اوشاقلار اوچون شعر
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
آی قاریشقا نه سن ، سن؟
کیچیک آما گؤجلو سن!
***
گئجه-گونوز ایشله ییب
چوره ک - موره ک ییغان سن
***
بیلیرسن بیر قیش گلر
یاغیش گلر،قار گلر
***
اوندا چوره ک تاپیلماز
ده نی اولان داریخماز
***
زیره کسن ای قاریشقا
گئد ایشله سن داریخما
گؤزه ل بیر اوغلان اوشاغی اولارام
گئجه یاتیب، تئز سحری دورارام
***
سلام وئریب،قارخیب اوزو یویاندا
داراغی تاپیب،ساچیما داراخ وورارام
***
سوفرا هانی؟من یئمه لی ایسته ره م
هالوا، پنیر، من قاتیغی سئوه ره م
***
یومورتا، بال، خاما، کره گتیرین
خوش اوشاغام، بیرده قالین(نانی مخصوص)گتیرین
***
من ییره ره م،گوجلو بیر اوغلان اوشاغی اولارام
دوشمن لری قووالیییب، داغلارا ده ک قووارام
اوشاق چؤلده اوینادی
اویناماقدان دویمادی
***
بیرده‌ن یومورتا تاپتدی
تویوغوندو ، او قاپدی
***
تویوق دئدی آی اوشاق
منیم دی بو ، بوش بوراق
***
بیر گون یومورتا سینار
جوجه‌م تئز اوندان چیخار
***
اوندا جوجه‌مه ده‌ن وئر
اَزمه ، اوْنا آمان وئر
***
بالامی سن قاچیدما
دام - دووارادا چالما
***
آنا تویوق گؤزله‌ییر
بالام یوخدو سؤیله ییر
***
بیز حیوانیق گوناحیق
محبت له قالاریق
شعر : منیم جئیرانیم
گؤزو قارا جئیرانیم
یولون هارا آی جانیم؟
داغی گه زه ن نازییلا
بوینوزو تک تاجییلا
یاواش- یاواش یئریرکن
داغی- داشی سئویرسن
بو داغ سنین مسکنین
هم منیم دی هم سنین
منیم ائویم "سولدوزوم"
گؤیده بیر تک اولدوزوم
سنین ائوین ده ره دی
قاشین- گؤزون قه ره دی
بیز بیر- بیری سئویریک
وطن یاشا دئییریک
تمیزاوُل
مَستان پیشیک داریخیر
یوماسا اَل - اوزونو .
پیشیکدَن بیر ایبرت آل
تمیز ساخلا اؤزونو .
قوشلاردا تمیز لَییر
دیمدیکله قانادینی .
دووشان قاچار ائشیدسه
پینتی لرین آدینی .
داغلاریما چَن دوشدو،
باشیما دا،دَن دوشدو،
تانری منی قوش ائله،
یادیما وطن دوشدو .
***
گول اوستونده یاش اوْلوم
ائللره سیرداش اولوم،
قربتده شاه اولونجا،
وطنیمده داش اولوم .
***
گؤیده بولود سیلینمز
اورکلر وار، بیلینمز،
یاغی دوشمن مین اولسا،
تورپاغیمیز بؤلونمز
***
شئح دوشوبدو چمنه
نرگیسه، یاسمنه
من بالاما قوربانام،
بالام قوربان وطنه .
***
منه وطن قالاندی
سنه وطن قالاندی
بیزگئده‌ریک دونیادان
یئنه،وطن قالاندی
