کؤرپه‌لرده یوخو رئژیمی ساغلام اینکیشافین آچاری‌دیر
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
کؤرپه‌لرده یوخو رئژیمی ساغلام اینکیشافین آچاری‌دیر
کؤرپه [نوزاد] بؤیودن عائله‌لرین یاشادیغی ان اهمیت‌لی چتینلیک‌لردن بیری، کؤرپه‌لری‌نین اوزون مدت قایدایا دوشمه‌ین گئجه یوخولاری‌دیر. دیلیمیزه یئرلشن "کؤرپه‌لر کیمی یاتماق" دئییمینه قارشی، کؤرپه‌لرین درین و کسیلمز بیر گئجه یوخوسونا گئتمه‌لری آنا-آتا‌لار اوچون چوخ واخت خیال‌دان او طرفه کئچمیر.
اوشاق ساعت 22.00 'ده ان درین یوخوسوندا اولما‌لی‌دیر!
اوشاق‌لارین یوخویا اولان احتیاج‌لاری و یوخو مدت‌لری بؤیومه دؤورلرینه گؤره دییشر. یئنی دوغولان دؤور، ان چوخ یوخویا احتیاجی اولان دؤوردور. یئنی دوغولان کؤرپه‌نین یوخوسو 18-20 ساعتا قدر چاتا بیلر. بؤیودوکجه قاوراما حیسسی اینکیشاف ائدن اوشاغین، یوخو مدتی ده قیسالاجاقتیر. بؤیومه هورمونو ساعت 22.00 اطرافیندا ان یوکسک سویه‌لره چاتا‌جاق. بو سببله اوشاق هانسی یاشدا اولورسا اولسون، بو ساعت‌لاردا درین یوخودا اولما‌لی‌دیر.
عائله‌لر اوشاق‌لاری‌نین رئژیمینه گؤره حرکت ائتمه‌لی‌دیر
اوشاقدا نیظام‌لی یوخو، نیظام‌لی قیدالانما (تغذیه) ایله بیرباشا علاقه‌لی‌دیر. کؤرپه‌نین و یا کیچیک یاش‌داکی اوشاغین رئژیمه آلیشدیریلما مرحله‌سینده، عائله‌لرین استبدادی و آردیجیل (استوار) داورانما‌لاری (رفتارلاری) بو پروسئسی آسان‌لاش‌دیرا‌جاق. ساغلام بیر اوشاغین آخشام‌لاری ان گئج 20.00 یا 20.30 'دا یاتاقدا اولماسی لازیم‌دیر. اوشاغین یوخوسو گلدیگینده اؤزونون گئدیب یاتاجاغی دوشونجه‌سی دوغرو دئییل. چونکی یوخوسو گلن اوشاق داها دا حرکت‌لنیر، بو شکیلده اؤز یوخوسونو قاچیریر. بو حال اوشاقدا راحاتسیزلیغا سبب اولار. حال بوکی، اوشاق‌لارین معین بیر بسلنمه و یوخو سیستئمینه صاحب اولماسی اونلارا راحت‌لیق گتیرر. بو سببله، عائله‌لرین اؤز خصوصی حیاتلاریندان فداکارلیق‌لار ائدیب، اوشاق اوچون اویغون قیدالانما و یوخو سیستئمینه گؤره حرکت ائتمه‌لری دوغرودور.
اوشاق اؤز-اؤزونه یاتما‌لی‌دیر
اوشاق‌لار یاتارکن دئییل، یاتماق اوزره ایکن یاتاغا یاتیریلما‌لی‌دیر. آنا اوشاغین اؤز-اؤزونه یوخویا گئتمه‌سینه ایجازه وئرمه‌لی‌دیر. ائدیلن بیر چوخ علمی تدقیقات‌لار، "اوشاغا اؤز-اؤزونه یاتماغی اؤیرتمک" لازیم اولدوغونو مدافعه ائدیر. یوخوسو گلن اوشاق، عینیله یئتکین‌لرین اؤزلری اوچون تامین ائتدیک‌لری شرط‌لرین (ایشیغی باغلاماق، یاتاغا یاتماق، یورغانی اؤرتمک) تامین ائدیلمه‌سینه احتیاج دویا بیلر. اگر اوشاق یئل‌لنه‌رک، امزیریله‌رک، امزیکله کاشا وئریله‌رک یاتماغا آلیشدیریلیرسا، گئجه یوخوسو بؤلوندوگونده، یئنی‌دن عینی شرط‌لرین تامین ائدیلمه‌سینی ایسته‌یه‌جک. آنجاق، اؤز حالیندا یاتاغیندا یاتماغا آلیش‌دیریلان اوشاق، گئجه اویاندیغیندا، هر هانسی بیر موداخیله اولما‌دان، اؤز-اؤزونه یئنی‌دن یوخویا گئده بیله‌جک‌دیر. بو سبب‌دن، اگر اوشاغین بیر ساغلام‌لیق موشکولو یوخدورسا، یاتاغینا یاتیریلدیغیندا آغلاسا بئله قوجاغا آلماق و یا ساکیتلشدیریلیب یئنی‌دن یاتماسی اوچون یاتاغا قویماق اولماز.
یوخونو خاطیرلا‌دان داورانیش‌لار هر گئجه تکرارلانما‌لی‌دیر
ایلک آیلاردان اعتباراً، اؤزونه یوخونو خاتیرلادا‌جاق معین داورانیش و اوبیئکت‌لر اوشاق‌لاری یوخویا حاضرلایا‌جاق. ایستی بیر دوش، تومان‌لارین گئییندیریلمه‌سی، یالنیز یاتاقدا دایانان بیر اویونجاغی‌نین قوجاغینا وئریلمه‌سی، ضعیف ایشیقدا عینی لای-لای‌لارین دئییلمه‌سی، هر آخشام بون‌لاردان بیری‌نین تکرارلانماسی، اوشاغین بده‌نینه یوخو ساعتی‌نین گلدیگینی ایضاح ائدیر.
یوخویا 1 ساعت قالمیش قیدالانمانی (تغذیه‌نی) کسمه‌لی
خصوصیله سیییق (فرنی) ایله بس‌لنن کؤرپه‌لرده، تخمینن 10 آیدان سونرا گئجه قیدالانماسی‌نین تطبیق ائدیلمه‌سی مصلحت گؤرولور. آنا سودو یئین کؤرپه‌لر گئجه حدین‌دن آرتیق میقداردا اولماماق شرطی ایله قیدالاندیریلما‌لی‌دیر. چونکی گئجه قیدالانما‌لاری اوشاق‌لاردا تئز اویانما ایله یاناشی اوست تنففوس یول‌لاری و یا اورتا قولاق اینفئکسیا‌لاری کیمی پروبلئم‌لره سبب اولا بیلر. گئجه ساعت‌لاریندا قیدالان‌دیریلان اوشاق‌لارین ناهارلاردا دا ایشتاهی آزالا بیلر. بو سبب‌دن 1 یاشینی کئچن اوشاق‌لاردا، یوخو ساعتینا 1 ساعت قالمیش، قیدالانما دایاندیرما‌لی‌دیر. وئریله‌جک بو سون پای اوچون ایسه تاخیل‌لی سیییق‌لارا اوستونلوک وئرمک اوشاغین گئجه بویو توخ قالماسینی تامین ائده‌جک، هزم سیستئمی‌نین ایشینی آسان‌لاش‌دیرا‌جاق و راحت بیر یوخو اوچون گرک‌لی اولان مادده‌لر موبادیله‌سینه کؤمک ائده‌جک.
اوشاغینیز هر شئیه باخمایا‌راق یاتمیرسا نئینمه‌لی ؟
ساغلام کؤرپه‌لر و اوشاق‌لاردا، یوخو رئژیمینی تامین ائتمک عائله‌نین علینده‌دیر. عائله اوشاغی سیستئم‌لی بیر حیات طرزی ایله تعمین ائدرسه، شعورلو یوخو وردیش‌لری (ایدمان) قازاندیرارسا، ان یاراماز و سؤز دینلمه‌ین اوشاق بئله بیر مدت مقاومت گؤستریب، سونرا بو رئژیمه اؤیرشه‌جک‌دیر. اگر اوشاق هر شئیه باخمایا‌راق یاتمیرسا و شدت‌لی شکیلده آغلاییرسا، بو وضعیت بیر خسته‌لیگین علامتی اولا بیلر. بئله حالدا اوشاغین ساغلام‌لیق موشکولو اولوب اولمادیغین‌دان امین اولماق اوچون متخصص کؤمه‌یینه مراجعت ائتمک مصلحت گؤرولور
