوخسان
یوخسان
یوخسان!!!
سوزوم داریخیر
سن منی یاشاتدین، من به نؤوشه نی
کیم گؤروب آغلادا سئوه ن سئو ه نی؟
من سنی دویمادیم باغیشلا منی
بونلار اوره ییمین چارداغین یئخیر
هر نه دن یازیرام سؤزوم داریخیر
دون گئجه ده نیزی - ده نیزه قاتدیق
یاتان دویغولاری بیردن اویاتدیق
سئوگی هارا چاتدی، بیز هارا چاتدیق؟!!!
باخ ، منیم اوستومه ائلدیریم شاخیر
هر نه دن یازیرام سؤزوم داریخیر
گئدیرم قارق اولام دوماندا - چن ده
ماهنی منده سولوب ، سئوگی ده سنده
قیناما به نؤوشه بنده دوشنده-
بیر که ده ر سینه می یاندیریب یاخیر
هر نه دن یازیرام سؤزوم داریخیر
داریخیر یازیلار- داریخیر الیم
بیچیلیر بوغازیم باغلانیر دیلیم
بیلمیره م یاشاییم - بیلمیرم اؤلوم
قیریق قافییه لر بئینیمی سیخیر
هر نه دن یازیرام سؤزوم داریخیر
گؤر نئجه لحظه دی، گؤر نئجه آن دئ
بیر « پری » دنیزده اود دوتوب یاندئ
اؤزونده بوغولما «خزر» آماندئ
ساحیل اوز چئویریب ساحیله باخیر
هر نه دن یازیرام سؤزوم داریخیر
دنیز قیزی
توکه ندی اومودوم قیریلدی هئییم
دؤرد دووار ایچینده یاندیم آلیشدیم
هایانا اوز قویوم - هایاندان دئیم
*****
اولمایا قار یاغیب یولونو کسدی؟!
اولمایا گه لنده دومانا دوشدون؟!
دیلیمده آجی بیر قوشما ته له سدی
بلکه ده سارسیلیب گومانا دوشدون
*****
بو گئجه لحظه لر ایلله شیر منه
قاریشیر شعریمین قاراسی ، آغی
ماوی لر قارالیب زیلله شیر منه
گه زیره م آردینجا ، آرانی ، داغی
*****
بو گئجه نه یامان اوزون گئجه دیر؟!!!
گؤزومده یول آزیر،یاتا بیلمیرم
سیخیر اوره گیمی هیچقیریقلاریم
اؤزومده - اؤزومه چاتا بیلمیرم
*****
یوخودان آل منی ، آپار دنیزه
سنه قوربان اولوم آی دنیز قیزی
آی گیریب بولودا ، کیم باخیر بیزه
سسیمه ، سس وئر ا...ی گؤیون اولدوزو
*****
یولونو گؤزله دیم گه لمه دین نه دن؟
داریخدی شعیریم،داریخدی سؤزوم
آی دا یورقون اولوب آخیر زیروه دن
نه اوندا دؤزوم وار نه منده دؤزوم
نازلی قیزیم
آخشامین سون پرده سینده-
قانا باتمیش حؤروگونونقورد آغزیلادارانماسین!!
کورا یولدا قالان،گؤزلر،
هاچاناجان دییه جکلر ناغیللاردا-
نازلی قیزیم...
هاچاناجان-
دییه جکلر!!!
یاریسی قیرمیزئ، یاریسی سارئ
کؤکسونه قالاییب هئیوانئ، نارئ
او سئوه بیلمه دی آلمالیقلارئ
قووزاندئ داغلارا ، قوشولدو یئله
آغلاما ببه ییم آغلاما هه له
***
دئیرلر یاریسی توش گه لیب قارا
یاریسی قارق اولوب قارانلیقلارا
آلما باغی هارا ...؟ او یئرلر هارا؟!!!
« خزر» اللرینده گه لیر ساحیله
آغلاما ببه ییم آغلاما هه له
***
آلما می الیمدن روزگار آلمادی
داش آتدیم آلمایا، آلما قالمادی
او واختدان هئچ آلما دای سارالمادی
بیزیمده یازیمیز یازیلمیش بئله
آغلاما ببه ییم آغلاما هه له
***
گونه شه آند ایچیب اؤلمه یه جکدیر
گه لین ده چیخاندا ، گولمه یه جکدیر
بیر کیمسه دردینی بیلمه یه جکدیر
ماهنئ قوجاغیندا گه له جک دیله
آغلاما ببه ییم آغلاما هه له
***
بو آغئ سوووشار آغلاما گولوم
آلمادا گول آچار، سارئ بولبولوم
گؤزونون یاشینی من نه جورسیلیم؟
آخئ قافییه نی وئرمیشم سئله
آغلاما ببه ییم آغلاما هه لهیازین اته گینده سولان گوللریم
منه یاردئم ائدین لال بولبول لریم
ساچیما دن دوشوب عزیز ائللریم !!!
منی قارقیش ائدیب باغچالار باغلار
«بوگون سئوگیلیمین تویودو داغلار»
******
لحظه لر آوارا ، منده آوارا
سینه مه اود دوشوب، اوره گیم یارا
بیر ائلچی یوللادیم یارا یالوارا
آلیشدئ ایچیمده قارالار، آغلار
«بوگون سئوگیلیمین تویو دو داغلار»
******
داغ چئکیب سینه مه دؤزه بیلمیرم
زینه سیز بولاغام ، سوزه بیلمیرم
من اوندان الیمی، اوزه بیلمیرم
سئوگی نامازیمدا بیر اوزان آغلار
«بوگون سئوگیلیمین تویو دو داغلار»
******
یول وئرین گئدیرم بویونا باخام
اونو سئومه یه نی یاندیریب یاخام
بیر داملا یاش اولوب گوزیندن آخام
گؤز یاشیم سئل اولوب یولومو باغلار
«بوگون سئوگیلیمین تویو دو داغلار»
نه اولدو بیزه
من دویا بیلمه دیم نه اولدو بیزه
سندن آیریلالی گوله بیلمیرم
گئری دؤن منی ده آپار دنیزه
قورتولوب یانینا گه له بیلمیرم
سینیق اوره گیمده سنین حسرتین
داغ کیمی چئکیلیب داغ کیمی قالیب
بلکه ده دؤنمه گه یوخ جسارتین
بلکه ده بوداغلار آیریلیق سالیب؟!!
*****
گئری دؤن بیر اته ک اومودوم قالدی
دئدیم وارلیغیمیز سولماسین داها
گه لمه دین ، آرزیلار سولدو سارالدی
سن سیز یاشاماغیم قالیب آللاها
یادیندا بیر گئجه قول بویون اولدوق
سنین گؤزلرینده بوغولدوم بیر آن!!!
نه ده نسه بئله جه سارالدیق سولدوق
او سئنیق کؤرپوده آیریلان زامان
*****
ال – اله ، اوز – اوزه دایاندیق دوردوق
« آی » دا خومار – خومار باخیردی بیزه
کؤرپونون اوستونده بیر نیشان قوردوق
آیریلدیق ، سؤز وئردیک بیر بیریمیزه
*****
سن باتدین دنیزه بیر دنیز کیمی
سندن آیریلالی گوله بیلمیرم
من سئنیق کؤرپوده قالان ایز کیمی
قورتولوب یانینا گه له بیلمیرم
بئینیمده ساوالان گؤزومده آراز
یول آلیب گئدیرم دوماندا چن ده
دردیمی سیزلاییر بیر صدفلی ساز
نسیگیله بویانیر ماهنی دا من ده
ساغیمدا یارادیر سولومدا یارا
باغلانیب آیاغیم کؤچه بیلمیرم
سنه کؤرپوله نن قولومدا یارا
بو سئنیق کؤرپودن کئچه بیلمیرم
اوزومو دؤنده ریب خزره ساری
سینیرام ایچیمده آیلی بیر گئجه
گؤزومده سورگوندو دورنا قاطاری
یاییلیم لی بیر گئجه ، یایلی بیر گئجه
حسرتله دایانیب بیر آه چئکیرم
آرزیمی گؤزومده سئله دؤنده ریر
ساحیلدن – ساحیله گوناه چئکیرم
آرازی یاندیریب کوله دؤنده ریر
بیر قوشما یازیرام یاریسی سودا
یاریسی توپراقدا اود دوتوب یانیر
بارماغیم آز قالیر سنی اونودا
بلکه ده وئردیگی ایلقارین دانیر
بلکه ده یازیمیز یازیلمیش بئله
بلکه ده ساوالان سیغماییر منده
دؤزه رم بیر آزدا ، دؤزه رم هله
بوراندا ، یاغیشدا ، دوماندا ، چن ده
سئوگی بیر گوناه دیر ایچیمده منیم
اؤزومو ایتیردیم اؤزومو داندیم
سئوگی درین آه دیر ایچیمده منیم
دئمه «آیریلیق »دیر چؤکوب تئلینه
دئمه ناغیل لاردا سؤزون قالاجاق
قووزانیب اوچساندا گونش ائلینه
«دومان» لی یوللاردا گؤزون قالاجاق
من سنی سئویرم بو اوره ک بو قان
سئوگی سیز هه له ده گولمه یه جک سن
بیلیرسن ؟ خزره چئوریلن زامان
سن منی اونودا بیلمه یه جک سن
یالین فاصیله لر آییردی بیزی
نه سنده گوج قالدی نه منده داها
بیزه ایلهام اولدو بیر آلما ایزی
بیاض بیر گئجه ده باتدیق گوناها
گئتمه گ ایسته ییرسن او یول - اودا سن
آمما سئوگی میزه ده یمه سین الین
باخ اوجا داغلاری بورویوبدور چن
اؤزوندن یه لیگ اول آی ساری گه لین
سنینله یم، سولدوگونش باتدی آی
قافییه لر فیکره دالیر هارداسان؟
گؤزلریمین قاراسیندا لای بالای
آیریلیغدی چؤکوب قالیر هارداسان؟
******
باغیریرام سسیم باتیر ایچیمده
سنسیزلیگیم سنه چاتیر ایچیمده
بو شاختادا - شاختا یاتیر ایچیمده
گونش آخیب قاش قارالیر هارداسان؟
******
یازی یازان قارا یازیب یازیمی !!!
هئچ بیلمیرم هارا یازیب یازیمی!!!؟
سینم اوسته آلدیم سینیق سازیمی
بوساز سندن ایلهام آلیر هارداسان؟
******
سن خزره چئوریلیرسن بیر آندا
من دومانا قارق اولورام دوماندا
بارماقلاریم شاه پرده یه جوماندا
سن سیز سویوق گئجه لرده
قالدیم یولا باخا – باخا
اؤز الیمله « قار چیچه گین»
سالدیم یولا باخا – باخا
ه...ی، ال – اله دویمه ده له
دئدیم بلکه «دورنام »گه له
تئللی سازی آلدیم اله
چالدیم یولا باخا – باخا
دولانیردیم پرده – پرده
بوینو بوکوک لال شه هه رده
توپراق اوسته چؤکن درده
دولدوم یولا باخا – باخا
گیلئی لندیم اوفوق لاردان
ساچلاریما یاغان قاردان
سوراغینی سون باهاردان
آلدیم یولا باخا – باخا
نه یاغیشدان بیر خبر وار
نه باغچامدا گوللو باهار
قاپی میزدا قالاندی قار
سولدوم یولا باخا - باخا
سن سیز هر شی یالان هر شی تالانمیشسن سیز شعر اوتاغیم درده قالانمیش
سن سیز قافییه لر اوددوتوب یانمیش
نئیلیرم یاغیشی نئیلیرم یازی
سنی سیزیلداییر کؤنلومون سازی
(سن) دییه چیرپینیر سینیر اوره ییم
تئللی بیر به نؤوشه یونور اوره ییم
سویوق دووارلاردا دونور اوره ییم
نئیلیرم نامازی نئیلیرم نازی
سنی سیزیلداییر کؤنلومون سازی
لحظه لر اوزانیر دومان ایچینده
قالمیشام آوارا گومان ایچینده
یاخشینی ایتیردیم یامان ایچینده
نه قیبله سی به للی نه دسته مازی
سنی سیزیلداییر کؤنلومون سازی
قیناما ساچلاریم بورونوب قارا
بیر باخیش سئویرم باغریمی یارا
یئتره دردیمی آغ بولودلارا
ای یالخی محبت ، ای آلین یازی
سنی سیزیلداییر کؤنلومون سازی
بیر چیچه یم کوللار اوسته
یورقون آرقین یوللار اوسته
آل قوینونا دسته -دسته
آپار منی - آپار منی
بورا شاختا بورا قاردیر
بوردا دونوب هر نه واردیر
اولوب قالان «سون باهار»دیر
آپار منی - آپار منی
«آی باخیشلی» دنیز قیزی
اؤزون بوغور دان اولدوزو
باس باغرینا قیپ - قیرمیزی
آپار منی - آپار منی
یاریم نیسگیل یاریم یارا
توش گه لمیشم یازدا قارا
گه ل بو قاری یارا - یارا
آپار منی - آپار منی
گه ل کؤکومدن قوپار بیر گون
هئچ اولماسا آپار بیر گون
منی گه زه ن تاپار بیرگون
آپار منی - آپار منی
چئکیلین یول وئرین آل بایراغیمیز یئلله نسین
ساوالانسین سینه میز لال سازیمیز دیلله نسین
سینه سین توز بوروین تورپاغیمیز گول له نسین
دیله گلسین پاییز اوغروندا سولان یارپاقلار
آیاق آلتیندا قالیب درده دولان یارپاقلار
ائلیمین گوللری سولموش قارا یئل قوینوندا
بیر اوزان کؤرپوده سینمیش ساری تئل قوینوندا
بیزیم ائلده داغا بنذیر سارا سئل قوینوندا
نه سارا یوللارا باخدیقجا یانیر آخشاملار
گون باتاندا سیخیلیر دردی قانیر آخشاملار
هله یاتمیش ائله باخ قایغی سی باشدان آشمیش
سئل اولوب نیسگیلی دولدوقجا اوره گدن داشمیش
بو ائلین ائلچی سی دارگونده قالانلار شاشمیش
بیری وار الده قرنفیل دولانیر دیللرده
اؤزونو چن بورویوب قارداشی نیسگیللرده
اویانین بذ قالاسیندان ائله بیل های گلدی
بیزه قیسمت دییه سن تانریدان آل پای گلدی
سینه گرمیش ساوالاندان بیر اتک یای گلدی
چئکیلین داغلارا چیلغین دلی لر گون باتدی
قارا ظولمت گونشین کؤرپه جیگین آغلاتدی
بو نه یاتماقدی قارانلیق چؤکولوب هر یئرده
گونشین گؤز یاشی دن-دن تؤکولوب هر یئرده
تانرینین کؤینه گی دالدان سؤکولوب هر یئرده
قالانیب داغ کیمی درد اوستونه خالقین دردی
نه دورومدور بو نه دحشت بیزه اوز چؤندردی؟!!
بیلیرم داغدا دومان وار و...یولوم داشلانمیش
آنامین گوزگوسو باشدان – باشا قارقیشلانمیش
نه بیلیم بلکه ده شعریمده کولک باشلانمیش
گئدیرم چنلی اوزاندان دئمیرم قوی قالسین
او سینیق کؤرپوده آخشام چاغی قارمان چالسین
چئکیلین یول وئرین آل بایراغیمیز یئلله نسین
ساوالانسین سینه میز لال سازیمیز دیلله نسین
سینه سین توز بوروین تورپاغیمیز گول له نسین
دیله گلسین پاییز اوغروندا سولان یارپاقلار
آیاق آلتیندا قالیب درده دولان یارپاقلار
ائلیمین گوللری سولموش قارا یئل قوینوندا
بیر اوزان کؤرپوده سینمیش ساری تئل قوینوندا
بیزیم ائلده داغا بنذیر سارا سئل قوینوندا
نه سارا یوللارا باخدیقجا یانیر آخشاملار
گون باتاندا سیخیلیر دردی قانیر آخشاملار
هله یاتمیش ائله باخ قایغی سی باشدان آشمیش
سئل اولوب نیسگیلی دولدوقجا اوره گدن داشمیش
بو ائلین ائلچی سی دارگونده قالانلار شاشمیش
بیری وار الده قرنفیل دولانیر دیللرده
اؤزونو چن بورویوب قارداشی نیسگیللرده
اویانین بذ قالاسیندان ائله بیل های گلدی
بیزه قیسمت دییه سن تانریدان آل پای گلدی
سینه گرمیش ساوالاندان بیر اتک یای گلدی
چئکیلین داغلارا چیلغین دلی لر گون باتدی
قارا ظولمت گونشین کؤرپه جیگین آغلاتدی
بو نه یاتماقدی قارانلیق چؤکولوب هر یئرده
گونشین گؤز یاشی دن-دن تؤکولوب هر یئرده
تانرینین کؤینه گی دالدان سؤکولوب هر یئرده
قالانیب داغ کیمی درد اوستونه خالقین دردی
نه دورومدور بو نه دحشت بیزه اوز چؤندردی؟!!
بیلیرم داغدا دومان وار و...یولوم داشلانمیش
آنامین گوزگوسو باشدان – باشا قارقیشلانمیش
نه بیلیم بلکه ده شعریمده کولک باشلانمیش
گئدیرم چنلی اوزاندان دئمیرم قوی قالسین
او سینیق کؤرپوده آخشام چاغی قارمان چالسین
قونوت دوتاندا ـ
یاغیش یاغیر سانکی جننتین ... کال آلما لارینا
« آزان » سسی گلیر
آیاقلاریمدان
ایکی یولون آیریجیندا
سن دنیز قوینوندا من داغ دؤشونده
بیلمه دیم نه سایاق ال-اله وئردیک؟
تئللی دورنالارین سون گئدیشینده
سئویشه – سئویشه سئوگی بئجردیک
خزره چئوریلدین خزانا دالدین
نه اولدو ؟ هایاندا ایتیردیم سنی؟
بلکه ده ساحیلین قئیدینه قالدین
بلکه ده اونودا بیلمیردین منی
داغ دومان ایچینده دورنالار سورگون
گؤزلرین گؤزومه آداخلا نمادی
سؤز وئردیم گؤروشه یاغیشلی بیر گون
سنده سئوگی شعری دوداقلا نمادی
بنؤشه سارالدی سئوگی تاغیندا
پاییز ساچلارینی داراییر یئله
بولود وار گونشین قاش قاباغیندا
گؤزلرین قوربانی داریخما هه له
دردیمی یاشاییر سهندین قیزی
سارماشیق دولاشیب تیکان کولونا
یوخومدان آسیلیب بیر دان اولدوزو
سانکی داغ چئکیلیب داغین قولونا
قاری بیر گئجه دن گونش اومورام
سئخیر اوره ییمی خاطیره لریم
گؤزومو یاخشییا پیسه یومورام
بیلمیرم دردیمی هایاندان دریم؟
گؤزلریمده یاش !
یارالاریمدان مؤژ وئریر قومسال خاطیره لر!
***
آیاقلاریم
بو داغدان آشانمادیلار
یولداشلاریم ...ساواشانمادیلار
من سنین دردینی نه جور داشییم
آخئ قوللاریمدا ساواش ایزی وار
دوغودا ناللانان کهر آتلی نین
آتینین گؤزونده قان دنیزی وار
داشییم دردینی آپاریم هارا؟
قوللاری بوینوما ساریشان قادین
نه دندی ساچلارین بورونوب قارا
اورگ آغریسیندا اونودولمادین
آپاریم دردینی یاشادیم نئجه؟
هله سن اؤزوندن دوغولمالیسان
بویلانا- بویلانا دان سؤکولونجه
اؤزون اولمالیسان،سن اولمالیسان
بو گئجه دردینی اودا بیلمیرم
باخیشی قابارلی شاعیر یولداشیم
دردینی – دردیمه قاتا بیلمیرم
اونود گؤزلرینی قوی ساغینلاشیم
سنی سسله ینده دوداغیم یانیر
بوغولور ایچیمده هاراییم هاییم
بو یولون دومانلی باخیشلاریندا
من سنین دردینی نه جور یاشاییم؟
یانغین بیر سئوگینی یاشاییر دوداقلاریم!
قوللاریم
اللریم
بارماقلاریم
... آددیم - آددیم اللریمی داغلاییرام!
بیر دنیزین درینلیگینده آغلاییرام
***
دامارلاریمدا قان قورویوب
گؤزلریمده یاش
آیاق اوسته جان وئریرم
یاواش
یا
وا
ش!!!
دویونلو آخشامین پنجره سینده
شعریمه چیپ جالان سویون سسینده
قاییت قوللاریمی اؤزومه قایتار
***
سنی تاپشیرارام بولودلار یاغا
پاییز دوداغیندا یاغاسان باغا
آز قالیر حسرتین چئوریلسین داغا
قاییت قوللاریمی اؤزومه قایتار
***
بیلمم نه سئحیردی بیلمم نه ایشدی
قارا ساچلاریندان الیم سوروشدو
قوللاریم قیریلیب بوینونا دوشدو
قاییت قوللاریمی اؤزومه قایتار
***
گئی آیاقلارینی قاش قارالاندا
قاطار گؤرپولری فیکره دالاندا
اوگون او آخشامی یادا سالاندا
قاییت قوللاریمی اؤزومه قایتار
دونن هامی گلمیشدیبیر شه هه ر
بیر ائل
مین شاعیر
بیر دونیانی چیئنلرینده قالدیرماغا
یوخ
بیر دونیانی ویدالاشماغا
یوخ
بیر کؤچه رینین نئجه کؤچمه سینی اینانماغا گلمیشدیلر اونلار
بیز آمما
نه دییم آخی...
داغلار آغلار یارالی داغ دره دن آرالی
کؤچه ریدن سورمایین هارالیسان- هارالی؟!!!
زلزله اثرینده باشیمیزا گلن فاجیعه نی عزیز وطن داشلاریما تسلیت دییرم
آذربایجان باشون ساغ اولسون
یئنه لال نیسگیلیمیز چؤندو داغا !
آجی حسرتدی یاغیر قول بوداغا
بو نه دحشتدی نه یاسدیر نه آغی؟!!!
آی منیم یاسلی ائلیم قالخ آیاغا
آی منیم یاسلی ائلیم قالخ آیاغا
هاوا آغیر،داغ دومانلی ،زیروه چن
یوللار سوسوب ، نه گلن وار نه گئدن
بیر یئل اویاق، بیر پنجره بیرده من
سئنیب منیم پنجرمده بیر دنیز
تورپاق یاسلی ، گول یاسلییام بیلیرسیز
من خزرین ساچلارینا وورولدوم
ساحیل-ساحیل چیپ جالاندیم دورولدوم
گوزگولرده یول گؤزلدیم یورولدوم
سئنیب منیم پنجرمده بیر دنیز
تورپاق یاسلی گول یاسلییام بیلیرسیز
یایلیغیمی یاماجلاردا ایتیردیم
اللرینی سطیر-سطیر گؤتوردوم
بیر آلمادا سئوگیمیزی بیتیردیم
سئنیب منیم پنجرمده بیر دنیز
تورپاق یاسلی،گول یاسلییام بیلیرسیز
آ.......ه چئکیلیر گ و ن آ ه یاغیر شعریمه
بنؤوشه نی قوناق چاغیر شعریمه
مومکون اولسا دور گل باغیر شعریمه
سئنیب منیم پنجرمده بیر دنیز
تورپاق یاسلی ، گول یاسلییام بیلیرسیز
بیر که په نک گؤزلریمی قوپاردی
قاناد چالیب قایالاردان آپاردی
منی گزن آختاراردی تاپاردی
سئنیب منیم پنجرمده بیر دنیز
تورپاق یاسلی ، گول یاسلییام بیلیرسیز
اؤزومدن چیخماق ایسته ییرم
ماوی سوچلاریندا اینادین -
سوزمک
و پرده - پرده کؤکلنمک-
یئلین روحوندا
یاغیشین قانادلاریندا
دلی دولو چرشنبه آخشاملاریندا
هادی قان بویالی سئوگی ایزله یه نلر
گؤتورون منی
آلین ،
قاچیرین
یورقانیم سینیب
و...
یاستیغیمدان یاشاران ماهنی لار-
آغاران ساچلارینا امانتدیر بو شه هه رین
گؤتورون منی
( ار ) سیز له میشم
خزر سیزله میشم
اؤزومدن چیخماق ایسته ییرم
داندیلار زیروه بویوندا اوجالان وارلیغیمی
یازدیلار شاختالی سؤزلرده (یالان ) وارلیغیمی
بیر عؤمور کیملیگیمه دالدالانان ...
دون گئجه ائددیلر آخیردا تالان وارلیغیمی
منی هر بیر اؤتن آنجاق یوواسیز سسلیر ه..........ی
آراز آی دالغالی هیرس ایله جالان وارلیغیمی
باشی توفانلی سهندیم دایاق اول اللریمه
قوی عربلردن آلاق بابک آلان وارلیغیمی
گؤزو دار ییرتیجی لاردان سن اؤزون گل قورتار
ساوالان سینه سی وولکانلی قالان وارلیغیمی
داها گل ال - اله باهم قورویاق قان قارداش
آخشام اوستونده گونش تک سارالان وارلیغیمی
یای دومان یای بوتون ائل لرده یاتان لار بیلسین
سسی یالچینلارا تیتره تمه سالان وارلیغیمی
بیر عؤمور کیملیگیمه قئیده قالان وارلیغیمی
چالما بوهاوانی ...
بئله سیزیلداما تئلینه قوربان
چالما بوهاوانی اؤلدورور منی
دوداغینا قوربان ، دیلینه قوربان
چالما بوهاوانی اؤلدورور منی
نه گه لیب باشینا ، نه اولوب سنه؟!
یئنه ده تئللرین بورونوب چه نه
کیمسه یانمایاجاق اؤلنده منه
چالما بوهاوانی اؤلدورور منی
بیر تئلین آغلاییر ، بیر تئلین گولور
بیر تئلین گونشین گؤز یاشین سیلیر
سنه یالواریرام ، چالما کیم بیلیر ؟ !!
چالما بوهاوانی اؤلدورور منی
هاوایا باخیرام دوماندی ، قاردی
پرده لر قاریشیر گؤره ن نه واردی!!
بو هاوا باغریمی شاققادی یاردی
چالما بوهاوانی اؤلدورور منی
