کسگین قلمیم  آلدی گوجون  ائل نفسبندن

تا جامعه نین دردلرینه ائیله یه درمان

آی شانلی مقدس آنا  ای کوءهنه دییاریم

هر امرینه آماده یم  ایندی ندی فرمان؟

سنسن وئره ن  عالمده منه شهرت و شوکت

سنسن منه  شعریمده اولان سئوگولو  جانان

آی شانلی وطن  یاخشی بیلیرسن کی یولوندا

چوخ واخت   اوتوراق یئرمنه   اولموش قارا زندان

لاکین منی سارسیتمادی  بو قورخولو حالت

میلچک  قانادی یئتمه دی  ایمانیما نوقصان

دوشمان دیلیمین خورلوغونا  خیلی چالیشدی

آخیرده  اوشوم  مقصدینه تاپمادی امکان

گوندن گونه  اوءتگم  دیلیمین شهرتی آرتدی

گوءستردی کی   دیل محمو اولاماز  محو اولا دوشمان

"بال" اولسادا  بیگانه دیلی منجه زهر دیر

اوءز دوغما دیلیم دیرکی شیریندیر   منه بالدان

بیر بویله حقیقت سسی  یوکسلمه ده  افسوس

هرعصرده  حقسیز لیگه  محکوم  اولوب انسان

چوخ  "حق بشر" دن دئدیلر لفظ ده آمما

معناده ندن چاتمادی اوءز حقینه بیر قان !

آسان اولو موشگول لر اگر اولسا اراده

اولماز  کیشی  عالمده  چتین لیکده هراسان

قطعا چاتار  ائولاد وطن حقینه بیر گون

اوگونکی  نه ارباب ستمگر قالا  نــــــه خان

غم چکمه کونول  بیر یئنی دوران اولار اوندا

شادلیقدان اولار  توتقون  اوره ک لر  یئنه خندان

عصرین دیلی  زحمت کشه  اوندا بئله سویلر:

چاپ غضبکارین نعشینه  بو آت   بودا  مئیدان!

چوخلار دیله ییر  وصلت جانانی   ولاکین

جانانی آتار  تهلوکه یه  دوشسه اگر جان

یازدیم بو گوءزل شعری  "نظامی" سایاغیندا

( حسنون گوءزل آیت لری  آی سئوگیلی جانان )

مین فیرتینا  باشیندان آشیب  داغ کیمی دوردو

مین رنگه بو "شــــــــیدا "نی  بویاندیرمادی  دوران!

یحیی شیدا

یحیی شیدا/قورخولو طوفانلار

آختاردیم ، آراشدیم ، بو گؤزل جانلار ایچینده

سئودیم سنی جانیم کیمی، جانانلار ایچینده

پیمان دوز،ایلقاری بوتون ، قلبی صفالی

بخت اولدوزوسان دوغروسو ، نسوانلار ایچینده

کافر دئسه لر آدیما عشقینده، غمیم یوخ

قوی کافر اولوم  ،بعضی مسلمانلار ایچینده

عؤمرو باشا وئردیم بو سایاق، آز منه سؤیله:

اولماز یاشاماق ساده دل انسانلار ایچینده

مردانه دایاننام ، باشیمی اگمه-رم  اؤلسم

انسان دئیلن، بیر سورو، حیوانلار ایچینده

انسانلیغین عالی هدفی، پاک مرامی

محو اولدو ندن ،بیر پارا عنوانلار ایچینده؟

عارفلره، زاهد سؤزو بیر (تنبله) دگمز

تولکو نه ائدر بیر سورو ، اصلانلار ایچینده

چیخدیم فلکین،هریاریشیندان، سیناغیندان

چالدیم ال-آیاق شوقیله آلقانلار ایچینده

طوفان قوشو تک ،حادثه لر قارشینا چیخدیم

گه-ردیم سینه می نعره لی طوفانلار ایچینده

نوش ایسته دیم افسوس کی نیش اولدو نصیبیم

مین درده ایریشدیم یئنه درمانلار ایچینده

بو شهرده افسانه اولوب ،شهرته چاتدیم

سؤیلندی آدیم (بوی)کیمی دستانلار ایچینده

آل ائتدی رقیبیم منه، آلقانه بلشدیم

یاتدیم اصیل اصلان کیمی، زندانلار ایچینده

زنبور ائوی تک ،اولدو اؤرک  جوریله شان-شان

یاتمیش بدنیم ،ائیله کی پیکانلار ایچینده

داغلار کیمی ،چوخ فیرتینالار،آشدی باشیمدان

یاندیم ،کؤله دؤندوم ، ده لی  وولقانلار ایچینده

عصیان یارادان خلقیمین اؤز اوغلو ، منم-من

باش قووزامیشام ، قورخولو طوفانلار ایچینده

دائم اوره ییم  نئی کیمی افغان ائله ییر چون:

خاطر ،جمع اولانماز ،بو پریشانلار ایچینده

فرمان وئریر  عصریم کی ، وطن خصمینی محم ائت

قوی قانلار آخا، بیر بئله فرمانلار ایچینده

یوخسول لار آرا مهروصداقت هله واردیر

بوعالی صفت لر  اؤلوب  اعیانلار ایچینده

اؤز منلیگینی ساتمادی شیدا  اونا احسن

قالدی آدی، دونیا بویو ، اوغلانلار ایچینده

یحیی شیدا/اود پارچاسی

اود پارچاسیام  کئچمه منیم هنده وریمدن

یحیی شیدا/سئوز بوقچاسی

آزادلیقی هریاندا آراشدیم " دیله دیم من

آی آراز، بیر دالغا وور، دریا کیمی طوفان ائله

ظالمین ییخ قصرینی، اؤز باشــــینا ویران ائله

زوره محکوم ائیله‌ییب، ایندی طبــیعت بیزلری

زور دئــــیه‌ن جلّاد ایله، بیزلر آرا دیوان ائله

بیر هجوم ایله داغیت، شیطانلارین کاشانه‌سین

او فســـاد و فتنه قصرین، خاک‌له یکسان ائله

وئرمه امکان بوندان آرتیق هر شرفسیز انـسانا

آز بو یولسوز کسلری، دل مولکونه سلطان ائله

تؤکدو ناحق، سئل کیـمی، بیهوده قارداشلار قانین

کئچمیشی سال خاطره، بیر قانه یوز مین قان ائله

سو ده‌ییل ســـندن آخان، قانه دؤنن گؤز یاشی دیر

بو اَسَف احوالی گؤر، طوفان قوپار، عصیان ائله

بیر ـ بیریندن، سن بو قان قارداشلارین سالدین اوزاق

گل بو سرگردانلارین، هر موشــگولون آسآآآآان ائله

بیر قیلیج تک اورتادان کسدین محبّت رشته‌سین

آز بو مئــــیداندا شرارت مرکبیـــــن جولان ائله

قاضی اول، انصافه گل ، حکم زامان وئر تازه‌‌دن

غصــــــب اولان تورپاقلاری، وابستة‌ ایران ائله

کؤکله‌مه هجران سازین، دل سوزونو آرتیرما چوخ

وصــــلدن سال صـــــحبتی، گل چارة هـــــجران ائله

قارداشی ـ قارداشا چاتدیر، جانی هجراندان قوتار

بو آغیر بیر خسته‌لیک‌دیر، خسته‌یه درمان ائله

نه «‌شمالی »‌ نه « جنوبی»؟ آت بو چیرکین سؤزلری

مولک ایراندیر تماماً، دونیایا اعلان ائله

لعنت او شاهه کی، وئردی باده ملک ایرانی

یاده سالدیقجا او شاهی، لعن ائله، افغان ائله

فتحعلی شاه ائیله‌دی، فاحش خیانت ایرانا

سنده خدمت گؤستریب، نقصانلاری جبران ائله

تورکمن چای پیمانی، بیر ننگ دیر تاریخده

عُرضه‌سیز شاهین ایشین دونیالره اعلان ائله

کئچدی اون یئددی شَهَر روسیّه‌نین چنگالینا

بو جنایاتی گتیر یاده، بوگون عنوان ائله

گولستان پیمانی‌دا سیندیردی ایرانین بئلین

بو ایشه باعث‌لره، یارب اؤزون دیوان ائله

گل گتیر بو ملّته آزاده‌لیک فرمانینی

ملک ایرانی صفاده روضة رضوان ائله

تهمت و تحقیر اوخو، هر سمتیدن یاغماقدادیر

سینه‌وی بیر داغ کیمی، بو اوخلارا قالخان ائله

یا اؤزون چک بیر کناره، غصب اولان مرزی گؤتور

یا ایکی روحو سازاشدیر، دل‌لری شادان ائله

‌شــــــــــــــــیدا  نین دائیم فراق یاردن آغلار گؤزو

گؤستر او شوخون جمالین، گول کیمی خندان ائله

یحیی شیدا/ساری کوینک ...

ای خسته قوش آواره گزیرسن بو دیاری

زنداندی قفسدی چمنی،باغی،باهاری

گوزله اوزووی اوچی دی هریانی بو یوردون

قوزغون کیمی دورت گوزلو گزیر کورپه شکاری

فرصت دالی سینجا گزیر ال یئری تاپسا

ویران قویاجاق یوردونی ای کوینکی ساری

تیک اوز یووانی قویما سنه ال تاپا اوچی

سن بو یووانئن صاحیبی سن،قان یئنه باری

جهد ائیله کی،جان قورتاراسان اوچی الیندن

دوشسن تورا،فریاد ائلمه،چک بو فشاری

گولشنده کی یوخ ذوق وصفا ای ساری کوینک

قاچ قاچ بو یئرین زهرلی دیر دارو نداری

دیللنسن اگر،اوچی ائده ر قانئنا غلتان

اوچسان آ یازئق!تیر جفا قلبینی یاری

مین فئرتانا قالخئب،دوگه جک،باشئنا طوفان

هر کیمده اولا،داغ کیمی دونیادا ووقاری

گلسه نه قده ر دردو بلا ،داغ کیمی دور باخ

ایدین دی بو سوز"توستو گئده ر گوچکه ساری"

ایستر سنی صیاد اوزونه رام ائده امما

اویغودا گوره ر،اج تویوق البتده کی داری

بو یاخشی مثل دیر کی بیزیم ائلده دئمیشلر:

بیر باخ اشاغا ،باخما اوزونده ن ده یوخاری

غم غصه کیچیک قلبینی گر دوگسه سئخئلما

بو گونده کئچر،اخیری،غملرده قوتاری

اوندا کی چئخارگون،یاییلار عالمه بیرده ن

اوندا کی قارادان یئری ،صبح اولجاق اغاری

داغی-داشی اسوده خیالیله گزه رسن

گولشنده نه شاختا گوره سن،داغدا نه قاری

ظولمون ائوی ویران اولو ،ظالیم دوشه ر الدن

قان دورماز اگر کسسه پئچاق قئرسا داماری

بختین قاپوسی ایندی قئفئلانسا دارئخما!

هر بیر قئفئلئن واردی طبیعتده اچاری

اوز جانوویلن اویناما بو عرصه ده "شیدا"

لیلاج دغلبازیله قئزدئر ما قوماری

یحیی شیدا

یحیی شیدا/ دایاغیم ائلیم دیر

گلمز یئره آرخام  کی ائلیمدن دایاغیم وار

داغ تک دورارام  هرنه آغیر دل ده  داغیم وار

داغلاردان ئوز ایلهامیمی آللام یاشادیقجا

بیر کوهنه چینارم کی  اوزون قول-بوداغیم وار

تاریخ بویو  ائللرده آدیم سسله نه جکدیر

تا شانلی ائلیم   نازلی دیلیم   شن تیفاغیم وار

هر بیراثریم  هردیله ییم  فیکروخیالیم

ائل دن دئیه جک تاکی دیلیم وار  دوداغیم وار

یول آزمامیشام  آزمارام عالمده بیلیرسن

اوءتگم آنا بیر دیل کیمی نورلو مایاغیم وار

ائل قایغی سینی من چکرم جانیما منت

چون دویغولو  هرسینه ده  سوءنمز اوجاغیم وار

ائلدن گوج آلیب  سئللره فرمان سوره رم من

سئللر-سولار آتلانسادا  ائل تک دایاغیم وار

یاخشی تانیرام ساغ-سولومو  ائللر ایچینده

مکتبده توتاق کیم   نه سولوم وار نه ساغیم وار

فرعون زمانی چکه رم  نیل هلاکه

موسی کیم  دوشمان قوغان  الده چوماغیم وار

یوردوم چمنین پاک ائده رم  هرزه علف دن

الده قلم تک  ایتی-کسگین اوراغیم وار

سئیرانه چیخاندا   بو یانار سینه مه بیر باخ

باشدان باشا گوءر: لاله لی سونبوللو باغیم وار

فیکر ائیله مه بابک لر اوءلوب  بیرده دیریلمز

مین لرجه بوگون  اوءلکه ده  بابک  سوراغیم وار

آز سوءیله : حقیقت اولانی قانما ! دوشونمه !

داری دوءشورن  حقی  سئچن بیر قولاغیم وار

شیدا  منی مین رنگه بویاندیر مادی دوءران

هر دوءرده ده اولسامدا  همان بیر بویاغیم وار

استاد یحیی شیدا

یحیی شیدا/آلاگؤزلرین

عاشقه آل ائیلیر ، هر باخیشیندا

عشولی ، غمزه لی ، آلا گؤزلرین

او سوزگون باخیشدا، بیلمیرم نه وار؟

گتیریر حالسیزی ، حالا گؤزلرین

روحومو او آجی باخیشلار سیخیب

خومار نرگیزلرین  اره نلر   ییخیب

قورخورام بوسقودان قارتال تک چیخیب

گؤیرچین  قلبیمی، چالا گؤزلرین

آجی باخماغیندا ، شیریندیر منه

سنسن یاراشیقلی ، ائله ، وطنه

حسرتله گؤز آلتی ، باخاندا سنه

هاندادیر ، جانیمی آلا گؤزلرین

سنسیز اؤره ک  نئجه دؤزر ، دایانار؟

اود توتار  وجودوم شام تکین یانار

نفسیم کسیلر ، قلبیم دایانار

اگر منی گؤزدن سالا  گؤزلرین

شیدانی بیر عؤمور ، ائیله دین ناکام

اولمادی اؤره یی   بیر لحظه آرام

ایسته رم  خدادان  هر سحر-آخشام

منیم تک حسرتده ، قالا گؤزلرین

استاد یحیی شیدا