کورسو باشی لارینی ایندیده یارادا بیله ریک

بایرام گلیر یاز گلیر، ائلیمیزه نغمه گلیر، ساز گلیر...

کئچمیشلرده، بایرام لاردا، شنلیکلرده و گئجه اوتورمالاریندا، ائل- اوبامیز، بیر یئره ییغیشیب، بیرلیکده، بایاتی لار، ناغیل لار، تاپماجالار ... سؤیله ییب، زامان کئچیرَرمیشلر. قدیم لرده، ایندیکینه تای، رادیو- تلویزیون، بیلگی سایار، اینترنت دن، ... خبر یوخویدو. آخشام اولدوقدا قهوه خانالاردان آشیق لارین سازلارینین سسی، گؤزل داستان لاری ایله بیرگه خاطیره لی چاغلار یاراداردیلار. ائولرده اوشاقلی- بؤیوکلو صمیمیت له، بیر- بیرلری ایله دانیشیب، یاشاییش لاریندان لذت آپاراردیلار.

بؤیوکلر، اوشاقلارا، کئچمیش دن، تاریخ دن سؤیله ییب، عیبرتلی ناغیل لار ایله حیکایه لر دئیردیلر. یاشلی لارین چوخو ایندیده او، یاددان چیخمایان کورسو باشی لارینین خاطیر ه لرینی، ایندینین بوتون ایمکانلاری ایله دگیشمزلر.

کورسو باشی، بیزیم فولکلوروموزدا اؤزونه مخصوص بیر یئری واردیر. بیر یئره ییغیشماقلار، اویونلار، دانیشیق لار و.... هر زامان قالارگی اولوب لار.

ایندیکی چاخیمیزدا، آخشام اولدوقدا، ائولرین چوخوندا، آتا، تلویزیونون خبرلرین ایزله ییر. آنا، ائوینه، اؤزونه نه آلیب، نه قالیری دوشونور. اوشاق ایسه، بیلگی سایاردا اویون اویناییر! نه کئچمیش دن خبر وار، نه تاریخ دن، نه فولکلوردان!

کؤرپه لر، اؤز لای-لای لاریمیزی ائشیتمک یئرینه، چین لی لرین، جور به جور سسلی اویونجاقلاری ایله اویناییب و یاتیرلار!

اوشاق لار اؤز حماسی و آدلیم قهرمان لاریمیزین آدلارین بیلمه دن، اؤزگه لرین کارتون لار ایله فیلم ایله بوی آتیرلار. مدرسه چانتالاری، دفترلری و ... خاریجی کارتون لارین شخصیت لرینین شکیل لری ایله دولوبدور! بیزیم اؤز کولتوروموز یوخدورمو؟ ، سوالی هئچ کیمین دوشونجه سینه گلمیر، ائله بیل؟!

زامانی دالی قایتارا بیلمه سک ده، اؤز کولتور ایله دب لریمیزی ساخلاماغا و گله جک نسیل لره تاپشیرماغی هر زامان ائده بیله ریک. کورسو باشی لارینی، ایندی ده یاراتماق اولار، ائولره شنلیک، صفا و صمیمیتی ایندی ده، قاتا بیله ریک. اؤز کولتوروموزو، دب لریمیزی، عادت- عنعنه لریمیزی ایندیده یاشادا بیله ریک.

بو گؤزل گونلرده، بیرده قاییدیب اوشاق اولاردیم یئرینه، اوشاق لیغیمیزی ایندی یه گتیرک!