صمدوورغون/نصیبیم آه وزار اولسون...
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
عاشق باغرینا باس صدفلی سازی
مین جوابلی بیر سئوالدان دانیشاق
میدان قوراق، صحبت آچاق، ساز توتاق،
گل یاناقلی، قوشاخالدان دانیشاق
قوی سوز آلیم بیر گناهسیز دوداقدان
دشمن باخیب حسد چکسین اوزاقدان
یار بزه نیب چخان زمان اوطاقدان
یاشینداکی گللی شالدان دانیشاق
وورغون دئیه ر، بیر دردبیلن یار اولسون
زلفی بولوت، آغ سینه سی قار اولسون
یاخشی گونده، یامان گونده وار اولسون
قدر بیلن احل حالدان دانیشاق
صمدوورغون
چوخ کئچمیشه م بو داغلاردان
دورنا گوزلی بولاقلاردان
ائشیتمیشه م اوزاقلاردان
ساکت آخان آرازلاری
سینامیشام دوستی یاری
ائل بیلیر کی سن منیم سن
یوردوم یووام مسکنیم سن
... دئمه ک دوغما وطنیم سن
آیریلارمی کونول جاندان
آذربایجان، آذربایجان
من بیر اوشاق، سن بیر آنا
اودور کی باغلی یام سانا
هانکی سمته، هانکی یانا
هی اوچسامدا یووام سن سن
ائلیم، گونوم، اوبام سن سن
فقط سندن گن دوشنده
آیریلیق مندن دوشنده
ساچلاریما دن دوشنده
بوغاز آیلار، ایللر منی
قیناماسین ائللر منی
داغلارینین باشی قاردیر
آغ اورپه گین بولوتلاردیر
بویوک بیر کئچمیشین واردیر
بیلینمه ییر یاشین سنین
نه لر چکمیش باشین سنین
دوشدون اوغورسوز دیللره
نحس آیلارا، نحس ایللره
نسللردن نسللره
کئچن بیر شهرتین واردیر
اوغلون قیزین بختیاردیر
هی باخیرام بو دوزلره
آلا گوزلی گوندوزلره
قارا خاللی آغ اوزلره
کونول ایستر شعر یازا
گنجله شیرم یازا یازا
بیر طرفین بحر خزر
یاشیل باش سونالار گزر
خیالیم دولانار، گزر
گاه موغانی، گاه ایلداری
منزل اوزاق، عمریم یاری
سیرا داغلار گن دره لر
اوره ک آچان منظره لر
جیران قاچار، جویور مه لر
نه چوخدور اویلاغین سنین
آرانین، یایلاغین سنین
کئچ بو داغدان بو آراندان
آستارادان لنکراندان
آفریقادان هندوستاندان
قوناق گلیر بیزه قوشلار
ظلم الیندن قورتولموشلار
بو یئرلرده لیمون ساری
اگیر، سالیر بو داقلاری
داغلارینتین دوم آغ قاری
یارانمیشدیر قارلی قیشدان
بیر سنگردیر یارانیشدان
لنکرانین گولی رنگ رنگ
یوردوموزون قیزلاری تک
دمله چایی، توک وئر گورک
آنامین دلبر گلینی
یادلارا آچما الینی
ساری سنبل بیزیم چورک
پامبیغیمیز چیچک- چیچک
هر اوزومدن بیر شیره چک
سحر- سحر آج قارینا
قوت اولسون قوللارینا
مین قازاخدا کوهلن آتا
یالمانینا یاتا- یاتا
آت قان تره باتا- باتا
گوی یایلاقلار بئلینه قالخ
کپه ز داغدان گوی گوله باخ
ای آزاد گون، آزاد انسان
دویونجا ایچ بو بهاردان
بیزیم خاللی خالچالاردان
سر چنار کولگه سینه
آلقیش گونش اولکه سینه
کونلوم گئچیر قارا باغدان
گاه بو داغدان گاه او داغدان
أخشام اوستی قوی اوزاقدان
هاوالانسین خانین سسی
قاراباغین شکسته سی
گوزل وطن معنان درین
بئشیگیسن گوزللرین
عاشق دییه ر، سرین- سرین
سن گونشین قوجاغیسان
شعر، صنعت اوجاقیسان
اولمز کونول ، اولمز اثر
نظامی لر، فضولی لر
الین قلم، سینه ن دفتر
دئه، گلسین هرنه یین واردیر
دئییلن سوز یادگاردیر
بیر دون بیزیم باکی یه باخ
ساحیللری چیراغ- چیراغ
بوروقلارین هایقیراراق
نعره چالیر بوز چوللره
ایشیقلانیر هر داغ دره
نازلادیقجا سرین کولک
ساخللره سینه گرک
بیزیم باکی، بیزیم اوره ک
ایشیقدادیر قوت سوزی
سحرلرین اولکر گوزی
گوزل وطن او گون کی سن
آل بایراقلی بیر سحردن
الهام آلدین، یاراندیم من
گولور توپراغ، گولور انسان
قوجا شرقین قاپو سو سان
نغمه لریم سرین – سرین
عاشقی یم بو گونلرین
آتامیز شانلی رهبرین
گنجلیگی سویله نیر بوردا
حیات وئرمیش بیزیم یوردا
دینله منی، گوزل وطن
بیر سوز گلیر اورگیمدن
خلقیمیزین عشقیله سن
گوله جکسن هر بیر زمان
آذربایجان، آذربایجان
صمد وورغون
یئنه قیلینجی چکدی اوستومه،
قوربانی اولدوغوم او آلا گؤزلر
یئنه جلاد اولوب دوردی قصدیمه،
قلم قاش آلتیندا پیالا گؤزلر
باشیمدان گئتمیشدی سئودانین غمی،
خیالیم گزیردی بوتون عالمی
بو دوستاق کؤنلومی، دئیین، ینه‌می
چکدینیز سورغویا، سئوالا، گؤزلر؟
سودا یولچوسویام ازل یاشیمدان،
کؤنلوم آیری گزیر جان سیرداشیمدان؛
داغی‌دیر هوشومی آلیر باشیمدان
سوزولوب گئدنده خیالا گؤزلر
گرد‌نین مینا‌دیر، بویون تماشا،
آی‌دا حسد چکیر او قلم قاشا
بیر جوت اولدوز کیمی وئریب باش- باشا،
یانیب شعله سالیر جمالا گؤزلر
منیم سئوگیلیم‌دیر او گؤزه‌ل پری،
قوی اوزه وورماسین کئچن گونلری
من قدیر بیلنم ازلدن بری،
سیزینله یئتمیشم کمالا، گؤزلر
جهاندا هر حکمی بیر زامان وئریر،
دونن دوران سورن بوگون جان وئریر
ایللر خسته‌سی‌یم، یارام قان وئریر،
سیز منی سالدینیز بو حالا، گؤزلر
صمدوورغون
آ دوسلار باخینیز ! بیرخسته یم من
آماندیر یئتیرین او یاره منی!
بودردله غفلتا اگر اوءلورسم
سیزآللاه قویمایین مزاره منی
آتین مئییتیمی دوشسون چوءللره
قسمت اولسون نعشیم آخان سئللره
آپارسین قوی منی اوزاق ائللره
تانیتسین هریئرده بیچاره منی
صمدوورغون/محبت بویوکدور ازلدن بری
محبت بویوکدور ازلدن بری
حیات عاشیقی دیر عشقی بیلن لر
آنار حسرت ایله کئچن گونلری
سئویب یاشایانلار سئویب اوءلنلر
محبت دئدیگین طبیعت ده دیر
طبیعت اوءزوده محبت ده دیر.
ای کونول بئشیگی-بوءیوک محبت!
سنین ده قدرینی بیلمه ین لر وار.
وارلیغی داش کیمی کسک کیمی سرت
بیر انسان عشقیله گولمه ین لر وار.
نه چوخدور گوءردوگوم قوجا دونیا
سوءز وئریب سوءز آلیب سوءز اونودانلار.
گوءره سن وجدانی سالیرمی یادا
عشقین معناسی اوجوز توتانلار؟!
وارمی سئومه یه نین بیر استقبالی؟
حیات دا سرسمین اوستونه گولر.
گون کئچر آغارار ساچی-ساققالی
چوءلده قورد-قوش کیمی یوواسیز اوءلر
بویوک یارانمیش دیر ازلدن انسان
محبت آدلانیر شیرین نعمتی.
عشقین میوه سی دیر هریئنی داستان
دویانلار یارادیر شعری صنعتی ....
صمدوورغون
صمدوورغون/هرباغین هرباغچانین...
هرباغین هرباغچانین بیر بولبولو شیداسی وار
هر دویان قلبین عزیزیم گیزلی بیر سئوداسی وار
روحو اوخشار قلبی اوخشار اینجه بیر جانان سسی
گاه گولر گاه آغلایار هردمده بیر معناسی وار
جان آلان هرنغمه نین معناسی یالنیز عشق دیر
گوءز گوءروب ال چاتمایان اولدوزلو بیر دونیاسی وار
دردی-هجران گونلریله عوءمرو اودالاردان کئچر
هرکونول بیر کاروان دیر کی بیر سوسوز صحراسی وار
بویله بیر سوءز وارکی وورغون ایندی بیر مجنون اولوب
شعروصنعت آدلانان نازنده بیر لیلاسی وار
صمدوورغون
چکدیگیم آغریلار بیر یانا دورسون،
اینصافی،موروِّتی سن آتمادینمی؟
من سنه یار دئسم دیلیم قوروسون،
یاری،محبتّی سن ساتمادینمی؟
قیردین قانادیمی،قیردین قؤلومو،
ایتیردیم کعبه می، آزدیم یولومو.
ترلان خیالیمی، لاچین کؤنلومو
آلدادیب-آلدادیب اویناتمادینمی؟
وورغونون آهلاری یوکسه لیر گؤیه،
سورمادین بو سیرری، سورمادین نیه؟
دونیادا بیر شهرت، بیر آلتون دیه
شاهمارین قوینوندا سن یاتمادینمی؟
صمدوورغون
صمدوورغون/نصیبیم آه وزار اولسون...
اگر سندن دؤنر ایسم،نصیبیم آه وزار اولسون!
باهاریم قار تؤکن قیشلار،آچیلماز بیر دیار اولسون!
چمنزاریم،باغیم-باغچام سارالسین،هپسی خار اولسون!
مزاریم اود توتوب یانسین، بوعشقیم آشیکار اولسون!
سوس،ای بولبول،کس ای طوفان،مرامیم استراحت دیر،
بو یئرلرده پاییم یوخموش،علاجیم بیر سیاحت دیر؛
اؤلوم!... ای واه، اونعمت دیر،او بیر شانلی سعادت دیر.
اگر واخت سیز اؤلر ایسم رقیبیم بختیار اولسون!
فلکدن انتقام ایستر،قوپوب روحومدا طوفانلار،
نه انصاف سیز،نه وجدان سیز اولورموش،یارب،انسانلار!
یاز ای وورغون،چاغیر قوپسون بوگون عالمده طوفانلار،
داغیلسین محوری-عالم کؤکوندن تار ومار اولسون!
صمد وورغون
