آند اولا وجدانا آند اولا جانا
آند اولا داماردا دولانان قانا
آند اولا شرفله قالان اینسانا
اونوتمارام بیر دم قاراباغیمی

آند اولا ظلمیله چئخان جانلارا
غیرتله یاشایان قوچ اوغلانلارا
تورکوجه قورولان گول عنوانلارا
اونوتمارام بیر دم قاراباغیمی

آند اولا ایگیتین سون نفسینه
عاشقین دیرلی عشق هوسینه
استاد ئولکه سینین «بال بللسینه»
اونوتمارام بیر دم قاراباغیمی

آنداولابولوتدان آخان یاغیشا
عشقیله قورولان گوزل باخیشا
آداخلی توخویان تای سیز ناکیشا
اونوتمارام بیر دم قاراباغیمی

آند اولا بولوتا آند اولا داغا
آند اولا آغاجدا اسن یارپاقا
سئوینجلی باخئشا گولن دوداقا
اونوتمارام بیر دم قاراباغیمی

آند اولا  آل قانا غیرت قورانا
تاریخ بئجردیگی گوجلو تورانا
مکتب اسلاما  قائل اولانا
اونوتمارام بیر دم قاراباغیمی

آند اولا تانریا ، عشقی قورانا
یوخسولا رحم ائدیب ، یالقیز سورانا
طوفان وولقان ، بورلوقانا دومانا
اونوتمارام بیر دم قاراباغیمی

آند اولا بوغازدا ایستی نفسه
آنداولا حریت ، سینان قفسه
قایلانقوش قیناقی ، کعبه طبسه
اونوتمارام بیر دم قاراباغیمی

آند اولا انسانین صداقتینه
آند اولا کیشیلیک شرافتینه
جان جان دیینلرین رفاقتینه
اونوتمارام بیردم قاراباغیمی

آند اولا چورگه آند اولا دوزا
یاشماقین آلتیندا آل یاناق قئزا
قار ایله یاقئشا توتوشان بوزا
اونوتمارام بیردم قاراباغیمی

آند اولا دنیزه آند اولا چایا
آند اولا پاک قالان گوزل سوبایا
قئشا،یازا،پاییزلا آنجاق یایا
اونوتمارام بیردم قاراباغیمی

آند اولا داغلارا ،آند اولا داشا
آند اولا کیرپیگه ،آند اولا قاشا
ائلیم گلشن اولا قوی باشدان باشا
اونوتمارام بیردم قاراباغیمی

آند اولا نجابت آند اولا سویا
آند اولا شنلیگه آند اولا تویا
آذر ائللیگینده ،اوتای بوتایا
اونوتمارام بیردم قاراباغیمی

آند اولا ائلیمه آند اولا گونه
آند اولا او تورک کی یاباندان دونه
ائلیم آیاق توتا آتشیم سونه
اونوتمارام بیردم قاراباغیمی

آند وئریر سیاوش سنی غیرتن
شهامت ، شجاعت ، وارلی عززتن
وطن بایراقئدیر ایگیته کفن
اونوتمارام بیردم قاراباغیمی

آند اولا تپراقا آند اولا یولا
آند اولا او کس کی ، صداقت قورا
ایمانلی انسانکی یولوندا دورا
اونوتمارام بیردم قاراباغیمی

آند اولا ستارین ائل آرخاسینیا
آند اولا نبی نین بوی بوخاسینا
اصلی کی جان وئردی کرم یاسینا
اونوتمارام بیر دم قارا باغیمی

آند اولا چنلی بئل، آند اولا کور ه
آند اولا گوزل کی زلفونی سوره
خوش باخئش انسان کی ائلینی گؤره
اونوتمارام بیردم قارا باغیمی

آند اولا هجره قوچاق نبی یه
آند اولا شادلیق کی ائلی بورو یه
گرک دی ئولکمیز شادلیق کورویه
اونوتمارام بیردم قارا باغیمی

آند اولا کور اوغلی کرم سسینه
آند اولا نگارلا عشق هوسینه
سئویج دیرینه اسن نسیمه
اونوتمارام بیردم قارا باغیمی

آند اولا تبریزه ، تورکی دیلینه
آند اولا ئولکنین قئزیل گولونه
ایگیت کی جان وئرر ئوز دَیرَینه
اونوتمارام بیردم قارا باغیمی

آند اولا قلم کی یازار بیلگیسین
آند اولا تانریدان الهام وئرگیسین
ندندی اونوتماز سئوگی سئوگی سین
اونوتمارام بیردم قارا باغیمی

آند اولا باقرخان ستارخانلارا
آند اولا حق یولدا چئخان جانلارا
دنیانین ایشینه  ایمویانلارا
اونوتمارام بیردم قارا باغیمی

آنداولا باکی یا ، گنجه ،شوشو یا
آند اولا بیر ائل کی یاغی بوشویا
اولماسین اولادین محنت داشیا
اونوتمارام بیردم قارا باغیمی

آند اولا ساوالان سهند داغینا
آند اولا بهشتین جنت باغینا
آنا ئورگینده ایگیت داغینا
اونوتمارام بیردم قارا باغیمی

گئچمیشدن قالانا آتا سوزونه
ائلین وارلیقینا آنا سوتونه
هئچ واخ اویمامیشام نامرد سوزونه
اونوتمارام بیردم قارا باغیمی