آلدادیجی اوخشارلیق

مارک تواین

 چئویرن:عولوی بونیادزاده 

       بیر نئچه ایل اول قاتارلا نیویورک اشتاتینداکی سالامانکا واغزالینا گلمیشدیم. اورادان باشقا بیر قاتارلا اوزاق صفره گئتمه‌لی‌ایدیم. پلاتفورمادا چوخلو آدام واردی و هامیسی تامامیله دولو اولان همین قاتارا مینمه‌یه جهد ائدیردیلر. کاسساداکی گنجدن منه بیر بیلئت وئرمه‌سینی خواهیش ائتدیم، او ایسه  " یوخدور " ، - دئیه جاواب وئردی. اورادان آرالاندیم و قارشیدان گلن بیر یئرلی مأموردان او قاتاردا بیر بیلئت الده ائتمه‌ییمه کؤمک گؤسترمه‌سینی خواهیش ائتدیکده او، منیم سؤزومو کسه‌رک غضبله دئدی:  " مومکون دئییل، هر کونج-بوجاغی دولودور، بیر ده منی ناراحات ائتمه " . او، آرخاسینی منه طرف چئویریب چیخیب گئتدی. من اؤزومو ائله تحقیر اولونموش حساب ائتدیم کی، یول یولداشیما دئدیم:  " منیم کیم اولدوغومو بیلسه ایدیلر بونلار… " . لاکین یولداشیم درحال سؤزومو کسدی:  " جفنگیات دانیشما، وضعیتله باریشمالی‌ییق " ، - دئدی،  " اگر اونلار سنین کیم اولدوغونو بیلسه‌ایدیلر، تامامیله دولو بیر قاتاردا بیلئت تاپماغا سنه نئجه کؤمک ائدردیلر؟ " . 

     بو چیخیلماز وضعیته چاره تاپیلمادی کی، تاپیلمادی. بیردن حیس ائتدیم کی، واقونلاردان بیری‌نین بلدچیسی دؤنوب دیقتله منه باخدی. گؤردوم کی، اونون اوزونون ایفاده‌سی درحال دییشدی. او، منی موندیرلی بیر مأمورا گؤستریب اونا نه ایسه پیچیلدادی و من آنلادیم کی، منیم باره‌مده دانیشیرلار. بیر آن سونرا همین واقون بلدچیسی اوز-گؤزوندن نزاکت یاغا-یاغا منه یاناشدی. 

   " سیزه بیر قوللوق گؤستره بیله‌رم‌ می؟ " ، - دئیه سوروشدو.  " سیزه بو قاتاردا یئر لازیمدیرمی؟ " . 

   " بلی "  دئدیم.  " اگر منه بیر یئر دوزلده بیلسه‌نیز، سیزه میننتدار اولارام. هر نه جور یئر اولور-اولسون " . 

   " بیزده بؤیوک عاییله کوپئسیندن باشقا هئچ نه قالماییب " . او، سؤزونه داوام ائتدی،  " ایکی‌یاتاقلیدیر و ایچینده ایکی کرئسلو وار، لاکین کوپئ تامامیله‌سیزین سرنجامینیزدادیر. توم، تئز بو چامادانلاری واقونا قالدیر " . 

  سونرا او، الینی قالدیریب شلیاپاسینا توخوندوردو و یولداشیملا من ایره‌لی جومدوق. یولداشیما بیر-ایکی سؤز دئمه‌یه جان آتیردیم، لاکین فیکریمی دییشدیم. بلدچی بیزی کوپئده راحات یئرلشدیردی و سونرا دؤنه-دؤنه تعظیم ائده‌رک گولومسوندو: 

   " هه، جناب، باشقا بیر شئی ایسته‌میرسینیز کی؟ چونکی هر نه بویورسانیز، قوللوغونوزدا حاضیریق " . 

   " بیر قدر ایستی سو اولار؟ " ، - دئیه سوروشدوم. 

   " البتته، جناب، بو دقیقه  گتیررم " . 

   " یاخشی! بو لامپا یاتاقدان چوخ یوخاریدان آسیلیب. داها یاخشی بیر لامپا اولارمی کی، منیم یاتاغیمین اوستوندن آسیلسین و من راحات کیتاب اوخویا بیلیم؟ " . 

   " بلی، جناب. سیزین ایسته‌دیگینیز لامپا قونشو کوپئدن آسیلیب. من اونو اورادان چیخاریب دئدیگینیز یئردن آساجاغام. او بوتون گئجه‌نی یاناجاق. بلی، جناب، سیز ایسته‌دیگینیز هر بیر شئیی بویورا بیلرسینیز و سیزی راضی سالماق اوچون بوتون دمیریولونو دا آلت-اوست ائدریک" . 

  بونو دئیه‌رک او، چیخیب گئتدی. من اؤز یولداشیما گولومسونوب دئدیم:  " هه، ایندی سؤزون ندیر؟ منیم مارک تواین اولدوغومو بیلن کیمی گؤردونمو موناسیبتلری نئجه دییشدی؟ نتیجه گؤز قاباغیندادیر، ائله دئییل؟ " . یولداشیم سوسوردو. من ایسه علاوه  ائتدیم:  " سنه گؤستریلن خیدمتدن ناراضیلیغین یوخدور کی؟ بونلارین هامیسینی علاوه  خرجله دئییل، یالنیز بیلئت پولو حسابینا ائدیرلر " . 

  من بئله دئیرکن بلدچی‌نین گولومسر چؤهره‌سی کوپئ‌نین قاپیسی آغزیندا گؤرسندی و دئدی: 

   " هه، جناب، من پلاتفورمادا سیزه باخان کیمی تانیدیم. بیزیم رئیسه‌ده‌ سیزی من گؤستردیم " . 

   " ائله می، عزیزیم؟ "  - دئیه‌رک اونا یاخشیجا چای پولو وئردیم.  " من کیمم؟ " . 

   " میستئر ماک کلئللان - نیویورکون مئری " ، - دئیه‌رک تئز چیخیب گئتدی.

مئری:‌ شهردار، بلدییه‌ باشقانی

کؤچورن: عباس ائلچین