ایشیق
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
ایشیق
گئجه نین باغرینی گونش یاراندا
من یاتدیم,سن یاتدین هامی میز یاتدیق
شافاق آچیلاندا نورون ساچاندا
بوتونلوکله بیز ظولمته باتدیق
*
ایشیق دوغولارکن قارانلیق سوندی
بیز سوسدوق لال اولدوق سوکوتدا یاتدیق
فلک ین چرخی ده ترسه یه دوندی
زامانی عوموری چوخ اوجوز ساتدیق
*
کروانلار گلیبن کئچدی بو یولدان
حسرتله بیز یالنیز ایزلره باخدیق
گاه ساغدان باخارکن گاهداندا سولدان
سانکی گوزوموزه بیر اوخو تاخدیق
*
آند اولا ایشیقا گونشه آیا
دره لر تپه لر مئشه لر باغلار
یام یاشیل نغمه لر یازین فصلینده
ترنوم ائدیری چکیلیر یایا
*
سون باهار گلنده قیشدا بوراندا
سونه جک ایشیقی قوقو چیراغین
قونشولار شنلیکله تونقال قوراندا
سویوق بیرجه دامدا اوجاق قوراغین
مجید جعفر زاده کسیانی ( بی نام )
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
قیمته باخ اوره ییمده!
باخیشلاریم یول اوسته دیر
حسرته باخ اوره ییمده.
آهدی گلیر، آهدی گئدیر
مؤحنته باخ اوره ییمده.
بیر بوداغدان قیریلمیشیق
سنده، منده یورولموشوق
ایکی گؤز تک آیریلمیشیق
قوربته باخ اوره ییمده.
باغلاییب ساچین بیر توکو
باغیریر مئیداندا تکی
آغیردیسا، سئوگی یوکو
قودرته باخ اوره ییمده.
اینجه لیکده بیر دانادیر
شئعره، قوشقویا آنادیر
بیر سئوگی باهاسینادیر
قیمته باخ اوره ییمده!
رضا دهقان(چنگی)
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
سن گلنده!
سن گلنده
دنیزلر داها گئنیش اولور
ساحیل لر
سو آلتیندا قالیر
و بیز بوغولوروق
سنی
گؤرمه دن ...
لیلا کحالی
آراز فکری
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
هاوالانما
ایـــنسان اوغـــلو هاوالانـما هـــاوالاردان ســالان اولــو
قــــاتــیب حیسابین ایتیرمه بیر گون حیساب آلان اولـو
مــعرفـــت یـــارار ایـــنـــسانا شـــجــاعت مـــرد مـییدانا
ظولم ایــلن یـــاپـــیلان بیــنا آخــــیر دوشـــر ویــران اولو
اینـسان اوغلو تـانی ذاتیـن پـــوزولاجــاق یئددی قاتین
اؤلــچوسوز بیچن خیاطیـــن تـــیکــدیگی دون یالان اولو
دده کــاتـیب هانی خانلار؟ دوغــــرو ایـنسان تــانییانلار
پـــول ایــله ایـنسان اولانلار پـــول قورتولسا حیوان اولو
دده کاتیب
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
بیر ده لی سنی سسله ییر!
گئتمه دئدیم!
دئدیم: گئدسن کوچه لرده،
بیر ده لی، سنی سسله یه جک.
گئتدین،آیاقلارینین ایزلریندن،
سارماشیقلار اوجالدی.
سن گئده لی،
باغین یاشیللیغین سئللر آپاردی،
گیلانارلار آغاجلاردا قورودولار.
بیر ساری کؤینک یوواسیز قالدی.
گوزگولر سنی چاغیریر.
دیوارلار شکلینی باغرینا باسیر.
ائو، سنسیزلیگه هله اینانماییر،
کوچه لرده بیر ده لی سنی سسله ییر.
یالنیز سنی!.
تبریز - قارتال
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
ساقی!
منه بیر جرعه مئی وئر غیبدن گل یانیما ساقی!
منیم غملر الیندن اود دوشوبدور جانیما ساقی!
مئی عرفان ایچنلرده کمال و حرمت دین وار
یئتیرمز جرعه ی جامین خلل ایمانیما ساقی!
وطن عشقینده دیر هر لحظه چالیشده جانیم جیسمیم
وطن عشقی نفوذ ائتمیش ایلیگله قانیما ساقی!
وطن عشقینده جاندان گئچمه یه ثابت قدم دائم
سوزومده صادق اوز ایلقاریما ، پیمانیما ساقی!
بزه نمیش عطرلی گوللرله ، شانلی قهرمان یوردوم
ساریلمیش لاله لر ، گوللر بوتون هریانیما ساقی!
من آذربایجان ائولادی ، اصلان نسلی یم ( حئیران )
ائدنمز تولکولر جرئت ، گله میدانیما ساقی!
یدالله موتمنی ( حئیران )
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
ای صنم!
چیرپینیر قلبیم گئــدیر الـــدن قراریم ای صنم!
جرعه بیر مئی وئر ایچیم یـوخ اختیاریم ای صنم!
یوخ صداقت آشنالـرده بـــو گون بــیر وصل اوچون
سن کرم قیل اوزگه دن یــوخ انتظـاریم ای صنم!
عالـم رویــاده سـن بـــیر نـــور ســاچـان آیسان منه
هـر ایکی عالـم ده سنـــسن افتــخاریـم ای صنم!
ســن بــیر الله چکـــمه زونناره بو جانی رحم ائله
قویما سولسون بیرداهـا خـوش روزگاریم ای صنم!
اذن وئـــر شمــــع وجـــودین ده یانـــیم پـروانه تک
معـــرفـت بــاغــین دا سنـــسن گلعذاریم ای صنم!
آچ اوزونــدن نخچــــیری قـوی صید اولان صیادیوه
آشکار اولــــسون ســـیه خالـــین نـگاریم ای صنم!
ئوز یولومدان سن مـنی سالـــما نـــظردن عـــاشیقم
گل نــمازه مـــنله، مسجـــیددی دیـــاریــم ای صنم!
سن طـــواف ائــیـله او جانه کی یارادمیش هرجانی
یــوخ داهـــا اوندان یوخاری جان - وقاریم ای صنم!
قویـــما دوشسون ولوله سن بوشلا ترسا دینینی
آچ شالـین ســال بــوینومـا دونیاده واریم! ای صنم!
بوگوزللیک سنده وارسا ائتمه چوخ سن شئکوه - ناز
چونکی قالــماز هئچ گوزللیک گول - بهاریم ای صنم!
دونیـــا چـــوخــلاریــن آلیب آلداندیریب، آزدیـرما سن!
"طالـــبم"عـومروم چـکیب وار شـهریاریم ای صنم
سید امیر علی امیری (طالب)
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
ایمانه یئتیر!
ای فلک درد و غمیم شرحینی جانانه یئتیر!
ثبت قیل ملک خراجینی او سولطانه یئتیر!
داهی یوخ تاب و توان جسم ضعیفیمده منیم
یا کی آل جانیمی یا دردیمی درمانه یئتیر!
روحپروردی لبی وقت تبسمده صبا
روحی بو تندن آلیب اول لب خندانه یئتیر!
گوردو اول زلفی کونول اولدو پریشان احوال
بو پریشانلیغی اول زلف پریشانه یئتیر!
زلف و رویون ائله دی مذهبیمی سست منیم
یا منی کافیر ائله یا ده کی ایمانه یئتیر!
گئتدی اول یوسف مه روی گوزوم آغلاما آز
خون آب جگرین جهد ائله عمانه یئتیر!
بونجا حئیران حزین سالما آیاقدان ئوزونو
گلشن جاندا بیتن سرو خرامانه یئتیر!
حئیران خانوم
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
سئودا دلیسی
شکرلله! کی کؤنول اولدو تجلی دلیسی،
گئنه اوز قویدو بیابانه بو لیلا دلیسی.
غل و قللاده و زنجیره مگر بند اولور،
بیر کؤنول کی اولا بیر زولف چلیپا دلیسی.
یا مگر نرگس بستانه سالیر طرف نظر،
بیرکؤنول کی اولا بیرگوزلری شهلا دلیسی؟
عشقین آدابینی فرهاد ایله مجنون نه بیلر،
بیریسی داغ آیی دیر بیریسی صحرا دلیسی.
داغ ایله باغ، گؤزوم! عاشیق اوچون یکسان دیر،
هره بیر یانه گئدیر واحد و یکتا دلیسی.
عاقلا گل، واعظ و زاهد سوزونه توتما قولاق،
بیری دونیا دلیسی دیر، بیری عقبا دلیسی.
عاجز آثار ره عشقه قدم باسمادی، حیف!
بوسوزو ضبط خیال ائتدی او سئودا دلیسی.
نصرت علی شاه اردبیلی
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
اوزون آرزی
مندن گیلئیلیک ائیله مه سن، یوخلا بیزلری
انسانلار هرزامان ئوزونه یو لداش ایسته ییر
بیل، ایندی هاممیدان سنی آرتیق سئوه ن منم
آمما گزیب دولانماق اوچون گوزباش ایسته ییر
ائوده پیشه ن غذانی یئسه م سیندیره نمیرم
میللت چلو یئیه ن ده مزاجیم آش ایسته ییر
امکان سیز ایش دیر ایندی دیز اوستی اوتورماقیم
مجلس ده یا دیز اوستی و یا باغداش ایسته ییر
گئن ده ن باخان خیال ائله ییر خالقی سایمیرام
مجلس قوتارسا غیبتیمه یولداش ایسته ییر
بعضی سی بیر بهانه گزیر سوز دولاندیرا
یعنی که گوز چیخارتماقا خاطیر قاش ایسته ییر
فیکریم ده هئی دالی قاییدیر بیلمیره م نییه ؟
مندن .آتا .آنا یلا. باجی. قارداش ایسته ییر
هردم گئدیر قدیم کوچه میزده گیجه لله نیر
موهره دووار سوواق سالینان دام داش ایسته ییر
شکلی عوضله نیب تاپا بیلمیر ئوره ک له نیر
یانسا ئوره ک بو بللی دی گوزدن یاش ایسته ییر
بیرده ن قولاقیمه یئتیشیر بیر سس آی کیشی
باخ بیر اتاق لارین هامیسی نقاش ایسته ییر
آشپاز خانایا من چکیرم ام دی اف حسرتین
هالوژن اندرونی ائشیک لر داش ایسته ییر
بیربیر ساییر- یوخ – هن - دئمه گه وئرمه ییر آمان
آرواددی بو دویونجا دانیشسا باش ایسته ییر
فیکر ائیله دیم بونون جوابین من نه جور وئریم
بو آرزیلار دئدیم کی اوزون ایکــاش ایسته ییر
قورتاردی قافیه ئوره گیمده سوزوم قالیر
بیرشاعیر آختاریر ئوره گیم سیرداش ایسته ییر
شعری یازاندا قافیه نین چوخلوق آزلیقی
اول ده بیر منیم گـــوزه لیم ات داش ایسته ییر
گل (اشرفی) بو بئیتیله قورتار بو شعری سن
چونکی ادامه تاپسا ئوزی کنکاش ایسته ییر
علی اشرفی راد (عین الدین)
