گونلرین ایچینده بیر گون آی خانین گؤزو پارلادی، دوغوم سانجیلارینا توتولدو. سانجیلارین سونوندا بیر اوغلو دونیایا گلدی. جوجوغون اوزو گؤی کیمی پارلادی. آغزی آتشین قیزیلیندا، گؤزلری آلا، ساچلاری قارا، قاشلاری قارا ایدی. ان گؤزل پری لردن داها گؤزلدی.

بو جوجوق آناسینین دؤشوندن یالنیز بیر کره سود امدی، بیر داها اممه دی. سونرا دیله گلیب، چیگ ات، آش و ایچکی ایسته دی. تئز قونوشماغا باشلادی. قیرخ گون ایچینده بؤیودو. قیرخ گون سونرا یورویوب اوینار اولدو. آیاقلاری سیغیر آیاغی کیمی گوجلو، کؤکسو آیی کؤکسو کیمی ساغلام، بئلی قورت بئلی کیمی اینجه و اوموزلاری سامور اوموزو کیمی پارلاق و اویناق ایدی. بوتون بوخونو توکلو ایدی. آت سورولری گودردی، آتا مینیب گئییک آوینا چیخاردی.

گونلر گئجه لر کئچدی. بو جوجوق بیر ایگیت اولدو. او چاغدا او یئرده چوخ بؤیوک بیر اورمان وار ایدی. اورماندا سایسیز دره لراولوب، چوخلو ایرماقلار آخیردی. بو اوزدن بورایا سایسیز آو حیوانلاری گلیردی. بورادا اوچان قوشلاردا چوخدور. آنجاق بو اورمان ایچینده قورخونج بیر جاناوار وار ایدی. بو جاناوار آت ایلخیلارینی دا یئیردی. اورداکی انسانلاری دا یئیردی. بؤیوک، یامان، قورخونج بیر جاناوار ایدی. ائل قورخوب، الی بؤگرونده قالمیشدی.

اوغوزخان ایسه یامان بیر ایگیت اولموشدو. جاناواری اؤلدورمک ایسته دی. گونلردن بیر گون قرارینی وئردی، آوا چیخدی؛ قارغیسینی، اوخونو، یایینی، قیلینجینی و قالخانینی یانینا آلدی. بیر گئییک یاخالادی؛ گئییگی، اسنک بیر سؤگود چوبوغویلا آغاجا باغلادی، چکیلیب گئتدی.

ائرته کی گون، دان یئری آغاریرکن گلدی. باخدی کی جاناور گئییگی اولدوغو کیمی اودموش. بو سفر بیر آیی یاخالادی؛ اونو دا آلتین قاییش ایله توتوب آغاجا باغلادی. یئنه اورادان ساووشدو.

گون باتدی، گئجه اولدو. دان واختی گلدی چاتدی. دان آغاردیغیندا اوغوزخان اورمانا دؤندو. جاناوارین آیینی دا یئییب اوددوغونو گؤردو. بونون اوزرینه آغاجین دیبینده اؤزو دوروب جاناواری گؤزله مگه باشلادی. جاناوار گلدی. باشی ایله اوغوزون قالخانینی ووردو. اوغوزخانی سارساممادی. اؤفکه لندی. اوغوزخان دا اؤفکه لندی. قارغیسینی ووروب جاناواری اؤلدوردو، قیلینجی ایله جاناوارین باشین کسدی. سوروکله ییب گؤتوردو، اورمانین ائشیگینه بوراخدی.

گئری دؤندوگونده بیر آلادوغانین جاناوارین باغیرساقلارینی یئمکده اولدوغونو گؤردو. اوخون یایینی گریب آتدی دوغانی دا اؤلدوردو. اونون دا باشینی کسدی. بونون اوزرینه دوروب دوشوندو، اؤزو اؤزونه دئدی:

«جاناوار هم گئییگی هم ده آیینی یئدی. جاناوار گئییکدن ده آییدان دا گوجلو ایدی. آنجاق قارغیم جاناواری اؤلدوردو نییه کی قارغیم دمیردندی. آلادوغان ایسه جاناواری یئدی. یاییملا اوخوملا دا آلادوغانی اؤلدوردوم. یاییملا اوخوم باقیر اولدوغوندان آلادوغانی اؤلدوردو» دئدی.

بوراخیب گئتدی.

یئنه آیلار، گونلر کئچدی. گونلرین ایچینده بیر گون اوغوز خان بیر کره داها اورمانا گئتدی؛ اورادا تانرییا یالوارماغا باشلادی. دئیرکن بیردن بیر قارانلیق باسدی. گؤیدن بیر ماوی ایشیق ائندی. گونشدن ده آیدان دا پارلاقدی. اوغوز خان قالیب یورودو؛ ماوی ایشیغین اورتاسیندا بیر گنج قیزین اولدوغونو گؤردو.

قیز ماوی ایشیغین اورتا یئرینده تک باشینا اوتوروردو. چوخ گؤزلدی. باشیندا چوبان اولدوزو کیمی پاریل پاریل پارلایان بیر اولدوز واردی. قیز ائله گؤزل ائله گؤگچک دیر کی، گولدوگو زامان ماوی گؤی ده گولوردو. آغلادیغی زامان گؤی اوزو ده آغلاییردی.

اوغوز خان قیزی گؤرجک اوسو باشیندان گئتدی، قیزی سئودی آلدی، اونونلا ائولندی.

گونلردن، گئجه لردن سونرا بیر چوخ گؤزل قیزین گؤزلری پاریل پاریل یاندی. اوچ ائرکک اوشاق دوغوردو. بیرینه گون آدینی وئردیلر، ایکینجیسینین آدینا آی دئدیلر، اوچونجوسونو اولدوز دئیه چاغیردیلار.

بو ایشلر اولوب بیتدیکدن چوخ زامان سونرا اوغوز خان بؤیوک بیر توی وئردی. چاغیریلان چاغیریلمایان بیر بیرینه دانیشیب گلدیلر. تورلو آشلار، تپه له مه اتلر، ایرماق کیمی قیمیزلار یئییلیب ایچیلدی. چوخ گؤزل اگلنجه، یئمه ایچمه اولدو.

تویدان سونرا اوغوز خان بیگلره، قوناقلارا یارلیق وئردی، اونلارا دئدی کی:

«من سیزلره اولدوم خان

آلارام یای ایله قالخان

طالع اولسون بیزه نشان

بیز، بوز قورد کیمی هایقیران!

دمیر قارغیلاریمیز اورمان اولسون

آو یئرینده یابان ائششکلری یوروسون

داها دنیز داها ایرماق

چون باشیمیزدا توغ، گؤی چادیر اولسون.»

اوغوز خان، بئله قونوشدوقدان سونرا دؤرد بیر یانا بویرولتولار یوللادی، بیلدیریلرگؤندردی. ائلچیلرینی یولا چیخاردی. ائلچیلرین گؤتوردوگو بویرولتو و بیلدیریلرده دئییردی کی:

«من اویغورلارین خانییام. هم ده یئرین دؤرد بیر یانینین خانی ساییلیرام. سیزلردن ده منه باش اگمه نیزی ایسته ییرم. کیم منیم بویروغومو دینلر ایسه اونون ساوقالارینی آلارام، اؤنو اؤزومه یولداش بیله رم. کیم منیم بویروغومو دینله مز، باش اگمزایسه اؤفکه له نه رم، اونو دوشمان بلله رم. چئریلریمی اوستونه یوللارام. باسقین یاپار، توتوب اونلاری آسدیرارام. یوخ ائله رم.»

او چاغلاردا، اوغوزا یاخین ساغ یاندان، آلتون خان دئییلن بیر خان وار ایدی. آلتون خان اوغوزخانا ائلچیلری ایله بیرلیکده سایسیز آلتون، گوموش دارتیب، دگری اؤلچولمه یه جک قدر یاقوت داشلاری و باها بیچیلمز داش قاشلار گؤندردی. سایقیلارینی سوندو. اوغوزخانین بویروغونو دینله دی. گؤندردیگی وئرگیلرله اوغوزون دوستلوغونو قازاندی.

یئنه او چاغدا اوغوزا یاخین سول یاندا اوروم دئییلن بیر خان واردی. اوروم خانین ساییسی بیلینمز چئریسی و چوخ زنگین شهرلری واردی. بونجا زنگینلیگینه و اونجا گوجونه خان اوغوز خانین بویروغونو دینله مه دی. اونون دوستلاری آراسینا گیرمه دی. «اوغوزون سؤزلرینی توتمام!» دئیه رک بویرولتونو ییرتدی آتدی.

بونو دویان اوغوزخان گوجندی. چوخ قیزدی، اوروم خانین اوستونه قوشون چکدی. چئری ایله آتلانیب توغلارینی آچیب یورودو.

قیرخ گون گئتدیکدن سونرا موز داغی (بوز داغی) دئییلن بیر داغ واردی، اونون اتگینه گلدی. بورادا چادرینی قوردوردو، یاتیب دینجلدی، اویدو. سسسیزلیک اولدو.

ائرته سی گون، داها هله گون دوغارکن اوغوزخانین چادیرینا گونشدن پارلاق بیر ایشیق گیردی. بو ایشیقدان گؤگ توکلو، گؤگ یئله لی قوجامان بیر ائرکک قورد جانلاندی. قورد دیله گلدی، اوغوزخانا سؤز سؤیله دی. دئدی کی:

- «اوغوز اوغوز ای اوغوز! سن اوروم اوستونه یورومک ایسترسن، ای اوغوز من ده سنین یولوندا یورومک ایسته ییرم».

اوغوز قالخیب باخدی. بیر شئی گؤره ممه دی. چادیری توپلاتدی. گئتدی. گؤردو کی چئرینین ان اؤنونده گؤگ توکلو، گؤگ یئله لی، قوجامان بیر ائرکک قورد یورومکده دیر. او قوردون آردی سیرادا بوتون اوردو یورومکده دیر.

بئله جه گئتدیر.

بیر نئچه گونلردن سونرا گؤگ توکلو، گؤگ یئله لی قورد دوردو. اوغوز دا دوردو. بورادا بیر دنیز واردی آدینا ایتیل مورن دئییلیردی. ایتیل مورنین یانی بیر قارا داغ ایدی. ائله بو قارا داغین اتگینده ساواشلار اولدو. اوخلا، جیدا ایله، قیلینجلا ووروشوب ساوشادیلار. ائله کی:

«چئریلرین آرالاریندا

لاپ چوخ ووروشما اولدو.

میللتین کؤنلونده

لاپ چوخ قایغیلار اولدو».

ساواشلار و ووروشمالار ائله بیر قیزیشدی کی سونوندا ایتیل مورنین سویو قیپ قیرمیزی زنجفیل کیمی آخدی. اوغوز خان یئندی، اوروم خان ایسه قاچدی قورتولدو.

اوغوز خان بوندان سونرا اوروم خانین خانلیغینی الیندن آلدی، ائلینی الیندن آلدی. چوخ لاپ چوخ اولجالار قازاندی، بیر زنگینلیکدیر هر یانا دولدو.

اوروم خانین بیرده قارداشی واردی آدینا اوروز بیگ دئیردیلر. یوکسک داغ باشیندا ایکی یانی درین ایرماق اویوموندا چوخ ساغلام دوزلمیش هم ده چوخ ساغلام قورونور بیر شهر واردی. اوروز بیگ اؤز اوغلونو اورایا یوللادی. یوللارکن ده «شهری یاخشی قوروماق گرکدیر. یاخشی قورویوب بیزی ساخلاماق گره کیر. ائله ائدرسن، ووروشمالاردان سونرا گلرسن» دئیه اویاردی.

اوغوز خان بو شهرین اوستونه ده یورودو. اوروزبگین اوغلو بونو گؤرونجه، اوغوز خان چوخلو قیزیل ، گوموش یوللادی. اوغوز خانا باش اگدی، دئدی:

«سن منیم خانیمسان؛ آتام منه بو شهری وئیب دئدی: شهری قورو، ووروشمالاردان سونرا منه گل. آتامین سنه باش قالدیرماسی منیم سوچوم دور؟ من سنین بویروغونو یئرینه یئتیرمگه سؤز وئریرم. بیزیم موتلولوغوموز سنین موتلولوغوندور. سویوموز سنین آغاجینین میوه سیندندیر. تانری سنه گوج وئریب، بویورموشدور. من ده سنه باشیمی وئریرم. سنه وئرگی وئریب، دوستلوقدان آیریلمارام.»

اوغوز خان، ایگیدین سؤزلرین بگندی، سئویندی، گولدو دئدی کی:

«من چوخ آلتین یوللادین

شهرینی ساخلامیش اولدون...»

بئله دئدیگی اوچون ده ایگیده ساخلاب آدینی قویدو و اونا دوستلوق گؤستردی.

اوندان سونرا قوشونو آلیب یئنه یورودو. ایتیل دئییلن ایرماغا گلدی. ایتیل ایرماغی بؤیوک بیر ایرماقدیر. اوغوز خان ایرماغی گؤرونجه «ایتیل سویونو نئجه کئچک؟» دئیه سوروشدو.

قوشون ایچینده بیر بیگ واردی کی آدینا اولوغ اوردو بیگ دئیردیلر. اوسلو بیر ار ایدی. اولوغ بیگ، ایرماغین ایرماغین یانیندا چوخ سیخ آغاجلار اولدوغونو گؤرونجه، آغاجلاری کسدی، آغاجین بیرینه یاتدی، قارشییا کئچدی. اوغوز خان چوخ سئویندی، گولدو، دئدی کی:

«ای ار سن بوردا بیگ اول

قیپچاق دئییلن بیگ اول.»

اورادا قالمادیلار، یورودولر، گئتدیلر.

اوندان سونرا اوغوزخان یئنه ده گؤگ توکلو، گؤگ یئله لی قوجامان ائرکک قوردو گؤردو. گؤگ توکلو، گؤگ یئله لی ائرکک قورد اوغوز خانا: «اوغوز ایندی سن قوشونلا بورادان آتلانیب یورو؛ آتلانیب چریلرینی، بیگلرینی آل گؤتور. من سنین اؤنونده گئده جگم، سنه یول گؤستره جگم.» دئدی.

دان آغاردیغیندا اوغوز خان گؤردو قورد قوشونون آرنونده گئدیر. سئویندی، اؤنه کئچیب ایلری گئتدی.

اوغوز خان آتلارینین ایچینده ان چوخ آلاجا آیقیری سئوردی، یالنیز بو آیقیرا مینردی. یئنه آلاجا آیقیرا مینمیشدی. یولدا دینجه لینجه، اوغوز خانین آیقیری گؤزدن ایتیب، قاچدی گئتدی. اورادا بیر اولو داغ وار ایدی. تپه لریندن قار بوز اسکیک اولمازدی. دوروغو قارین بوزون سویوغوندا آپ آغدی. اونون اوچون آدینا بوز داغی دئیردیلر.

اوغوز خانین آیقیری بوز داغینین بیلینمز کئچیتلرینه قاچیب گئتمیشدی. اوغوز خان بوندان چوخ آجی چکدی. اوغوزخانین اوردوسوندا بیر بیگ وار ایدی. ایگیت، قاهرامان بیر ار ایدی. هئچ بیر ندن قورخمازدی. یوروشه ده سویوغا دا دایانیقلی ایدی. بوز داغینا ووردو گئتدی. داغدا چوخ سویوق اولدوغوندان، قارلارا بولانمیشدی. آپ آغ ایدی.

اوغوز خان سئوینجیندن گولدو «سن بو چئوره ده کی بیگلره باش اول، سنین آدین اولوق گونه دک قارلوق اولسون.» اونا آغیجلاری باغیشلادی، یورویوب گئتدی.

 یولونون اوستونده بیر بؤیوک ائو گؤروندو. اوغوز خان ائوه یاخلاشدی. ایگیجی باخدی. ائوین هؤرکلری آلتوندان، آتیشقالاری گوموشدن ایدی. چاتیلاری دمیردن ایدی. قاپیسی قاپالی ایدی. آچیلمادی.

قوشوندا بئجریکلی، الیندن هر ایش گلن بیر ار وار ایدی. آدینا تؤمورلو قاغول دئیردیلر. اوغوز خان اونا بویوردو: «سن بورادا قال آچ. قاپینی آچدیقدان سونرا گل اوردویا قاتیل!.». بو اوزدن تؤمورلو قاغولا اوندان سونرا «قالاچ» دئییلدی. اوردو یولونا سوردو.

بیر گون گؤگ توکلو، گؤگ یئله لی قوجامان ائرکک قورد دوردو، یورومه دی. اوغوز خان دا دوردو، یورومه دی. اولدوغو یئره چادیرینی قوردوردو.

بوراسی اوتسوز چوراق بیر یئر ایدی. «چورجوت» دئیردیلر. بؤیوک بیر یورتدور. بؤیوک بیر ائلدیر. آتلاری، اؤکوزلری چوخ، بیزوولاری چوخ، آلتینلاری، داش قاشلاری، گوموشلری چوخدور.

چورجوت خانلا اونون ائلی، اوغوز خانا قارشی اولدولار. اوغوز خان اوستون گلدی، یئندی. چورجوت خانی باسدی، اؤلدوردو. باشینی کسدی. چورجوت ائلینی بویروغو آلتینا آلدی.

بو ساواشدان سونرا اوغوز خانین چئریلرینه ائله بیر دولو ساواش سویقاسی قالدی کی ساییسی بللی سیز ایدی. یوکله ییب گؤتورمگه نه آت نه قاتیر نه ده اؤکوزلر یئتدی. اوغوز خانین اوردوسوندا یئنه بیر ار وار ایدی. هم اوسلو هم بئجریکلی ایدی. اونون آدینا بارماقلیق چوسون بیلیک دئیردیلر. بئجریکلی اوستا اولان بو بارماقلیق چوسون بیلیک بیر قاقنی دوزتدی. اوستونه سویقالاری قویدو، دولدوردو. قاقنینین اؤنونده ده جانلی ماللاری، آتلاری، قاتیرلاری، اؤکوزلری هر نه تاپدیسا اله کئچنی قوشدوردو. او جانلی ماللار بو جانسیز سویقالاری چکیب آپاردیلار. گؤرنلرین هامیسی چاشیب قالدیلار. هرکیم داها چوخ قاقنی دوزتدی. گؤرنلر قاقنیلار گئتمکده ایکن «قانقا، قانقاریال قانقالیق» دئییب سسله نیردیلر. بونون اوچون بارماقلیق چوسون بیلیکین آدی دوزلتدیگی نسنه سینین، قاقنی اولوب قالدی.   

اوغوز خان، قاقنیلاری گؤرونجه، قاتیلا قاتیلا گولدو، دئدی کی: «قانقا قانقا ایله جانسیزی جانلی یوروتدو، قانقالیق دا سنه آد اولدو. بو آدی قاقنی بئله بلیرتسین.» اورادا دا دورمادی، یورویوب گئتدی.

داها سونرا گؤگ توکلو گؤگ یئله لی قوجامان ائرکک قورد ایله بیرلیکده سند، تانقوت، شام طرفلرینه آت سوروب واردی. بیر چوخ ساواشلاردان سونرا اورالاری دا آلیب، اؤلکه سینه قاتدی. اورالاردا دا بویروغونو یئریتدی. اورالاری دا اؤز یوردو آراسیندا سوخدو، یئندی، باسدی.

سؤیلنمه دن قالماسی یئری یوردو بللی اولسون، آشاغیلاردا بارقان دئییلن بیر اؤلکه واردی. بؤیوک، وارلیقلی بیر یورتدور. هاواسی چوخ سیجاقدیر. آولاری، قوشلاری چوخ بولدور. آلتونو دا چوخدور گوموشو ده، قاش داشی دا. آنجاق آداملارینین اوزو قاپ قارا ایدی.

  بارقان آدلی بو آرلکه نین خانینین آدی ایسه ماسار ایدی. اوغوز خان اونون اوستونه ده یورودو. چوخ یامان بیر ساواش اولدو. اوغوز خان یئنه اوستون گلدی. ماسار خان ایسه قاچدی، قورتولدو. اوغوز اونو دا باسدی، یوردونو آلدی گئتدی. اوغوز خانین یولداشلاری سئویندی، دوشمانلاری ایسه قایغیلاندیلار.

اوغوز خان ماسار خانی دا یئنینجه، ساییلمایاجاق سویقالارلا آت سورولری آلاراق یوردونا دؤندو.

آدینی آنمادان اولماز، بیلینسین کی اوغوزخانین یانیندا آغ ساققالی، آغ ساچلی، چوخ اوسلو بیر یاشلی کیشی وار ایدی. آنلاییشلی ایدی. دوغرو دوشونوب، دوغرو قونوشوردو. اوغوز خانین دانیشمانی ایدی، آدی اولوق توروک ایدی.

اولوق توروک گونلردن بیرگون، بیر دوش گؤردو. دوشونده بیر آلتون یای ایله اوچ گوموش اوخ گؤردو. بیر آلتون یای، گون دوغوشوندان، گون باتیسینا کیمی گریلمیشدی. اوچ گوموش اوخ ایسه قوزئیه دوغرو اوچوردو.

یوخودان اویانینجا اولوق توروک، دوشونده گؤدوگونو اوغوز خانا آنلاتدی:«اوغوز خانیم، سنه یاشام بونجا اولسون! سنه دیرلیک آبین اولسون! گؤی تانری دوشومده نه وئردیسه گرچک اولسون! تانریم بوتون یئر اوزونو سنین تؤره مه نه باغیشلاسین!.» دئدی.

اوغوز خان اولوق توروکون سؤزلرینی بگندی، اؤگوتلرینی دینله دی. یئرینه گتیردی. ائرته سی گون، کیچیک بؤیوک، بوتون اوغوللارینا بویروق سالیب، یانینا گتیرتدی. اونلارا دئدی کی: «منیم کؤنلو آو دیله ییر. قوجالدیغیم اوچون واریب گئده بیلمیرم.» ایندی سیز:

«گون، آی، اولدوز! گون دوغوسونا دوغرو واریب گئدین. گؤی، داغ، دنیز! سیز ده گون باتیسینا دوغرو گئدین!» دئدی. 

بو بویروق اوزرینه اوغوللاریندان اوچو گون دوغوسونا دوغرو آت سوردولر، اؤته کی اوچو ده گون باتیسینا دوغرو.

گون، آی، اولدوز، بول آولار آولادی، چوخ قوشلار ووردو. سونوندا یولدا بیر آلتون یای تاپدیلار. آلدیلار، گتیریب اوغوز خانا وئردیلر. اوغوز خان چوخ سئویندی. گولدو. یایی اوچه بؤلدو.

«ای بؤیوک اوغوللاریم! یای سیزلرین اولسون! یای کیمی اوخلاری گؤیه کیمی آتین!» دئیه قونوشدو.

گؤی، داغ و دنیز ایسه گون باتیسینا دوغرو چوخ اولار تاپیب، چوخ قوشلار آولادیقدان سونرا، دؤنرکن یولدا اوچ گوموش اوخ تاپدیلار. آلدیلار، گتیریب اوغوز خانا وئردیلر. اوغوز خان یئنه سئویندی، یئنه گولدو. اوخلاری اوچه بؤلوب، کیچیک اوغوللارینا وئررکن:

«ای کیچیک اوغوللاریم! اوخلاری سیزه وئردیم. یای اوخو آتار. سیزلر اوخلار کیمی اولون.!..» دئدی.

بونلاردان سونرا اوغوز خان بؤیوک قورولتای قوردو. هامینی چاغیردی. چاغیریلانلار گلیب سؤیلشدیلر، اوتوروب بکلشدیلر.

اوغوزخان بؤیوک اوتاغینین ساغ یانینا قیرخ قولاج اوزونلوغوندا بیر آغاج دیرک تیکدیردی. تپه سینه بیر آلتون تویوق قویدوردو. دیبینه بیر آغ قویون باغلادی.

یئنه اوغوز خان بؤیوک اوتاغینین سول یانینا قیرخ قولاج اوزونلوغوندا بیر آغاج دیرک تیکدیردی. اونون تپه سینه ده بیر گوموش تویوق قویدوردو. دیبینه بیر قارا قویون باغلادی.

ساغ یاندا بوز اوخلار اوتوردولار. سول یاندا اوچ اوخلار یئرلرینی آلدیلار. قیرخ گون قیرخ گئجه یئییلدی، ایچیلدی، اگله نیلدی، گولوندو. قیرخ گون قیرخ گئجه کئچدیمدن سونرا اوغوز خان اوغوللاری آراسیندا یوردونو پایلاشدیردی، دئدی کی:

«ای اوغوللاریم! من چوخ یاشلاندیم

چوخ ساواشلار گؤردوم

جیدا ایله چوخ اوخ آتدیم

آیقیر ایله چوخ یوللار آشدیم

دوشمانلاری آغلاتدیم

یولداشلاریمی گولدوردوم

گؤی تانریا اولان بورجومو اؤده دیم

سیزه ده یوردومو وئردیم...».