شعیرلری هاوادان
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
الیم الینده اوشودو
آیریلیق زامانی گلدی
بو دا آللاهین ایشیدی
سن اوزومه باخا – باخا
یازما هر ایشی گوناها
اللریندن اوچدو داها
سئوگی بیر فرصت قوشویدو
..
هوچ بیلدین می نه لر چکدیم؟
سنلی واختدا دا تکیدیم
اول آخیر گئده جکدیم
بو عشق حسرته توش ایدی
..
بیر آد داشییریق ایندی
« یوخ » دئمه دیک کیم نه دئدی
هر کس منه سئوگیلیدی
هر کس ده سنه کیشیدی
..
سؤندوردون قلبیمده اودو
بیر گونلوک سئوگیدیر آدی
بلکی سنه باهار اولدو
آمما منیم چون قیشیدی
..
بوراخ اللریمی داها
الیم الینده اوشودو
طالع بیزی گرروشدوردو
بودا آللاهین ایشیدی
|
سن نییه گؤز آچدین آخی دونیایا دونیانی گؤرموردون تولکو قوخویور؟؟؟ آی منیم کؤرپهجه قوزوجا قیزیم دونیانین اینینی یالان توخویور؟؟؟
آی منیم عیصمتلی،سئویملی نازیم دونیادا گؤرمهیه مهیر نه وارمیش یالاندان،حوقادان،ساواشدان ساوای دونیانین عؤمرونو نهلر سووارمیش
قالمیشام کی سنی گلهجک نئجه نئجه ساخلایاجاق قوینوندا سنی گؤرهسن سنده بیر یازیق فاحشه اولارسان گونونو کئچیرمک اوچون یاداکی آجیندان سوسوب دینمهین بولواردا بلکهده کؤرپولر آلتدا اوزانیب قارنینی اؤیکهلهیرسن بلکهده او گونو هئچ گؤرنمهدین ان یاخشی گلهجک اولار بو منجه نه قورخو نه ده کی آجیندان اؤلمک نه ده کی هؤووشنه... نئجه گلهجک |
یاشاماق
تکجه بیر اؤلمکدیر بلکه
سنین گؤزلریندن
سنین گؤزونده
بلکهده کئچمکدیر سنین گؤزوندن
سندن گؤزهلینین گؤزونه
بلکه...
بلکهده اوزانیب جان وئریب اؤلمک
سنین سؤزلریندن
سنین اؤنونده
آنجاق نه اولسادا
یاشایارام من
بیلمیرم نه دئییم!!!
چوخداندی دویغوسوزلامیشام.ندنیده دونیا مالینداندی!مادیات،معنویاتی آدامدان قاچیریر!بلکه بو دویغو آییلمیا!آمما من داریخمیشام!آرزیلاییرام سونا چاتا بو گونلر!
هله...
چوخدان اولمادیغیما باغیشلایین.ایندی کی گونومه اویغون بیر گؤزل غزل مهران عباسیاندان قوللوغوزا یئتیریرم.
خوش گونلر
کوچه میزده
نیسگیل آغاجی هئی گتیریر بار کوچه میزده
کهلیک یئرینه دالدالانیر سار کوچه میزده
بوردا، بو داراشلیق کوچه ده یوخ یوخوموزدور
عاغلیندان اینان هرنه کئچیر وار کوچه میزده
دؤرد آیدی کی ایسفندی یولا سالمیشیق آمما
بیلمم کی ندندیر اریمیر قار کوچه میزده
قورخوتمورام، آددیم باشی جان قورخوسو واردیر
هر دیقه اؤلوم فیشقا چالیر دار کوچه میزده
گؤردون کی ایشین داردی قیشقیرما یالاندان
هئچ کیم سسینی دویمایاجاق کار کوچه میزده
مهران،بیر آغاج اکمیشیک اینسانلیق آدیندا
بیلمم نییه وئرمیر بو آغاج بار کوچه میزده؟؟؟
میرزعلی معجزدن ایرانین و ایرانلی لارین بو گونونه اویغون ساتریک شعر.اومورام خوشلایاسیز.
سنی تاری بایرام خانیم راضی اولما من اوتانیم
بایرامدا یوخدور تومانیم گئت تبریزه بیزه گلمه
منده یوخ حوصله بایرام الیم بوشدور هله بایرام
شیل اولساندا بئله بایرام گئت تبریزه بیزه گلمه
بایرام اگر گلسن بیزه بیر شال گتیر قارا قیزا
گتیرمه سن گئت تبریزه گلمه بیزه گلمه بیزه
گلسن بیزه آغام جانی باشین یاررام آخار قانی
اوغلانین یوخدور تومانی گئت تبریزه بیزه گلمه
گؤرسن آخیر چارشنبه نی سؤیله اینجیتمه سین منی
پیلوون یوخ یاغی دنی گئت تبریزه بیزه گلمه
ساققیزی سالمیشام انگه اوغلان گتدی منی تنگه
پولوم یوخ وئرم فیشنگه گئت تبریزه بیزه گلمه
بایرام والـله یوخدور ناریم یاری گؤرمه یه آپاریم
تار وئرمه سم کوسر یاریم گئت تبریزه بیزه گلمه
وارلی یئییر یاغلی چیلوو یوخسول چکیر غصه –خینوو
بیزده یوخدور خوروز پیلوو گئت تبریزه بیزه گلمه
یوخسول مین درده توش اولار مئی ایچمه دن سرخوش اولار
تبریز حالواسی خوش اولار گئت تبریزه بیزه گلمه
سنی تانییرام
-سنی تانییرام
کؤرپه ایکن
مه مه دن اؤترو آغلاماغین
درسه گئدنده
قیزلارین ساچینی
بیر-بیرینه باغلاماغین واریدی
-سنی تانییرام
سنده بیر واخت
یوخولاریندا اوچاردین
سنده عسگر گئدنلرین
دالینجا
یولاشانا قاچاردین
بالاجا واختی
کؤرپودن کئچنده
الیندن توتاردیلار
- یادیندا می؟
تئز تئز بوغازین گلردی
آروادلار بارماغینی
دوزا باتیریب
قایتاراردیلار
-سنی تانییرام
سنیده بو دونیا سئوگییله ییخدی
سنینده ایلک سئوگیدن
آغزین یانیبدی
-ایستر کاسیب اول،ایستر وارلی
سنی تانییرام
سنه ده قوروق وار
قاداغا وار
سندنده یوخاریدا
بیر آغا وار
-سنی تانییرام
بورنوندا بنوشه قوخوسو
چیینیده
بیر قفیل
گوللـه قورخوسو وار
