گئنه آرغین گئنه یورغون گئنه بیر غملی اؤره ک

 

 یارالی قوش کیمی چیرپینمادادیر

گینه نیسگیلی اؤره ک یانمادادیر

کؤز گؤز اوسته قالانیر نئیله مه لی

آلیشیر دالغالانیر نئیله مه لی

سرمی نه آتا بیلدی نه آنا

گئدیرم چله خانا-چله خانا

من گرک یار یانان اودلاردا یانام

یار دئیب یار دولانام

نه روا عشقی دانام-من باها نغمه سیم

 نغمه آدیم -گلمیشم عشق زلیخا یارادیم

هانی لیلی-هاتنی شیرین

قویام خسرتلی باشی دیزلرینه

بی باخام غمله دولان گؤزلرینه

دئیم عاشیق اودی اودلاردا یانا-

ننه دئیم چله خانا-چله خانا

 گئدیرم دونیا بویو داردی منه

یانماسام عشق اودونا عاردی منه

آجیمیش عشقی شیرین لشدیره ره م

آیری دوشموش ائلی بیرلشدیره ره م

داغیت اؤلکمده دیسین قوشلاریمیز

اوخشاسینلار بیزی تای توشلاریمیز

قوی دیریلسین اؤلن احساسلاریمیز

من او غفلت جاداسین تاژلامادیم

یانمیان لامژا کیمی لاپلامادیم

نازلی یار گئدی ایاق ساخلامادیم

یار ائشیکدن اؤزون اودلاندیردی

من ایچیم یاندی منی یاندردی

سانما نغمه ال آیاق چالمادادیر

یارین عشقی جانیمی آلمادادیر

عشق سلطانی فرج وئرسه بیزه

سئل اولوب گؤز یاشی دؤنمز دنیزه

شیشه عمری چالیب سیندیرارام

عشق اوتوندا اؤزومی یاندیرارام

دولدوروب کاسه صبری جالارام

چیخارام داغلارا های های سالارام

نازلی یار گئتسه نه جور تک قالارام

ایسته ییر باشیمه دنیا دولانا

گئدیرم چیله خانا- چیله خانا

وامقین جاندان گئچن عذراسی یام

من یانان مجنونیمین لیلاسی یام

نغمه والاسی یام عاشق شیداسیام

عشقیده فرهاد وشیرینن باشام

اصلی یه عشق عالمینده یولداشام

کیم بوکر دونیا باغین باغچاسینا

کیم بوکر عشقی عاقیل بوغچاسینا

سانما یین عشق اؤلوبدیر دیریدی

نغمه عاشیق سیراسینان بیریدی

تاپارام عشقیمی هر یئر ده اولا

قویمارام تک دولانیب رنگی سولا

ایندی کی گئتمه لی یم هر نه اولا

عشق دریادی عاقیل قطره سیدی

نغمه نین سون سسی عاشیق سسی دی

منه دونیاده ااشز عشقیم بسیدی

سؤیله مندن گنه بیر غملی سلام

سئودیگیمنن منی آیری سالانا

گئدیرم چله خانا- چیله خانا

سن آغیر داغ کیمی داغلار باشیسان

بیر عوموردور سینه ده غم داشیسان

سن کی زنگانیلارین یولداشیسان

بیر چیغیر بلکه یاتانلار اویانا

گئدیرم چله خانا-چله خانا

« نسیمی » نین قانی یام

منه حقارتیلن باخمایین ، غزل کانی یام ،

واراق – واراق داغیلان ائلده ، شعر دیوانی یام ،

منیم ویقاریمی گئت ، چیلله خانه دن خبر آل ،

اخی فرج کیمی یم ، منده عشق سولطانی یام ،

یاشیل چمنده بیتن ، سینه داغلی بیر لا لایام ،

« فضولی » نغمه سی یم من ، « نسیمی » نین قانی یام ،

اولار کی عاشق دلخسته دیر ، تانیللا منی ،

بو اؤلکه ده اؤلن عاشیقلرین ، چیخان جانی یام ،

آری کیمی دولانین گوللر اوسته ، بار گتیرین ،

آنام دیلی شیره دیر ، من او شیره نین شانی یام ،

بو فخردیر منه تورکو ائلیمدی  ، تورکو دیلیم ،

منم بسیمدی فقط ، سهروردینی تانی یام ،

بیر حقی باتمیش ائلین سینه داغلی شاعیری یم ،

غزلچی « جعفری » یم ، اؤلکه مین آدی سانی یام ،

شاعیر:اوستاد هوشنگ جعفری

************************************

« هایلانیر 

 

هایلانیر کیمسه کی ایستیر یاشیل اولسون وطنیم
ساری دؤش بولبولوم اؤلدو یاسا باتدی چمنیم
زارزار آغلاییبان بیر بله آغلاتما منی

بو باغین باغبانی واردیر نه سنیندیر نه منیم
من گرک آغلایام اؤز حالیما هردم گؤرورم
قویلانیر تورپاغا بیر بیر دوشونوب دیل بیلنیم
من ده بو گللر آرا بیر نئچه گون قالمالی یام
نوبتیم گلدی گئدم بیر اؤزومم بیر کفنیم
خرمن همتیمیز اود توتوب اودلانمادی
یئله سورولدو سامانیم سئله دارتیلدی دنیم
تاپلانیر حق سؤزون اوستونده کیم ایستیر دانیشا
هولالانمیش کولش اولسامدا ازیلدی

شاعیر:اوستاد هوشنگ جعفری

هوشنگ جعفری نین شعرلری

 

 

 

یار آغلادی من آغلادیم

 

یارین بویون قوجاخلادیم

 یارآغلادی من آغلادیم

ییغشدی قونشولار بوتون

جار آغلادی من آغلادیم

باشیندا قارلی داغلارا

 دانشدیم آیرلیق سوزون

بیر آه چکیب باشینداکی

 قار آغلادی من آغلادیم

طاریمدا نار آغاجلاری

 منی گوروب دانیشدیلار

بویومو زیتون اوشاخدی

 نار آغلادی من آغلادیم

ایله که اسدی بیر خزان

تالاندی گوللیرم منیم

خبر چاتینجا بولبوله

خار آغلادی من آغلادیم

اورک سوزون دئدیم تارا

سیملر اولدی پارا پارا

یاواش یاواش سیزیلدادی

تا آغلادی من آغلادیم

دئدیم کی حق منیم کی دیر

باشیمی چکدیلر دارا

طنف سیخاندا بوینومو

 دار آغلادی من آغلادیم

جعفری یم بویوم بالا

اورکده غم قالا قالا

یار جانمی آلا آلا

 یار آغلادی من آغلادیم

شاعیر:اوستاد هوشنگ جعفری

************************************

 

 

 

 

 

*** حاققیمیزی  ***

 

 

بوزا یازمیشدی قیز اوغلانلی بیزیم حاققیمیزی

اریدیر بیر بئیینی قانلی بیزیم حاققیمیزی

پایلاییر تک کوللارا یارپاقلاریمی

دیلی ، آغزی ، الی قرآنلی بیزیم حاققیمیزی

گؤردوگون اوتدو ، دماوند قیمیللانمادی هئچ

یئنه اوتماز دئدی ایرانلی ، بیزیم حاققیمیزی

نییه گؤیلرده بولوددان ال آتیب آلمیرسان

ساوالان ای باشی طوفانلی بیزیم حاققیمیزی

دوتوبان نیسگیل الیندن دئدی خرمنلره باخ

سووورور گؤ نئجه سهمانلی بیزیم حاقیمیزی

ال آتیب ایندی قلمدن غزل ایستیر دفتر

اورداکی داندیلا دیوانلی بیزیم حاققیمیزی

قویمایین بارماغی حسرت قالا بال بارداغینا

یاخمایین کوللارا شان- شانلی بیزیم حاققیمیزی

گئجه بیر پالچیقا باتمیش کوچه دن سس گلدی

کورلادین آی کدر ایمانلی بیزیم حاققیمیزی

کتده بیر هیسلی دام التدا بویو عنبرچه قادین

ائله سؤیلوردو یاریم جانلی بیزیم حاققیمیزی

شاعیر:اوستاد هوشنگ جعفری

************************************

 

شراب ناب

 

 ایچیدیم    بیر   شراب  ناب   عشقی

گوزون  تک کاسه ی پیمانه لرده

 منه   زیبا   پرستلیک  عادت  اولدو

گوزوم  قالدی  رخ  جانانه لرده

هوشوم باشدان چیخیر قالمیر  قراریم 

 قارا زلفون گورنده  شانه لرده

اگر  مجنون عشق اولسان  منیم تک

 بیلردین وار نه حال دیوانه لرده

من  اوندا  مست  عشقم  گل  دانیشدیر

 سوراغیم  دوتگیلان  میخانه لرده

عزیز لیکده  منی  کاش  بیر  گوریدین 

 الان  بیر  بایقوشام  ویرانه لرده

خرابه   گوشه سینده  وار  بیر عالم  

 که  یوخدور مجلس شاهانه لرده

منیم  سن  منبع  الهامیم  اولسان

  آدیم   دائیم   قالار  افسانه لرده

اوخوردی جعفری شعر آغلاشیردی

نه بیر ایشگین لری  بیگانه لرده

 

 

 

 

 

شکیل

 

بیر ائلی بوراندا قاردا چکه جم

بیرائلی باهاردا واردا چکه جم

بیر شکیل چکه جم گوزگیله سینه

آرزیلار دوزوله سیل سیله سینه

بیر باهار سالاجام قیش چیله سینه

بیر لالا خونچاسین قاردا چکه جم

بیر داغی چکه جم دومان ایچینده

بیر یاخشی بیتره م یامان ایچینده

بیر حققی دوغرولدام گومان ایچینده

شاختادا بیر آغاج باردا چکه جم

بیر سئلی چکه جم سارا قوینوندا

بیر ائلی یاردیم سیز یارا قوینوندا

بیر دیلی دیلچک سیز داردا چکه جم

تیکیلی بیر آغیز چکه جم بوما

بیر درین باخیش کی فیکیره جوما

یوللایام شکیلین تهرانا قوما

بیر ائلین یوخلوقون واردا چکه جم

بیر ایشیق چکه جم اوزاقدان آتیب

بیر دنیز چکه جم دنیزه باتیب

بیر ائلی چکه جم مین ایلدی یاتیب

وارلیغین بیلمیره م هاردا چکه جم

نیله ییم دیل سیز بیر باش چکه نمیرم

ائلیمین گوزونده یاش چکه نمیرم

بو ائلین ماهنی سین تاردا چکه جم

ائلیمی باهاردا واردا چکه جم

 

 

 

 

 

 

 

 

آچین آققیشقالاری

 

هاوالار تک اوره گیم دولقون دور

قورویان داغلارا یاغماخ دیله ییر

آچین آققیشقالاری

هاوالار تک اوره گیم دولقون دور

قورویان داغلارا یاغماخ دیله ییر

سئل اولوب ظالیم ائوین ییخماغا آخماخ دیله ییر

ایلدیریم تک گئجه باغرین یارا شاخماخ دیله ییر

گونَ باخماخ دیله ییر

آچین آققیشقالاری

منه یوخ ، قفس غمده قناریلره رحم ایله یین

بیر گولون سولماسینا سولمامیشام

قلبیمین دولماسینا دولمامیشام

قورخورام توستو چالا گول خانانی

آچین آققیشقالاری

آچین آققیشقالاری

آچین آققیشقالاری

بیر گُروم اولکماغا بیرلشن ائللر نئجه اولوب

کوچه لره یوموروخ توستورو بایراق اولان اللر نئجه اولوب

بیزیم ائللر نئجه اولوب

آچین آقیشقالاری

آچین آقیشقالاری

بو نه ینردی کی ایشیقلیق یولی یوخدور

بیری بیر شیر دیر دوشوب دار قفسه ایچره چالیشانمیر

آنا ایستکلی بالانان باریشانمیر

آچین آقیشقالاری

بیرینی بیر بغض توتوب دانیشانمیر

بیری بیر شیر دیر دوشوب دار قفسه ایچره چالیشانمیر

آنا ایستکلی بالانان باریشانمیر

آچین آقیشقالاری

ایکی تورپاق باریشانمیر

آچین آقیشقالاری

بابا آچین آقیشقالاری

بو نه ائل دور کی ایشیقلیق یولی یوخدور

بیرینی بیر بغض توتوب دانیشانمیر

بیری بیر شیر دیر دوشوب دار قفسه ایچره چالیشانمیر

آنا ایستکلی بالانان باریشانمیر

آچین آقیشقالاری

ایکی تورپاق قاریشانمیر

قول بویون نان ساریشانمیر

آچین آقیشقالاری

آچین آقیشقالاری

ائله بیل کی قولاغا وای سسی گلدی

قاراباغدان اوغول ای وای سسی گلدی

آچین آقیشقالاری

آچین آقیشقالاری

شاعیر:اوستاد هوشنگ جعفری

************************************

 

 

 

 

 

 

ساوالان

  اوچور ایلهامیم او قوشلار کیمی کی

یاز وعده سینده

قووزانیر ماوی گؤیه تا اوجا باش بیر داغا قونسون

کؤرپه قارتال کیمی دیر

گاه چکیلیر گوزده ن ایتینجه ک

اگله نیر گاه ساوالان عشقینه – آغدان – آغاقونسون

هر اوجا داغ کی گؤرورسن باشی قارلا آغاراندی

اورا بیل کی ساوالاندی

آمما یوخ !

هر اوجا داغ سسیمی السا دا تئز قئیته ره جکدی

سسی قئیته رمک همان یئل بیله جکدی

آخی یئل یولچودو گئتگین اوکی سؤز ساخلایا بیلمز

یئل سؤزو قاپدی قاچیردار اونو کیم هاخلایابیلمز

یئل گئدرگیندی پیچیللارسؤزوکوللار قولاغیندا

سؤزو قربان ائله یر قیرنادا قانقال آیاغیندا

چئویره ر سؤز چاناغیندا

جالایارداغلارا هر بیر سؤزو مین سؤز تؤره دندی

بیلمیرم سیرری ندندی

یئل گئده ر گیندی یئلی ساخلاماق اولماز

یئله بئل باغلاماق اولماز

 

آمما سن ای سؤزو سینه نده کؤزردن ساوالانیم

کیم گله صدقله زرتشت بئجردن ساوالانیم

ائلیمین شانلی داغی باشیوه مین لرجه دولانیم

اریدیب ائل غمی بیر یول سنی کؤکدن ده تالانسان

سئل اولوب قانلی دنیز لر کیمی دونیایه جالانسان

آدی دیللرده قالاناسان

ساوالانسان ، ساوالانسان

ساوالان ائل غمینی بللی دی ساخلار سینه سینده

سینه سی کؤزدو آلودور گیزیریک اینسی سی واردیر نفسینده

شاعرین غملی سه سینده آلگیلان ساخلاسن ای ائل داغی غملی قفسینده

ساوالان آلسادا هر سیرری سؤزو داغلارا سالماز

گؤره نامرد دوروبدور ساوالاندان سس اوجالماز

ساوالاندا تؤکولن داشلاری دیندیر دانیشاللار

سالسا عاشیق نفسین کوللارا آلیشاللار

ده ده قود سازی چالسا

ده لی دومرول باش اوجالدار

بلی البته کی یولداش باشینی یولداش اوجالدار

سسله عاشیق سازی چالسین

سسی میز بیرده اوجالسین

اویناماقلیز گی یه دؤنسون

کاس شوشمگوزگویه دؤنسون

قوی وئره ک سس سسه باهم اوخویاق بیر ده کوراوغلو دلی سیندن

هجرین قوچ نبی سیندن

اوکی ظالیملری مظلولارین اوستونده ازه ردی

او کی آسلان کیمی داغلاردا یاتیب باغدا گزه ردی

اوخو عاشق اوخو

سن بیل او کی تانری تانییبسان

سؤزومه دوز جالییبسان

سوموگوم قوی سازا گلسین

بولبولوم آوازا گلسین

یازمیشام ایوازا گلسین

گوچ آلاق قوی دلی لردن

باج آلاق اجنبی لردن

او کی بیلمیر نبی کیمدیر قویون آذرائلینی مسخره سانسین

بیر عؤمور دورکی فضولی نی – نسیمی نی دانیب ایندی ده دانسین

شهریار تک سن اوجالت باشیوی قوی عرشه دایانسین

قوی باخار کور تر ایچینده جوموبان اؤلسون – اوتانسین

اوکی آخساخدی یوبانسین

اوکی تورکون دیلین اسگیتمه گه تصویره سالیبدیر

اوکی تورکون بالاسین ایندی ده آشغالچی سانیبدیر

او تفاله بیلیرم فیکیرینی طاغوتدان آ لیبدیر

او رژیمدندی قالیبدیر

یوخسا تورکون بالاسیندا نچیخیب علامه ی دوران

اونا دونیا باش ا ییر فلسفه ده

بیر جه نه ایران

قوی دئییم شهریاریمدان

نیسگیل او چرچی یه قالسین کی جواهر نه دی ، قانمیر

فیکری آللاتما دادیر خالقی ، ائلین حالینه یانمیر

اریمیر ، اؤلمور ، اوتانمیر

آخی ای قاردا ، دوماندا باش اوجالدان ساوالانیم

غمی ، دونیا نی قوجالدان ساوالانیم

ائل بیلیر داغلار آرا هراوجا داغلار باشی سن سن

وئرسهنده الیوی قارداشیوین سیر داشی سن سن

وئر گیلن بیر لیک الین بیرده دماونده اونون یولداشی سن سن

اوندان آیریلما آماندی

یولوموز چندی دوماندی

قوی ایگیدلر سیزه فخر ائیله ییبن باشان اوجالتسین

قویما قارتال دولانان یئر لره قوز غون الی چاتسین

ساوالان چنلی چاغیندا

منیم ایلهامیم اولارکن

کؤنلوم اؤز سرری سؤزون صدق ایله سؤیلر ساوالانه

ساوالان کؤز قالادار شاعر اولانلار سینه سینده

اوردا زرتشت گئیب تانریدان ایلهامین آلانه

اگیرم باش ساوالانه ، اگیرم باش ساوالانه

 

 

 

قرآن قیشقیردی

 

بیر گئجه آسدیلار آسلانلاری دان قیشقیردی ،

قورقوشوملار سینه سینده گول آچان قیشقیردی ،

زالی لار سوردولا دؤرت دؤره دن اندیشه لرین ،

قدد و قامت یئره دوشدوکجه آذان قیشقیردی ،

قیزلارین ناله سی قووزاندی بولودلار دؤشونه ،

هاوالار شاققیدی گؤردوم ساوالان قیشقیردی ،

قارالیقلاردا قارانلیق تؤره دن بایقوشلار ،

چاپدیلار آیه لر اوستونده ، قرآن قیشقیردی ،

بیری نین قیش تایاسین دامدا گامیشلار ( جامیشلار ) سؤکدو ،

بیر آریق توخلو آجیندان باجادان قیشقیردی ،

گئجه بیر واقت بئله سونجولدو تیکانلار دؤشونه ،

وای دئیر کن دوداغین یومدو تیکان قیشقیردی ،

هر گئجه هر یئنی بیر بابکه نئشتر دگدی ،

آت گؤلوندن قارا قاشقا اوجادان قیشقیردی ،

داغلارین شیهه سی آز قالدی یئری شاققالاسین ،

قولاغیم باتدی دئدیم یئر گؤی الان قیشقیردی ،

سازی سیندیردیلا آل ماهنی لارین قوینوندا ،

هر سازین توزلو تئلیندن مین اوزان قیشقیردی ،

دری سین سویدولا گؤز باخدی ، دیلی آخ دئمه دی ،

سویولان گولدو او بیر لحظه سویان قیشقیردی ،

ایسته دیم شعری عروض ایله یازام بیر کلمه ،

قیشقیریق سالدی یاپیشدی هیجادان قیشقیردی ،

شاعیر:اوستاد هوشنگ جعفری

************************************ 

بابک کیمی دور قوللارینی چیرمالا هی هی

تورک ائللرینی ییغماقا تونقال قالا هی هی

باش بؤلگو بؤلنلر سیزی یاددان چیخادیبلار

حق آلمالی دیر دور یاپیشاق قول قولا هی هی

آی نسل نسیمی سیزه سوسماق کی یاراشماز

تورک اوغلو دئمز آخ دریسین سویسالا هی هی 

شاعیر:اوستاد هوشنگ جعفری

************************************

 

 

گئجه دیر باخیرام کدرلی آیا

ازونه سانکی بیر قارا چئکیبلر

اوردا دا یاسلیدی بوتون داش قایا

گؤیده ده گؤنشی دارا چکب لر

جومموشام اؤزومده باخیرام گؤیده

آرزیلار سانیجا اولدوز ساییرام

ایستیرم قارانلیق چولغایان ائلده

ییغام اولدوزلاردان گؤنش قاییرام

قونشولار یوخلاییب بیر من اویاغام

نئله ییم گؤزومون یوخوسو گلمیر

من ده کی اؤچ گؤنلوک سیزه قوناغام

سیز دن ده آییق لیق قوخوسو گلمیر

گؤز یاشیم گؤزومده تؤره دیب یاغیش

گئدیرم سئل اولام منی هایلایین

سیز پای گتیره م بیر بوستان باخیش

آپارین ائللرده باخیش پایلایین

 

شاعیر:اوستاد هوشنگ جعفری

************************************

 

 

فریاده گلون

 

فریاده    گلین   نازلی   نیگاریم   گئدیر  الده ن

 همد م  اولوب  اغیاریله  یاریم گئدیر  الده ن

رفتاری گوزل نوطقی گوزل باخماسی گویچک 

 آهو  کیمی  باخدیقجا  قراریم  گئدیر الده ن

حسرتله   قالار   گوزلریم آخیر دالئسیجا 

 هجران یئلی اسدیکجه  باهاریم   گئدیر الده ن

ناز  ایله سه   نازین  چه که ره م  ئول  دیسه  ئوللم 

 یوخ چاره یولوم شعر و شعاریم گئدیر الده ن

آواره   قالان   من  غمی   عشقینده   یانان  من

 آخیر  نه   دئییم   دار و  نه داریم گئدیر الده ن

زلفین  توکوب  اطرافه گیوب جامه ی  زرین 

 آماده   اولوب   گئتمگه   یاریم   گئدیر الده ن

 شاعیر:اوستاد هوشنگ جعفری

************************************

 

آغ آتیم

 

آغ آتیم ، قول قاناتیم ،

آت قدمین یورتمه یئری !

آش تپه لردن

سیلدیریم تک سره لردن

سئله سینمیش دره لردن

بو نه طوفاندی گؤزل کهلیگیمی ایستیر آییرسین فره لردن

غیرتیم جوشه گلیر غملی خبردن

آغ آتیم – قورخما خطردن !

آغ آتیم قول ، قاناتیم ،

شیهه چک ، قوی سسیوه

بلکه یاتانلاردا اؤیانسین

یاتماغین واختی دگیل دورسون اوتانسین

یاتانین عؤمرو تالانسین

تازا نعلین وار آتیم

چال بو داغین سینه سینه ، قوی پارالانسین

چال داغین سینه سی باتسین ، یارالانسین

داشی داشدان ، آرالانسین

آغ آتیم قول قاناتیم

داش قایادان آشما چتیندی

قاباق اؤز یوققوشادی ، قاشما چتیندی

داغا دیرماشما چتیندی

داشا ، سووخاشما  چتیندی

باخما یوللاری چتیندی ، اورانین هیبتی یوخدور

آغ آتیم همت ائله !

غیرتی یوخدور

هله اؤز یوققوشالار چوخدو قاباقدا

آشماق اولماز بو آیاقدا

آغ آتیم قول قاناتیم

بسدی ایاق ساخلاما ، گون باتدی قارالدی

گون گئچیب داغ دالینا رنگی سارالدی

داغین اوستون دومان آلدی

آغ آتیم ، بس بو نه حالدی؟

بورا یارقاندی  آتیم دورما آماندی ....

آغ آتیم ، قول قاناتیم

آت قدم آیدینلیغا ساری

هؤرکوشن   اوولاریلان   ؛ چیخ سره یاللاری   یوخاری

قار قالان داغلارا سال بیر نفسین

قوی اریسین بوز کیمی چئگینینده کی قاری

سولاری آرخلارا سال بلکه سووارسین

قوری قالمیش اوبالاری

قوی بؤیوک گولده اؤزوشسونله یاشیل باش سونالاری

آغ آتیم

جهد ائله باری

سنی تاری !

آغ آتیم ، قول قاناتیم

طبعیمین دریاسی جوشقوندو

یئل اسدیر لپه لنسین

قوی چالیم صخره لره دالغامی  ، دالغام سپه لنسین

قوی یاغیش تک قورویان

داغلارین اؤستونده اله نسین

هرزه اوتلاری آپارسین

لالا بیتسین

هامی گؤللر تزه لنسین

گؤلو بلبل یییه لنسین

آغ آتیم ، قول قاناتیم

آت قدمین قلعه ی بابکدن آشاق

قارا گؤنلن ساواشاق

آت گؤلوندن سس آتیب ، بابکین حالین سوروشاق

یئنه طوفاندا جوشاق

دریالار تک قوووشاق

آغ آتیم ، قول قاناتیم

شیهه چک قوی سسیوه

هاجرینی ترکینه چکسین نبی گلسین

قوی کور اوغلو آتینی داغلارا سالسین

ائشیدیب شیهه نی گلسین

الده کسگین قیلیجیلا

بویاسین قانه کئچل حمزه نی گلسین

قوی کرم سازینی سالسین دؤشونه ، چؤللره دؤشسون

های سسی ائللره دؤشسون

دئگیلن غملی کرم ایستر اگر ، اصلینی گلسین

دشمنین بلکه کسک نسلینی ، گلسین

قوی بو داغلاردا بؤیوک هلهله دؤشسون

داغلارا ولوله دؤشسون !

آغ آتیم ، قول قاناتیم

منه بیر قالغی بابامدان ، بو ورندیلدی ، بونو چئگنیمه ساللام

قاراداغ باشینی آللام

اورا بیر ولوله ساللام

آغ آتیم دورما ، یوبانسان ، دالی قاللام

آغ آتیم ، قول قاناتیم

بیز اگر قلعه ی سیمرغدان آشساق بیزه آزدی

باخما یوللار ناتارازدی

باخما بو قارلی دماوند ، بو قفقاز بو هرازدی

باخما داغدا هاوا دوتقوندو – آیازدی 

باخما بو قیشدی بو یازدی

آغ آتیم آت قدمین دریا ، دایازدی 

دریانی گئچسن اگر شهرِ نیازدی

اوردا هر قان کی تؤکولدو یئره ، آزادلیقی یازدی

بشر آزادلیغا بازدی !

آغ آتیم ، قول قاناتیم

اوردا دؤلبرچین اوتو دؤرت پَر آچیبدی

اوردا دیللنمگه دیل تازه شیرین دیللر آچیبدی

اوردا باغلاردا بوتون گؤل لر آچیبدی

آغ آتیم

آت قدم آیدینلیغا ساری !

شاعیر:اوستاد هوشنگ جعفری

************************************

شهریار گئدنده

باخدیم دالیسیجا یار گئدنده ،

بیر یولدا دئدیم باخار گئدنده ،

باخدی قاپیدان کئچنده گولدو ،

بیلمیردی اورک اومار گئدنده ،

باغلاندی دیلیم اورکدن آمما ،

آز قالدی چئکم ( چَکم ین زنجان شیوه سی ) هاوار گئدنده ،

گئتمه گئدیسن ؟ یاواش – یاواش گئت ،

جانیم بیلی سن چیخار گئدنده ،

دؤندر گؤزونو خومار – خومار باخ ،

قویما منی ده ، خومار گئدنده ،

سن سیزلیگه دوزمگیم چتیندی ،

گل جانیمی آل قوتار گئدنده ،

سندن سورا عشقی نئیلیرم من ،

آل عشقینی ده آپار گئدنده ،

مئهر ایله نوازش ائیله بلکه ،

گول بیتسین اورک ده قار گئدنده ،

من گؤر نه دئییردیم اؤز اؤزوملن ،

قول بوینوما بیر سالار گئدنده ،

بیچاره اورک بولود کیمین دیر ،

گؤردوکجه سنی دولار گئدنده ،

دای « جعفری » بسدی خلعت ،

سؤز اوستادی شهریار گئدنده ،

ایراندا هونر دیلنچی لیک دیر ،

باخما کی تاپار ویقار گئدنده ،

شاعیر:اوستاد هوشنگ جعفری

************************************

 

 

گیژمجلیس

 

بو شهریده اله کی رای وئرمک عادتدی

دئیل له "مجلسه گیج یوللاماق سیاستدی"

باخالا قاش گوزه اول دئیلله "احسنتم"

بو قاش ، بو گوز ، بوجمال مجلسه کفایتدی

اداره دن گلیرم باش منیم ، باش " عشقعلی" نین

دوتوب بیر الده سجیلین بیر الده پاکتدی

دئدیم : "هاراعجله ینن ، گئدیرسن هی قاچیسان؟ "

یاواش یئری عجله مومنه ، کراهتدی

دئدی:"یوخوندو خبر یوخسا سنده دورمازدین"

دئدیم: "مگر نه خبردی ، دئدی قیامتدی !"

دئدی: " منیم خانیمیم روضه خواندی بی سیمده"

ایشی نامازدی ، اوروج ، روضه دی عبادتدی

بیر هیاته گئدیر اخشاملار هر دوشنبه گونو

او هیاتین رئیسی معدن سخاوتدی

گلیب چادر داغیدیر بول هابولدی غارتدی

دئدیم : ائوی داغیلان خالقی ساتمایین چادرا

الان وکیل اولانین پایه سی درایتدی

دئدی: درایتی من نیلیرم کیشی سنه باخ

بویوک قیزین باش اچیق قالماسی قباحتدی!

خلاصه بیر قاچا قاچ دوشدو من قایتدیم تئز

دئدیم او مجلسه من گئتمه گیم حماقتدی

یازیبلا : بیر "علی سرتیپ" واریدی زنگاندا

دئیلله : بو کیشی چوخ صاحب کرامت دی

یازار کی : بیر گئجه " گوی گوز مهیدی " "اکبر " یدی

واریدی چوخ رفقالر کی با فراستدی

حضوریمیز واریدی دوی "ولی" حضورینده

اولار کی هر بیری بیر  معدن متانتدی

بویوردو: دای بو شهر بیرده اصفهان اولماز

بو جمله دوی ولیدن مستند روایتدی

یازبلا اجلیقا طاقتلی دیر بو زنگانلی

پولون نه ارزشی وار اصل کار شرافتدی!

باخاندا هر کیمه فکر ائیلرن کی مرتاضدی

کی یعنی اجلیق اوزو منشا ریاضتدی

تمام شهر لری انقلاب ائدب اباد

بیزیم شهرده ولی فقردی فلاکتدی

بیری اولنده دئیللر حکیم مولانا

بو ایشلری نه بیلیم جهلدی ، جهالتدی

بیرعده زنگانین اهلی شعوره وئرمز رای

بو بیل مه مه زلیک اوزو بدتر از جنایتدی

گرگ قاشین ائده سن تاتو تا گلن قاباقا

مدرس اولسان اگر گلمه گین جسارتدی

وکیل لیگه نه فیزیک درد ائدر نه طب نه جمال

عدالت ایسته مگین پایه سی جسارتدی

سورا سواد و تخصصدی ، اصل معنا سی

صداقت و عمل  و عشقیدی ، لیاقتدی

بیرعده ده که جمالی پرستش ائیله لر

اوزه ، گوزه بولارین عشقی بی نهایتدی

پولون چوخ اولسا وکیل اولماقین نه منتی وار

دایانما مجلسه بو صندلین امانتدی

قدیم دئیر دیلر :ائل دردینه ، دویان تز اولر

بو شعره شاعری اولدورمه سز سلامتدی

شاعیر:اوستاد هوشنگ جعفری

************************************

 

کئفلی ، کئفلی ،

گونشدیر الده جامیم کئفلی ، کئفلی ،

اؤزوم کئفلی ، مرامیم کئفلی ، کئفلی ،

ییخیلمام ساقی تئز – تئز تؤک چاخیر دان ،

هله واردیر داوامیم کئفلی ، کئفلی ،

همیشه کئفلییم کئفسیزلر ایچره ،

کئچیر هر صوبح و شامیم کئفلی ، کئفلی ،

اورک وولکان کیمی اود توتدو یاندی ،

آلیشدی پیشدی خامیم کئفلی ، کئفلی ،

ایچیم یاندی آلیشدیم دفتر اوسته ،

آلوولاندی کلامیم کئفلی ، کئفلی ،

سن هر سمته دئسن من سجده قیللام ،

منیم سن سن ایمامیم کئفلی ، کئفلی ،

اگر سندن سووای بیر اؤزگه سیندن ،

خوشوم گلسه حرامیم کئفلی ، کئفلی ،

گولوم هر یئرده سن واردیر اوزاقدان ،

سنه چوخ – چوخ سلامیم کئفلی ، کئفلی ،

بوتون دونیاده عشق اولسون محبت ،

بودور آخیر پیامیم کئفلی ، کئفلی ،

شاعیر:اوستاد هوشنگ جعفری

************************************

 

 

 

 

 

گئجه لر

 

 دوت  الیمدن  بو  هامان   الدی   فراقینده    سنون

 یادیمه  سالماق  هامان  باشه  چالاردیم گئجه لر

حسن رخساری رویاده  چکردیم قه له مه

 قلبیمی قاب ائلیوب   قابه سالاردیم گئجه لر

بونا خاطر کی  آدین دوشمیه اغیار الینه

  دوزکیمی آدیوی یازدیقجا  یالاردیم گئجه لر

بئله  سیزلاردی  اوره ک  یادینا  سالدیقجا   سنی

 قوش  کیمی یئرده دوشه ردیم چاپالاردیم گئجه لر

بلکه سن ساغ یاشییب ساغ دولانیب ساغ گزه سن 

 گوزه لیم  هر قادان  اولسایدی  آلاردیم گئجه لر

سن  رقیبیمله گونوز سیره چیخاردین چمنه 

 منده   عشقینده  سولاردیم   سارالاردیم گئجه لر

گوزلرین  یادیمه دوشدوکجه  اسه ردی  بدنیم 

 سینه مه دیرناق آتاردیم پارالاردیم گئجه لر

تابلو  اوستونده  چکردیم سنی مین زحمتیلن 

بیر باخیب اوستونه تئز رنگی جالاردیم گئجه لر

ایندی ده گئتمه لیسن  گئت  دئموروم من ده  گلیم 

 قاللام اول حالدا کی اولده  قالاردیم گئجه لر

مکتب عشقیده مجنونئله  من  باهم ایدیم

 غم ییغاردیم سینمه غصه قالاردیم گئجه لر

مجنون  ئوز عشقینی لیلایه گوره بیلدیردی 

 من  گونوز  یازدیقیم عشقی قارالاردیم گئجه لر 

شاعیر:اوستاد هوشنگ جعفری

************************************

 

 

 گونش

 

گوزومه سحرده چالان گونش

 گوزلیم قارادی سن اولماسان

 

بئله باخما ظاهیر اوزوم گولش

 اوره گیم یارادی سن اولماسان

  

 

قیناما منی او خومار گوزه

 من ازل باخاندا وروولموشام

 

اوز اوزومله سویله یرم هر گئجه

 بوعمور فنادی سن اولماسان

  

 

گئجه لر آغیردی یاتانمیرم

سنی خاطیریمدن آتانمیرم

 

بیلمیرم بو عشقیمین آخیری

 باشیما بلادی سن اولماسان

  

 

گئدیرم دایان دانیشیم گئدیم

 یانیرام دانیش آلیشیم گئدیم

 

هانی کاروان قاریشیم گئدیم

 بورا غم سرادی سن اولما سان

  

 

گئجه اود توتور آلیشیر اوره ک

 دایاناندا من دانیشیر اوره ک

 

چاپالیر اسیر چالیشیر اوره ک

 ایشیم آه و وای دی سن اولماسان

  

 

وورولوب اودم اوره گیم سنه

یاشایش جهنم اولوب منه

 

منی گر بهشته ده سالسالار

یئنه یوخدو دادی سن اولما سان

 

دئمه آشنالر آتیب منی

 یادا ایشگیمنده ساتیب منی

 

منه کیم وفا گر ائیله ییر

ائله بیل جفادی سن 

سهندیم تک باشی طوفانلی بابک – هوشنگ جعفری

گوروم ظولمون ائوی کوکدن تالانسین

توکولسون لش لش اوستوندن قالانسین

کوکوندن از قالیر داغ ییر غالانسین

نه جینگیلتی سالیبسان شانلی بابک

“سهند”یم تک باشی طوفانلی بابک

سنی ازاده لر دیلدن سئوه ردی

بوتون بابک دئییب دوشمان دویردی

قولوندان اللی میلیون قول گویردی

گوزون اچ اوز- گوزو ال قانلی بابک

“سهند” یم تک باشی طوفانی بابک

“دده قور قود” دئیه ر سازلار تئلینده

“کور اوغلو”سسله نر چنلی بئلینده

گلر بیر گون دیله تورکلر دیلینده

دئیه ر هر یئرده هر ایرانلی بابک

“سهند “یم تک باشی طوفانلی بابک

سنین عشقینده بایراق لار اسیللر

یتیبلر اوز کوکونده بو نسیل لر

الاندا “معتصم “لر قول کسیللر

سهندیم تک باشی طوفانلی بابک

نه جینگیلتی سالیبسان شانلی بابک

حورمتلی اوخویانلار من قوزئی آذربایجانا چوخ باغلی بیریسی اولموشام.بیر زامانلار بو ذهنیتی

 

یاشامیشدیم کی گونی آذربایجاندا و من یاشادیغیم دورده شاعیر یوخدور.بئله فیکیرلشیردیم کی،اولسادا

 

آنجاخ قوزئی آذربایجان شاعیرلری کیمی یازانمازلار.او سببدن قوزئیه چوخ باغلی قالمیشدیم.گونی ده

 

اوستادلاریمی چوخ گئج تانیمیشام آما یاخشی کی تانیدیم.بو بویوک استادلاردان بیریسی استاد

 

هوشنگ جعفری جنابلاری اولدولار.استادین اوشاقلیق ،یارین بویون قوجاقلادیم،آغ آتیم ،کرملر ،منیم

 

دردیم ائل دردی دیر اثر لرین اوخویاندان سونرا ،اینانین کی من اوزومه تاسف ائلدیم.اوشاقلیق شعرینی

 

اوخویاندا بیر نچه شعرلر منیم ذهنیمدن کئچدی.البته کی شعر ،شعری گتیرر و گتیرمه لیدی.اوندا من

 

دوشوندوم کی نه قده ر سهو ائله میشم.من اوره ندیم کی اوراغا گئتسم یاخینی اونوتاجام.اوشاقلیق

 

شعرین بیر حیصه سی بئله دیر:

 

ننم دیر سسله نیر آی اوت آپارمیش

 

داشدان ان،دوشرسن کوره گی یانمیش

 

دئیه سن جین دی بو عومرو تالانمیش

 

آنامین سسینده صداسیندایام

 

ذهنیمدن کئچن شجاعین بو شعری  اولدو:

 

آی وورولموش او دره دن بئله چیخ

 

نه گزیرسن آیاخ یالین باش آچیخ

 

آنام منی چاغیردیغی آلاچیخ

 

شیلله لین ال یادیما دوشوبدو

 

ایندیسه اوستاددان بیر ده یرلی شعر:

 

 

 

آدیم دائم قالار افسانه لرده

 

 

 

ایچه یدیم بیر شراب ناب عشقی

 

گوزون تک کاسه ی پیمانه لرده

 

منه زیبا پرست لیک  عادت اولدو

 

گوزوم قالدی رخ جانانه لرده

 

هوشوم باشدان چیخیر قالمیر قراریم

 

قارا زولفون گورنده شانه لرده

 

اگر مجنون عشق اولسان منیم تک

 

بیله ردین وار نه حال دیوانه لرده

 

من اوندان مست عشقم گل دانیشدیر

 

سوراغیم دوتگیلان میخانه لرده

 

عزیزلیکده منی کاش گوره یدین

 

الان بیر بایقوشام ویرانه لرده

 

خرابه گوشه سینده وار بیر عالم

 

کی یوخدور مجلیس شاهانه لرده

 

منیم سن منبع الهامیم اولسان

 

آدیم دائم قالار افسانه لرده

 

اوخوردو "جعفری"شعر آغلاشیردی

 

نه بیر ایشگین لری بیگانه لرده.

هوشنگ جعفری/یار گئدنده

باخدیم دالیسیجا یار گئدنده

بیر یولدا دئدیم باخار گئدنده

باخدی قاپیدان گئچنده گولدو

بیلمیردی اوره‌ک‌ اومار گئدنده

باغلاندی دیلیم اوره‌کدن آمما

آز قالدی چئکم هاوار گئدنده

گئتمه ، گئدیسن ؟ یاواش یاواش گئت

جانیم بیلیسن چیخار گئدنده

دوندر گؤزونو ، خومار خومار باخ

قویما منی ده ، خومار گئدنده

سن سیزلیگه دؤزمه‌گیم چتیندی

گل جانیمی آل قوتار گئدنده

سندن سورا عشقی نئیلیرم من

آل عشقینیده آپار گئدنده

مهر ایله نوازش ائیله بلکه

گول بیتسین اوره‌کده ، قار گئدنده

من گؤر نه دئییردیم اؤز اؤزمولن

قول بوینوما بیر سالار گئدنده

بیچاره اوره‌ک بولود کیمین دیر

گؤردوکجه سنی دولار گئدنده

دای « جعفری » بسدی شعر یازماق

سندنده بیر آد قالار گئدنده

کیم چئگنینه آلدی سالدی خلعت

سؤز اوستادی ، شهریار گئدنده

 

هوشنگ جعفری