تاپشیریق
اؤکوز، پلنگ دوشدو یولا
دووشان اولدو یولداشیمیز
بالیق، ایلان، آت یولدادیر
قویون اتی بوزباشیمیز

میمون، تویوغو چنگه لر
ایت، دونوزون،ایزین سیلر
سیچان، اؤکوزدن تئز گلر
دونوز اولار سای باشیمیز

تاپشیریرام سؤزومه باخ
بعضی سؤزلری گل بوراق
چیخسا جیزیغیندان آیاق!!
ضررین گؤرر باشیمیز!!!

هورکوتمه­یین دوووشانی
یئ­سه ده چؤلده یووشانی
دوغرو سؤزدو یوخ یالانی
هورکوتسک پیشر آشیمیز

بو ایللرین قدرینی بیل
ساللاق سؤیود کیمی اَییل
هاوا پیسدی دالدان اکیل
آرخا دورماز سیرداشیمیز!!

یئر سورونمز برک اولاندا
پاییز گولر گول سولاندا!
توستو گؤزلره دولاندا
اود توتار یانار قاشیمیز!!

دوشن اوچاق یئری اَزیر
شوکر ائله­ییر گئدن وزیر!!!
بیری اورمو گؤلون گزیر
قورو اولوبدور یاشییمیز

شیمشک ده بیزی یاخانماز!!
چایلار دنیزه آخانماز!!
کیمسه بیزه چپ باخانماز!!
قوجا چین­دیر قارداشیمیز!!!

بایرامیز اولسون موبارک
یازدا بیته­جک­دیر چیچک
آتین (موزالان)ی گئدک!!
اونسوز دا وار دیلداشیمیز!

موزالان
تورک ایللری­نین سیراسی:
سیچان، اؤکوز، پلنگ، دووشان،
بـالیـق، ایـلان، آت، قـویـون،
میمـون، تویـوق، ایت، دونـوز