بولود قره‌چورلو سهندین، اوستاد شهریارا منظوم مکتوبونون تورکجه متنی
یازار : " تؤرک دیلینی اؤیره نین، چونکو اونلارین حاکمیتی چوخ اوزون سؤره جکدیر." پیامبر اکرم
+0 چره جلی
بیر الیمده قلم، بیر الده کاغیذ.
خیالیم بویلانیر دامدان، دیواردان.
باشیمدا یار باغین گزمک هاواسی،
قاپیلار باغلیدیر، یول تاپیم هاردان؟
* * *
حصارین دالیندا کؤنول وئردیگیم،
او یار، بیر باغ سالیب سویو ب‍ول‍ولدن.
هئیواسی کهربا، ناری یاقوتدان.
طاغی فیروزه‌دن، دیواری گولدن.
* * *
ماوی ایوانیندا ساز چالیر زؤهره،
بورجوندا یای چکیب، دایانیب کیوان.
لایقی وار گیره‌م قصرینه منده،
قیللی پاپاغیملان، سینیق سازیملان؟
* * *
او، بو احتشاملان، بو طمطراقلان،
قاپی‌‌سین اوزومه آچماسا نه وار؟
شاهلا رعیتین صحبتی توتماز،
من بیر اوبالییام، اودور «شهریار»!
* * *
گره‌گ روخصت آلام «حیدربابا» دان،
«یوخ» جوابی بلکه منه وئرمه‌سین.
بیرده شهریاردان فرمانیم واردیر:
«شاعر بیر- بیرینی اولورگؤرمه‌سین؟»
* * *
آخ منده سهندم، باشیم اوجادیر،
ایچیمده سؤنمه‌ین عشق آتشی وار.
منده صفاسی وار گؤللو باهارین.
باشیمی توتسادا قارا بولوتلار.
* * *
بیر الیمده اود وار، بیر الیمده سو،
بیر اوزوم قاراقیش، بیری باهاردی.
دوستا، ایستکلییه ایستی قوینوم وار،
دوشمنه باخیشیم شاختادی، قاردی.
* * *
لاله‌لی، چیچکلی چمنلریمده،
گلیب یورد سالسادا چوبان- چولوقلار،
یالواررام صفامدان اوز دؤندرمه‌سین،
شهریارا لاییق «شاه یوردو»م‌دا وار.
* * *
کؤنلوم هاواسیلا قول- قاناد آچیر،
«قاف قالاسین» آشماق دئیه- اوجالیر.
قالخدیقجا بوی آتیر، داش دیوارلارا،
آلیجی ترلانیم یورولور قالیر!
* * *
دیوارلار، دیوارلار! پولاد اولسازدا،
آلماس موشار اوللام، کسیب بیچه‌رم،
کولونگون بورج آللام «فرهاد» بابامین،
«بیستون» اولسازدا، چاپیب گئچه‌رم.
* * *
دیوارلار، دیوارلار! یول وئرین گئچیم،
وولقانام، نفسیم توفان قوپارار.
«بولود»ام ساللانسا قاشیم - قاباغیم،
آغلارام عالمی سئللر آپارار. . .
* * *
ایچیمده بوغولور دادیم، فریادیم،
هاییما نه دیوار های وئریر، نه‌یار.
نه‌داشدان سس چیخیر، نه‌ده قارداشدان.
سانکی بوشلوقلاردا ایتیر دالغالار! . .
* * *
بلکه‌ده خیالدیر منی سارسیدان،
یادا کی، سئحردیر یاردان آییران.
دئییرلر:«دلبریم بیللور قصرینده
داردادیر، آسیلیب تپه ساچیندان»
* * *
سهندی قورخوتماز نه‌سارای، نه‌سئحر.
«محبت» دئییلن بیر افسونو وار.
هم «اسم اعظم» دیر، هم «اسم شب» دیر،
باغلی قاپیلاری اوزونه آچار:
* * *
آچیلین، آچیلین باغلی قاپیلار!
محبت نامینا، ایستک نامینا.
اریگین، تؤکولون دمیر قیفیلار!
کؤنول خاطیرینه، اوره‌ک نامینا.
* * *
سانکی توفان قوپور، گؤی گورولداییر.
بولوتلار چاخناشیر، شیمشکلر شاخیر.
اود- آلوو اله‌نیر یئرین اوزونه،
دمیر دروازه‌لر سو اولور، آخیر.
* * *
گلیر قولاغیما اینیلتی‌لری:
«بوردا بیر شئر داردا قالیب باغیریر»
دوغروداندا من بیر «مروّتسیز»م،
قارداشیم داردادیر، منی چاغیریر!
* * *
چکیلین- چکیلین یول وئرین گئچیم!
اوره‌گیم آلیشیب، آلوو ساچارام،
«شهریار» بوینونا زنجیر وورالار؟!
چئینه‌رم، گمیرره‌م، دارتیب آچارام.
* * *
ایشله‌ییر قولوما دمیر پاخلالار،
زنجیر قینجیخدیریر، سانجیر اتیمی.
جان قارداش! هله‌لیک باغیشلا منی،
دئیه‌سن اونوتدوم اسارتیمی.
* * *
عزیز شهریاریم! باغیشلا منی،
اینجیمه، داریلما، فیکرین هاردادی؟
«مروّتسیز» دگیل سنین قارداشین،
آنجاق سنین کیمی، اودا داردادی.
* * *
اؤزون دئمه‌میسن: «بیزیم ائللرده
وکیل موکّلین خرجینی چکر؟»
آنا، عشق اوجاغی سؤنمه‌سین دئیه،
اوره‌‌گین اریده‌ر چیراغا تؤکر!
* * *
هریانی بیلمیرم، بیزیم دیاردا،
هئچده خیال دگیل، دوستلوق، محبت.
آنجاق ایشیق ساچان ایستی گونش‌ده،
بعضاً بولود آلتدا گیزله‌نیر البت.
* * *
بلکه‌ده نه‌بیلیم، سلطانیم قارداش!
حقیقتده ایشین عئیبی بیزدهدیر.
همین بو ایلقارین دوشگونویوک بیز،
گناه یاددا دگیل اؤزوموزده‌دیر!
* * *
بیر آووج کلک‌باز، قمارباز ایله‌ن،
پاک‌باز اولموشوق، پاک اودوزموشوق،
مرد ایکن، نامرده رحم ائیله‌میشیک،
ایندی نامردلره محتاج اولموشوق!
* * *
دؤلتلییه ساخسی لازم اولاندا،
ووروب سیندیرمیشیق اؤز کوزه‌میزی.
چیخدیغیمیز قینی بگنمه‌میشیک،
بیز ائلی آتمیشیق، ائل آتیب بیزی.
* * *
ائلیمیزه نه گون آغلامیشیق بیز؟
باغین شاختا ووروب، بوستانی یانیب.
ائل بیزه نئیله‌سین، نه گون آغلاسین؟
آغزی اوچوخلاییب، دیلی باغلانیب.
* * *
ایندی اولان اولوب، کئچنلر کئچیب،
جالانان سو بیرده کوزه‌یه دولماز.
دالدان آتیلان داش توپوغا دهگر،
گؤز یاشی تؤکمکلن یارا ساغالماز.
* * *
بوگون من سهندم، سن شهریارسان،
گل باشین اوجالداق قوجا تبریزین.
بیر کره یادلارین داشینی آتاق،
چکک قایغی‌‌سینی اؤز ائلیمیزین.
* * *
شاعیریم! دونیانی نئجه گؤرورسن؟
دوز یئییب دوز قابین سیندیرانلار وار.
قدیر بیلن یارا جان قوربان ائیله،
قدیر بیلمه‌ینه حئیفدیر ایلقار!
* * *
اؤزگه چیراغینا یاغ اولماق بسدیر،
دوغما ائللریمیز قارانلیقدادیر.
یانیب یاندیرمایاق یادین اوجاغین،
ائویمیز سویوقدیر، قیش‌دیر، شاختادیر.
* * *
دئمیرم یانمایاق، آلوولانمایاق،
یانماسین نئیله‌سین یازیق پروانه؟
یانمایاق وفاسیز یارین اودونا،
یاناق ائلیمیزه، یاناق وطنه.
* * *
وفاسیز گوللرین اوستوندن اوچاق،
قوناق صداقتلی ائل قوجاغینا.
سؤنمز عشقیمیزدن بیر پیوند سالاق،
ائلین شاختا وورموش گول بوداغینا.
* * *
بیر یئرده قالماقدان داریلدیق، اؤلدوک،
دوغما یوردوموزو دولاناق، گه‌زهک.
ائل ایلن آغلایاق، ائل ایلن گ‍‍ولهک،
اینجیمیزی وطن ساپینا دوزهک.
* * *
او گؤزه‌ل شه‌هرده، عزیز دیاردا،
شاعیری جوشدوران صحنه‌لر چوخ وار.
نیسگیللری چوخدور دردلی تبریزین،
بیری، سن اؤزونسن، عزیز شهریار!
* * *
هله‌لیک کیچیک بیرداملا اولساق‌دا،
سوزولک، دوزولک، داماق گؤل اولاق.
بیزده باشیمیزی قاتاق باشلارا،
قاریشاق سولارا، آخار سئل اولاق!
* * *
دره‌لردن گئچک، دنیزه چاتاق،
شیلتاق دالغالارا، دؤنک کوکره‌یک.
ایستی گونش ایلن قول- بویون اولاق،
قیزیناق، ترله‌یک، بولودا دؤنک.
* * *
اوچاق او قوراخلیق، پوزغون دیارا،
سوسوزوندان دیلی چیخان داغلارا.
یئیه‌سیز، قایغی‌‌سیز، یازسیز، باهارسیز،
چیچک‌سیز، یارپاقسیز، بارسیز باغلارا.
* * *
شاختالار، توفانلار، سرین کولک‌لر،
اسسین اوستوموزه بومبوز بوزاراق.
آغلایاق، آغنایاق اوجا داغلاردان،
دانقاز قایالاری دیبدن قوپاراق.
* * *
چایلارا سد ووراق، دره‌لر دولسون،
داشقین آخان سولار هدر آخماسین.
یاشارسین قوروموش کوللارین کؤکو،
زمیلر سوسوزدان گؤیه باخماسین.
* * *
«سهند»ده گول آچسین «حیدربابا»دا،
اوزه‌رینده چادر قورسون «شهریار».
باخاق چیچکله‌نن یوردا، شعر یازاق،
شاعرده بختیار، شعرده بختیار!
* * *
کسک دونیامیزدان کینه‌نین کؤکون،
«عشقدن یئنی بیر قورولوش قوراق».
وئره‌ک شیمشکلرله قاناد قانادا،
گئده‌ک اولدوزلارا، گونشه قوناق.
* * *
شاعیریم! سؤزومو قوربته سالما،
قولاق آس دونیادا گؤر بیرنه سسدیر.
باغریوی سیخماسین بو های- هارایلار،
قیریلان زنجیر دیر، سینان قفس‌دیر.
تهران - 21 بهمن 1346
