تورکیه‌نین کولتور خزانه‌سی پروگرامیندا بو هفته سیزلره اؤلکه‌میزین قورور قایناغی اولان توریزم بؤلگه‌لرین‌دن بیری اولان افسی تانیداجاییق.
افس آنتیک شهری اگه بؤلگه‌سینده ایزمیرین گونئیینده مندرس چایی‌نین دنیزه چاتدیغی نؤقطه‌ده یئرلشن آنتیک بیر لیمان شهری. مندرس چایی‌نین گتیردیگی آلوویون‌لارلا(آبرفت) بو گون دنیزدن 30 کیلومتر قدر ایچریده اولان افس، یوزلرجه تاریخی اثرله دونیا توریزمی اوچون بؤیوک اؤنم داشیییر. 1994.جو ایلده یونسکو طرفیندن دونیا گئچیجی مدنی میراث لیسته‌سینه آلیندی. اؤتن ایل ایچینده ده بو لیسته‌یه قالیجی اولا‌راق علاو ائدیلدی. افس آنتیک دؤورون دونیانین 7 معجزه‌سین‌دن بیری اولان آرتمیس تاپیناغینا صاحب. سلسیوس کیتاب‌خاناسی، افس‌لی زنگین‌لرین ویلا‌لاری اولان یاماج ائولری، آگورا و آنتیک تاتر افسین ان گؤزل اثرلرین‌دن بعضی‌لری. افس یاخین‌لاریندا اولان مریم آنانین سون گون‌لرینی گئچیردیگینه اینانیلان ائوی و اصحاب کهف اولا‌راق بیلینن 7 اویورلار ماغاراسی دا بؤلگه‌نین دقت چکن اؤنم‌لی یئرلری.
افس شهری آتن کرا‌لی‌نین اوغلو آندروکلوس طرفیندن قورولدو. اؤز شهرینی قورماق ایسته‌ین ماجراچی شاهزاده گمیلریله آنادولویا گلیر. بیلیجی‌لرین، بیر بالیغین ایشاره ائتدیگی بیر دونوزون یول گؤستردیگی یئرده شهرینی قورابیله‌جگی عاغیلیندادیر. یولداشلارییلا بالیق پیشیررکن بیر بالیق بیردن سیچرایپ یئره دوشر تام او آندا اورتایا چیخان بیر دونوز قاچماغا باشلار. اوخونو آلان شاهزاده دونوزون آرخاسین‌دان گئدر اوخویلا دونوزو ووردوغو آندا بیلیجی‌نین سؤزو آغیلینا گلیر. افس شهرینی دونوزون وورولدوغو محتشم یئرده قورار.
افس شهری آنادولونون ائگه‌نین باتی ساحل‌لرینی احاطه ائدن ایونیانین ان اؤنم‌لی شهرلرین‌دن بیری ایدی. بؤیوک ایسکندر و روما دؤورونده ده اؤنمینی قورودو. شهرین ان اؤنم‌لی اثری شبهه‌سیز آرتمیس تاپیناغییدی. آنتیک دؤورده دونیانین 7 معجزه‌سین‌دن بیری اولا‌راق قبول ائدیلن بو معبد یونان و آنادولو مدنیتی‌نین بیر قاریشیم آلانییدی. فریگلرین آنا تانریچاسی کیبه‌له آرتمیسله بیرلشدی. آنتیک دؤورون تامامیله مرمردن یاپیلان ایلک تاپیناغییدی. آرتمیس معبدی‌نین دؤرد بیر طرفی آنتیک دؤورون ان گؤزل هیکللری ایله و قابارتما‌لارلا بزلی ایدی. معبدین گونوموزده قازی‌لارلا اورتایا چیخاریلان تمل‌لری گزیلیپ گؤروله‌بیلر. بورادا اولان بیر چوخ هیکل و قابارتما اوزون ایللر بورادا قازی‌لار ائدن اینگیلیس آرکئولوگلارین بیر چوخ اثری آپارماسییلا، ایندی لندنده سرگیلنمکده‌دیر. افسین ان مشهور اثرلرین‌دن بیری ده میلاددان سونرا 106.جی ایلده افس والی‌سی اولان و بورادا اؤلن روما‌لی سلسیوسون هم کیتاب‌خانا هم آنید مزار اولا‌راق یاپدیردیغی بینا‌دیر. محتشم منظره‌سیله گؤرن‌لری حیران ائدن بو کیتاب‌خانا دونیانین دؤرد بیر طرفیندن توریست‌لری افسه چکیر.
افس خریستیان‌لیق دؤورونده ده اؤنمینی قورودو. مریم آنانین پترسلا بورایا گلدیگی و بورادا بیر ائوی‌نین اولدوغو دوشونولور. پاپ‌لیق طرفیندن خریستیانلیغین قوتسال یئرلرین‌دن بیری آلا‌راق قبول ائدیلن مریم آنا ائوی هر ایل هم یئرلی هم خاریجی بؤیوک قالابالیق‌لار طرفیندن گزیلیر. خریستیانلیغین روما‌لی‌لار طرفیندن یاساق قبول ائدیلدیگی دؤورده 7 اویورون بورادا یاشادیغی و بورادا اولان بیر ماغارادا یوخویاقالدیق‌لارینا اینانیلیر. تورکیه‌ده 3 آیری یئرده 7 اویورلارا عاید اولدوغونا اینانیلان ماغارا‌لار وار. آفشین، تارسوس و افسده بو 7 اویورون یاشادیغینا اینانیلیر. قرآندا دا بیر سوره ایله حکایه‌لری ایضاح ائدیلن 7 اویورلار تک تانری اینانجیندان دؤنمه‌لری اوچون ائدیلن باسقی‌لاردان قورتولماق آلله اینانج‌لارینی قوروماق اوچون یان‌لارینا آلدیق‌لاری ایتلری ایله ماغارایا قاچار بورادا یورغونلوق‌دان یوخویا قالارلار. اونلاری تعقیب ائدن امپراتورون عسگرلری اونلاری اؤلدورمک اوچون ماغارانین گیریشینی داشلا هؤرر. آلله‌ین بیر معجزه‌سی نتیجه‌سینده یوزلرجه ایل سونرا اویانارلار، ایچلرین‌دن بیری یئمک آلماق اوچون شهره گئدر، گئچن مدتده خریستیان‌لیق رسمی دین اولموش‌دور. حضرت عیسی‌نین آدی‌نین راحاتجا دانیشیلدیغینی گؤروب تعجب‌لانیر. الین‌دکی پول‌لارین چوخ اسکی اولماسین‌دان شبهه‌لنن‌لر اونو اسقفا گؤتورورلر. حکایه‌لرینی دینله‌ین اسقف اولایین بیر معجزه اولدوغونو اعلان ائدیر. خریستیان‌لیقدا داها سونراکی دؤورلرده اؤنمینی ایتیرن بو حادثه ایسلام دونیاسیندا هله اؤنمینی قورویور.
افسین گونوموز ائولرینی بنزر زنگین‌لره عاید تراس‌لار اوزرینه اینشا ائدیلن یاماج ائولری ده قازی‌لارلا اورتایا چیخاریلماغا داوام ائدیر. بو ائولر هارداسا گونوموز راخاتلیغینا صاحب. دووارلار مرمر و فرسکولارلا بزه‌لی یئر موزایک‌لرله اؤرتولو. بوتون ائولرده ایسیتما سیستمی و حامام وار.
بیر بیرین‌دن گؤزل بیر چوخ تاریخی اثره ائو صاحب‌لیگی ائدن افسی گزیب بو گؤزل‌لیک‌لری یئرینده گؤرمه‌نیزی دیله‌ییریک!
